Momil hhaol biq e fuqsil mael
13
Noteel laoq haeqfu eiq aqsseq aeqnilhael qiqhhaeq qiqhhaeq'ae gaeq e neemae za maoqhhae. 2 Daeqxi'ae neegaeqgaeq maellye sheeqcaq biq maoqhhae lye haeq bi yelbael hhei, yilkaefu qiqhhaeq laelhhaeq laoq xilnye zongl laol maeqgael lael'oqlye mqmae yosongl yaol sheeqcaq yo hhei vae. 3 Noteel laoq laoqgaiqkei laoqhaol vae koqlongl biq e cholyaeq'ae nyuqdeel biq maoqhhae, yoqhhaeteel nyegael laoqgaiqkei laoqhaol vae koqlongl deelhhei laoqmyel ngeel maoqhhae; noteel laoq zonglkyuq biq e cholyaeq'ae nyuqdeel biq maoqhhae, noteel aeqyoyoq vae eiq bi zonglkyuq laoqmyel ngeel maoqhhae. 4 Hunyin mael'ae aeqsul eiq zunjinl maoqhhae, qiqgael ssuqza e ssuqhhal mael eiq maeqshol myel maeq hhae zonglpeq hhei'ae, ochoq nyegael neemaeba kaol ochoq e haeqmiq haqyo nyegael byuq ssuqza e cholyaeq vae laoq, Momil aeqdilmyel shenqpanl biq maoqlye kaol'ae. 5 Noteel yeqhaoq caqzaq fu dyuqbaq mael'ae neemae maeq hhae cuqm, aeqyoyoq'ae halzahael lo yaevae lye loq maoqhhae, Momil xilnye gee gol kaol'ae: "Ngael aeqdilmyel noteel yaol maeq beiqdeelsaeq yil, beiq eiq maeq beiqgae yil." 6 Tyulkaol, aedeeteel qiqgiq maq gu zaq myel gee kael'ae:"Hhaoqsongl laoq ngaeq'ae baelzongl laeq e qiq hhaeq'ae,
kaol ngael aeqdilmyel qiqgiq eiq maq gu zaq yil.
Cholyaeq ngaeq'ae aeqchee zongl lael ongl maeq?"
7 Laefuq noteel'ae sheeqmyeq biq, kaol Momil e saeziq mael geegaeq biq e cholyaeqhael, noteel yoqhhaeteel'ae nyuqdeel biq maoqhhae, yoqhhaeteel e meeq e xinqweiq e jyeqjuq mael'ae nyuq fufu, kaol yoqhhaeteel laoqmyel xinlxin za maoqhhae. 8 Yesu Jidu laoq milnao, yaeqnao, aeqgael haeqfu keellye eiq qiqsheel'ae. 9 Noteel maeq qiqsheel e qiqguail lal aeqmyel geemyeq maellye haeq bi sheeqsae yil, cholyaeq e neemae mael sseetae'lye bi ngeel maoqlye mael laoq, zaeq dol mael'ae kaolzaeq maeqngeel'ae, endianq mael'ae kaolzaeq mael caiq meeq kaol'ae. Zaeq dol mael'ae gaesil e tyuhael'ae qiqzael eiq maeq meeqyo'li kiq biq'ae. 10 Aedeeteel'ae jiltanq qiq mal za'ae, tyulmael taq e zaelheel mael laoq Momil e haeqpael haelcul onglci vae, mulhhael mul e cholyaeq tyuhael laoq zaeq e laqtaq maqza'ae. 11 Jyeqyaeq e siq mael daljilsi lye zhilsenlsoq vae heil do'li, kaol Golsiq Zaelheel geiq hhae, ngeelfeiq, jyeqyaeq e aeqhhaol mael laoq haqhhael diqkaeq hhei e milcaeq nildu vae pe maoqhhae. 12 Tyulkaol, Yesu eiq milmae heeqmyel oheiq nildu vae shelkuq mael laoq, aeqyoyoq e siq maellye cholyaeqhael yaol senljyeq wae lye bi peqlal maoqlye hhae. 13 Xilnye laol, aedeeteel eiq haqhhael diqkaeq hhei e milcaeq nildu vae deel duyil maoqhhae, kaol yoqhhaeq e tyuqvae yil, kaol yoqhhaeq shel e zonglkyuq biq mael zityeq maoqhhae. 14 Aedeeteel'ae milcaeq taq'ae haeqfu eiq zadeel e milmae heeqmyel mael maqza'ae, aedeeteel laoq aeqgael lael maoqlye e milmae heeqmyel mael saelpo hhae. 15 Aedeeteel Yesu ae'lye, duqlye maeqdaeqhhaeq'ae lye gee mael zaelheel geiq kaol Momil'ae heel biq maoqhhae, xilmael laoq, yoqhhaeq e cholmil mael cenqrenl e cholyaeq e myeqbongq ae'lye siq lael e aelsiq'ae. 16 Ngeelfeiq, meeq e zongl mael kaol ochoq'ae byel biq mael haeq yelbael hhei, xilnye e zaelheel mael laoq Momil hhaol biq kaol'ae.
17 Noteel laoq noteel'ae sheeqmyeq laeq e cholyaeq'ae fuqcongq biq kaol yoqhhaeteel gee laoqmyel zongl yil maoqhhae, yoqhhaeteel laoq Momil e yiqsi'ae gee'loq maoq e cholyaeq laoqmyel haeqfu qiqlaq eiq noteel e aeqyil mael'ae fupol kaol'ae; yoqhhaeteel gee'loq fu, hhaol mael bi za maoqlaol saeq'olheeq mael haeq bi za, saeq'olheeq mael laoq noteel'ae maeq meeqyo'lael kiq kaol'ae.
18 Noteel ngaeteel'ae heeldoq bael gee laeq; ngaeteel laoq aeqyoyoq e liangqxin mael'ae nyuqfuhoq peq lil, aeqchee silqinq mael taq vae eiq hoq ga'lal aeqmyel zongl nae kaollil. 19 Ngael noteel'ae heeldoq bael gee laeq lye hhael geezaeq lil, xilnye laol, ngael nae'naemyel noteel tyuqvae hha hoqyi wae.
Geeqlongq biq kaol meeqlaeqmaeq lye naelhaeq mael
20 Neesaelhhae mael biq e Momil, haeqfu keellye geemeeq deelhhei e siq maellye, aqciqhael e aqciq hoqzaq e yoheeq, aedeeteel e Hhaoqsongl Yesu yaol cholsil onglci ae'lye sheeq duyi biq e Momil laoq, 21 Noteel'ae maeq qiqsheel myel meeq e silqinq mael taq vae qiqgiq geehhael maqza myel bi ngeel, kaol noteel'ae yoqhhaeq e zhiqyil mael laoqmyel bi zongl yil lye nyuqlil; kaol yoqhhaeq Yesu Jidu ae'lye aedeeteel onglci'ae yoqhhaeq hhaol e silqinq mael zongl lye eiq nyuqlil. Rongqyaol mael haeqfu keellye yoqhhaeq'ae biq hhei biq lye nyuqlil. Amen!
22 Aqsseq aeqnilhael o, ngael noteel'ae xinl cu biq mael laoq aelheel wae, noteel laoq ngael haelmeeqlye gee e saeziq mael nailxin za lye naelhaeq gil lye xiwangl lil. 23 Noteel laoq aedeeteel e aqsseq aeqnil Tiqmoqtail yaol pyeqduhoq hhei biq vae lye loq'ae; yoqhhaeq nae'naemyel lael kaollaoq, ngael yoqhhaeq nyegael noteel'ae mol yi maoq.