Biqdeq Qianqsu
Meeqlaeqmaeq lye naelhaeq mael
1
Yesu Jidu e shiqtuq Biqdeq laoq Momil lye saelpodu hhei biq e, Benqdu, Ja'latail, Japaldoja, Yalxilyal kaol Biqtui'niq milcaeq'ae zholsanq deel yil e baelzhol e cholyaeq tyuhael'ae xinl cu biq lil, 2 Cholyaeq xihael laoq, Aeqdae Momil laefuqmyel loq laoqmyel, senllinq ae'lye senljyeq wae lye peqlal, kaol Yesu Jidu e saeziq mael naelhaeq, yoqhhaeq e siq mael bi beiqxeiq hhei e cholyaeqhael ngeelvae. Enhuil kaol neesaelhhae mael noteel'ae haelnaeqmyel biq hhei biq lye nyuqlil!Aeqyil za e panlwangl mael
3 Laqma deiqqei biq mael aedeeteel e Hhaoqsongl Yesu Jidu e Aeqdae Momil'ae biq biq lye nyuqlil! Yoqhhaeq aeqyoyoq e haelnaeqmyel e hhaoqsaeqsaeq maellye, kaol Yesu Jidu cholsil onglci ae'lye dyeqhoqlal ae'lye, aedeeteel yaol zail qiq pu bo duhoq hhei laq wae, kaol aedeeteel'ae aeqyil za e panlwangl mael bi za laq. 4 Xilnye laol, aedeeteel laoq maq buq yilkiq, maeq zonglsu, maeq leeqshoq yilkiq e, noteel gae'lye mqmae taq'ae taeq deelhhei laeq e zaeqdye halngeiq mael hhamul wae, 5 Noteel xinlxin ae'lye Momil e onglzaeq mael ocongq biq e cholyaeqhael laoq, yoqhhaeq lye paeqgaelsael meeq deelhhei e, aeqnaol naolli naohaeq keellael fu mol du'lal maoqlye e jiul'en mael hhamul'ae. 6 Noteel aeqdilmyel maeq qiqsheel e shilfu laeq e onglci'ae qiqtongq nyuqsaeq feiq, noteel xilmael gae'lye hhaol maoqhhae, 7 Kaol noteel e xinlxin mael bi shilfu gol laol, aeqzaeq maellye pe gol biq feiq ba yilkiq e pulsheel mael taq'ae hhael pyuqjyeqjyeq wae, kaol Yesu Jidu mol du'lal fu laqma deiqqei mael, rongqyaol mael, maduq zhee za mael hhamul wae. 8 Noteel Jidu yaol maeq mol gol feiq, yoqhhaeq'ae gaeq biq; yaeqmeel maeq mol congl feiq, noteel yoqhhaeq'ae xiangxinl gae'lye maeq geedu lalkiq myel, rongqyaol e hhaol mael bong'lye za, 9 Noteel xinlxin ae'lye du'lal e xiaolgoq mael laoq, yohael e deqjiul mael kaol'ae.
10 Jiul'en xilmael'ae gee'li'laol, noteel laoq endianq hhamul'ae lye laefuqmyel geedu e xianzhi tyuhael laoq, loqlilshe'lye yinqjiu gol aeqwae, 11 Yoqhhaeteel e neemae onglci e Jidu e yohael mael zenlminq du hhei e Jidu hhae shelkuq e shiqshen mael, haeqfu maeq kaol haelmillye rongqyaol hhamul hhaemaeq lye yinqjiu gol aeqwae. 12 Yoqhhaeteel'ae qiqshil mael hhamul hhei biq laol, yoqhhaeteel fuqsil mael aeqyoyoq'ae maeqngeel'ae, noteel'ae fuqsil hhae lye loq'ae. Mqmae ae'lye moqheilheil du hhei e senllinq ae'lye fuqyin mael noteel'ae geegaeq hhei biq e cholyaeq lye, yaeqmeel xihael noteel'ae geegaeq hhei biq vae; xilmael mqmae yosonglhael dyel'eiq haelmillye hhaemaeq lye loq goq biq hhae!
Senljyeq e ssuqhaoq caqzaq maoqhhae
13 Tyulkaol, noteel e neemae mael paeqgaelsael meeq deelhhei, aeqyae'lye kei, kaol aeqyoyoq'ae zongltyeqzaeq maoqhhae, kaol neemae qiqsiqmyel Yesu Jidu mol du'lal fu noteel'ae heil laeq e enhuil mael'ae panlwangl deelzaeq hhei. 14 Noteel yilkaefu qiqgiq maeq loq fu saqdol lal aeqmyel mulgoq tyulmael laoqmyel zonglzhol feiq, yaeqmeeq laoq Momil e yaeqmiq yaqyo wae lye laol, tyulnye haeq bael zongl oq. 15 Ngeelfeiq, noteel yaol gul du hhei laq e tyutaeq laoq senljyeq hhae, kaol noteel haelzongl silqinq mael taq vae eiq senljyeq maoqhhae; 16 Momil e Suqhhaq taq'ae xilnye cu deelhhei kaol'ae: "Noteel senljyeq wae lye peqlal maoqhhae, ngael laoq senljyeq kaollil."
17 Noteel laoq cholyaeq'ae qiqboq vae eiq maeq polzaeq'ae, kaol haetaeq vae eiq aeqyoyoq e xinqweiq maellye shenqpanl e Hhaoqsongl'ae aeqdae lye gul biq laol, zun eiq zunjinl gu eiq gu e neemae za maoqhhae, kaol noteel milcaeq taq'ae baelzhol e naohaeq gol gil. 18 Noteel loq'ae, noteel yaol noteel e aeqpyuq aeqdae lye gee gaeyi e, qiqgiq yilsi maqza e xinqweiq onglci ae'lye hhae bi jiulsuq du hhei mael laoq, ba yilkiq e pulziq pulsheel mael'ae kaolzaeq maeqngeel'ae, 19 Jidu e siq gae'lye hhae, Jidu e hhaeqpyuqha e siq mael laoq, maeqmeeqmyel qiqgael eiq maqza'ae, maeq zongl su yo e aeqyol yolyaeq e siq laoqmyel hhae. 20 Jidu yaol laoq Momil mqdongq milbei maeq bei laefuq'ae lye saelpo meeq deelhhei aeqwae, ngeelfeiq, aeqnaol naolli naohaeq'ae noteel gae'lye caiq bi mol du'lal. 21 Noteel yoqhhaeq gae'lye, yoqhhaeq yaol cholsil onglci ae'lye bi dyeqhoqlal, kaol rongqyaol biq biq e Momil'ae xiangxinl laol, noteel e xinlxin kaol panlwangl mael gilzuqmyel Momil onglci vae hha za wae.
22 Noteel zhen'liq mael naelhaeq gae'lye aeqyoyoq e neemae mael zonglshol hhei'laol, aqsseq aeqnil'ae zaqgiq maqgiq myel hhae gaeq biq wae, kaol sholgaqlye neemae lye qiqhhaeq qiqhhaeq'ae aeqdilmyel gaeq maoqhhae. 23 Noteel yaol zail qiq pu hhae bi bo duhoq hhei mael laoq, buq yilkiq e ael'yuq gae'lye maeqngeel'ae, maq buq yilkiq e ael'yuq gae'lye hhae, Momil e dyeqdeel kaol haeqfu eiq zadeel e saeziq ae'lye hhae.
24 Momil e Suqhhaq taq'ae xilnye cu deelhhei kaol'ae:
"Ruqtiq za e cholyaeqhael laoq haelsaeq laoqmyel hhae,
yoqhhaeq e rongqyaol laoq haelsaeq e alyi laoqmyel hhae;
haelsaeq laoq kuga kiq'ae, alyi laoq leeqshoq kiq'ae,
25 Ngeelfeiq, Hhaoqsongl e saeziq laoq haeqfu keellye za deel'ae."
Saeziq xilmael laoq noteel'ae geegaeq biq e fuqyin mael ngeelvae.