Yaqgel Su
Shilfu laeq fu hhaol maoqhhae
1
Momil kaol Hhaoqsongl Yesu Jidu e yaqhacheqzaq e cholyaeq Yaqgel laoq haeqvae lael'ee myel zholsanq deelyil e qyelniq zhipail e cholyaeqhael'ae meeqlaeqmaeq lye naelhaeq lil. 2 Ngaeq e aqsseq aeqnilhael o, noteel'ae maeq qiqsheel e shilfu mael puqlael fu, gilzuqmyel zhee hhaol e silqinq'ae lye kei maoqhhae. 3 Noteel e xinlxin mael'ae shilfu gol hhei'laol, renqnail za lalkiq'ae lye loq kaol'ae. 4 Ngeelfeiq, haeqfu keellye renqnail za gayil maoqhhae, xilnye laol, noteel laoq qiqgiq geehhael maqza wae, kaol maq lo myel qiqgiq maqza vae. 5 Noteel onglci'ae aeqsul maeq geel yae lye kaollaoq, cholyaeqhael'ae haelnaeqmyel biq biq kaol cholyaeq'ae maeq gaezaeq e Momil'ae geezaeq biq maoqhhae, kaol Momil yoqhhaeq'ae aeqdilmyel biq biq maoqlye hhae. 6 Ngeelfeiq, yoqhhaeq xinlxin za lye geezaeq maoqhhae, kaol haq huaiqyiq; huaiqyiq e cholyaeq laoq, eeldeel deelmae onglci e eeldiq mael zaeqxil maellye pillilpu'lu myel bi bo pu hhei laoqmyel hhae. 7 Xilnye cholyaeq laoq, Hhaoqsongl zaellye aeqchee hhamul maeqhe lye maeq nyuqzaeq kael'ae. 8 Neemae qiqsiqmyel maeq zongl e cholyaeq laoq, yoqhhaeq aeqchee zongl mael taq vae eiq puyil pu'lal myel kaol'ae.Aeqchee zacongl feiq qiq nao laoq buyil ngeelvae
9 Ochoq maeq fu'qiq'ongl e aqsseq aeqnilhael laoq, henq da'lal gae'lye hhae hhaol vae; 10 Zacongl hael maeq onglzaeq myel peqyil feiq hhaol maoqhhae, yoqhhaeq haelsaeq e alyi laoqmyel leeqshoq yilkiq kaol'ae. 11 Neelmae du'lal, kaol honglbo'lye zaeqxil bo tullaeq laol haelsaeq mael kuga hhei, alyi mael leeqshoq gae hhei, kaol yoqhhaeq e fusael lael aeqmyel e molkol mael buyil vae; zacongl e cholyaeqhael eiq yoqhhaeq lye zonglzaeq laeq onglci'ae lye xilnye loq gayil hhei.
Shilfu laeq fu renq gaeyil ongl e cholyaeq laoq geeqlongq meeq wae
12 Shilfu laeq fu zityeq gaeyil ongl e cholyaeq laoq geeqlongq meeq wae; yoqhhaeq'ae shilfu gol biq laol, aeqyil e zongmae vuqcongq hhae congq kaol'ae, zongmae vuqcongq xilmael laoq, Hhaoqsongl laoq yoqhhaeq'ae gaeq e cholyaeqhael'ae heil biq maoqlye gee gol hhae. 13 Cholyaeq'ae bi cheeqmu fu, "Ngaeq'ae Momil lye cheeqmu laeq hhae" lye maeq hhae gee'ae; Momil laoq duqlaq e tyutaeq lye maeq hhae bi cheeqmu'ae, kaol yoqhhaeq qiq hhaeq vae eiq maeq cheeqmu kaol'ae. 14 Bi cheeqmu e cholyaeqhael laoq, aeqyoyoq zhee mulgoq e nyuq mael lye bi hae'naeqzaeq yil kaol bi cheeqmu yil. 15 Aeqyoyoq zhee mulgoq e nyuq mael albye pi hhei'laol golsiq bo du hhei; golsiq mael heeqda lal, kaol sil mael bo du hhei.
16 Ngael gaeq e aqsseq aeqnilhael o, zaqgiq haeq bi giq hhei. 17 Maeq qiqsheel myel meeq e heil laeq mael, kaol maeq qiqsheel e qiqgiq geehhael maqza myel e shangqcil mael laoq, gilzuqmyel aqtaq ae'lye lael, kaol aeqcaelhael e aeqdae ae'lye loq gayi hhae; yoqhhaeq laoq maeq paelyil gol'ae, kaol dongni e aelbillaelbael eiq maqza'ae. 18 Yoqhhaeq aeqyoyoq e zhiqyil maellye, zhen'liq e saeziq maellye aedeeteel yaol bo hhei laeq, kaol aedeeteel yaol yoqhhaeq lye zongldu hhei e halza haelzholhael onglci vae, laefuq fuqli hhoqlal e aelsiq bi geiq laq.
Momil e saeziq mael naelhaeq kaol zongl yil maoqhhae
19 Ngael gaeq e aqsseq aeqnilhael o, noteel loq maoqhhae, noteel haetaeq eiq naeqbol maellye nae'naemyel naelhaeq, kaol aeqyae aeqyae'lye gee, kaol aeqyae aeqyae'lye faqhoqkei tullaeq maoqhhae; 20 Cholyaeq e faqhoqkei mael Momil e gongyil mael'ae qiqgiq maeq meeqyo'li kiq kaol'ae. 21 Tyulkaol, noteel maeqshol mael kaol duqlaq mael gilzuqmyel heildu maoqhhae, naoqyae'lye neemae maellye Momil lye kae hhei e saeziq mael mul maoqhhae; saeziq xilmael noteel e yohael mael jiul ongl hhae.
22 Ngeelfeiq, noteel Momil e saeziq mael zongl yil e cholyaeq geiq maoqhhae, naeqbol oqlye Momil e saeziq mael naelhaeq kaollaoq aeqyoyoq'ae zaqgiqgiqzaq hoq hhae; 23 Cholyaeq Momil e saeziq mael naelhaeq dyul maoq Momil e saeziq mael maeq zongl yil e cholyaeq geiq kaollaoq, yoqhhaeq laoq cholyaeq qiq hhaeq maekaeq maellye aeqyoyoq e maduq mael'ae chifu hoq laoqmyel hhae, 24 Fu hhei'laol deel hhei, kaol qiqlaqlye laol aeqyoyoq haelmillye dul hhae lye yelbael vae. 25 Cholyaeq yaol bi zilyoq e qiqgiq geehhael maqza e lilfaq mael'ae haelmeeqlye chifu, kaol duqlye zongl gaeyil e cholyaeq laoq, yoqhhaeq gaeq hhei'laol yelbael hhei maeqngeel'ae, aeqdilmyel zongl yil hhae, kaol aeqyoyoq haelzongl gae'lye geeqlongq meeq vae.
26 Cholyaeq qiq hhaeq aeqyoyoq neemae qiqsiqmyel Momil'ae cho'lyeq lil lye kei feiq, aeqyoyoq e myeqhael mael maeq zongltyeqzaeq kaollaoq, aeqyoyoq e neemae mael'ae zaqgiqgiqzaq hoq hhae, xilnye cholyaeq laoq neemae qiqsiqmyel Momil'ae cho'lyeq mael laoq alngeiqmyel wae. 27 Aeqdae Momil'ae lye fu'li'laol, neemae qiqsiqmyel Momil'ae cho'lyeq e cholyaeq laoq, sholgaqlye kaol qiqgiq maeq bi zonglsu myel ngeel maoqhhae; nol laoq saeqlael puqli biq e molchiq chiqyaeq kaol miqchiq'ae fuchoq biq, kaol aeqyoyoq yaol milcaeq taq e maeqmeeqmyel nyuq hael lye haeq bi zonglsu hhei.