Hhaoqsongl cholyaeq'ae guanqjiaol biq mael
12
Tyulkaol, xuldyulmyel bael mol e cholyaeqhael mqdul congq'ongq laoqmyel aedeeteel'ae congq'ongq laeq laol, aedeeteel laoq maeq qiqsheel e chengdyeqlye aeq'yel kaol dong'lye leeltyeq e golsiq mael baqga hhei'laol, guaeq'ei renqnail e neemae za aeqmyel, aedeeteel e yiqsi'ae za e kibobo e gaelmae mael ki byel maoqhhae, 2 Aedeeteel'ae xinlxin biq laq kaol haeqfu keellye xinlxin bi za gayil laq e Yesu'ae deelhae'lye chifuzaeq maoqhhae, yoqhhaeq laoq laefuqboq'ae za e hhaol mael gae'lye shiqziljal e kuqnanl mael zityeq vae, yoqhhaeq laoq maduq maqza myel zonglpeq biq mael'ae fudyul biq hhae, kaol yaeqmeel laoq Momil e zongmae duqtyel e laqsseqboq'ae zhol deelhhei aeqwae. 3 Noteel laoq golsiq za e cholyaeqhael deiqgaehoq biq feiq renqnail e Yesu xitaeq'ae haelmeeqlye nyuq fufu laol, noteel hhaeqdyul maeq dyul kaol maeq zongl gaeyil ongl yaevae lye maeq kei wae.4 Noteel golsiq nyegael diqgae mael, siq yul kaol sil e dilbul'ae maeq zityeq keel siq. 5 Noteel laoq Momil noteel'ae haelmeeqlye gee biq e saeziq mael yelbael laeq wae maeq? Yoqhhaeq laoq yaqyo vae haelmeeqlye gee biq laoqmyel gee hhae, gee:
"Ngaeq e yaqyo o, Hhaoqsongl noq'ae guanqjiaol mael'ae haeq fudyul,
yoqhhaeq gaezaeq laeq fu maeq zongl gaeyil ongl yaevae lye haeq kei;
6 Hhaoqsongl gaeq hael'ae laoq, yoqhhaeq guanqjiaol kaol'ae,
yoqhhaeq laoq yoqhhaeq neemae onglci ae'lye jyeqshel biq e yaqyo
hae qiq hhaeq vae eiq alca maellye zheq biq hhae."
7 Bi guanqjiaol maoqlye laol, noteel ziqtyeq maoqhhae. Momil noteel'ae za biq mael laoq yaqyo'ae za biq laoqmyel hhae. Yaqyo laoq aeqdae lye maeq bi guanqjiaol myel maeqhael zhol? 8 Haelzhol yaqyo laoq bi guanqjiaol gol aeqwae; noteel maeq bi guanqjiaol nae kaollaoq, noteel laoq caqyaeq ngeelvae, yaqyo maeqngeel'ae. 9 Zail laoq, aedeeteel e ruqtiq e aeqdae aedeeteel'ae guanqjiaol laeq'ae, aedeeteel yoqhhaeq'ae dyel'eiq zunjinl biq'ae, yohael hhae lye e mqmae Aeqdae vae laoq nyeq'ei maeq gee kael wae, aedeeteel yoqhhaeq e saeziq mael naelhaeq laol aeqyil hhamul maoqlye maeqngeel maeq? 10 Ruqtiq e aeqdae laoq naohaeq qiq tongq vae aeqyoyoq nyuq hhei laoqmyel aedeeteel'ae guanqjiaol laeq hhae, ngeelfeiq, yohael hhae lye e aeqdae aedeeteel'ae guanqjiaol laeq mael laoq aedeeteel vae bi meeqyo'lael maoqlye hhae, kaol aedeeteel'ae yoqhhaeq e senljyeq taq'ae vuqtu bi bal zoq laq'ae. 11 Guanqjiaol laeq e silqinq mael, tyuqfu qiqlaq'ae laoq hhaol yae lye maeq kei'ae, daoldaolmyel nyuqsaeq hhae; ngeelfeiq, aeqnaol laoq duanllianl gol laol neesaelhhae e aelsiq siq du hhei, aelsiq xilmael laoq, gongyil e aelsiq ngeelvae.
12 Tyulkaol, noteel laoq baq naeq gae hhei e aqlaq mael baqqei hhei, keelguqsil e aeqkeel mael deiqzhoq hhei maoqhhae. 13 Aeqyoyoq e aeqkeel gae'lye gaelmae mael duqzhoq hhei maoqhhae, kaol keeldil e aeqkeel mael qiqzael eiq maeq bi gaheiq hhei wae, daoldaolmyel hhae meeqsholyil wae.
Momil e endianq mael maq mul e cholyaeq'ae jinqgaol biq
14 Noteel cholyaeqhael nyegael zilzheqlye zhol mael'ae zui'qiuq maoqhhae, kaol senljyeq mael'ae zui'qiuq maoqhhae; cholyaeq maeq senljyeq laol Hhaoqsongl yaol maeq hhae mol'ae. 15 Aeqyae'lye kei maoqhhae, aeqgael qiqhhaeq laelhhaeq laoq Momil e endianq mael zonglbaelzaeq hhei maeqhe; baelyil hhei kaollaoq, yohaeqhaeq e aelcil zhi du hheikaol noteel'ae leeltyeq lael, kaol haelnaeqmyel e cholyaeq yaol suheiqlye zongl su biq laoqmyel hhae, 16 Aeqyae'lye kei maoqhhae, aeqgael qiqhhaeq laelhhaeq laoq ochoq nyegael neemaeba, paelsilmyel Yiqsaoq laoqmyel xinlyangq maeq meeq myel peqyil hhei maeqhe, yoqhhaeq laoq zaeqzael aelheel gae'lye aeqyoyoq e fuqbo yaqyo e laqtaq mael ongqzaeq vae. 17 Aeqnaol, noteel loq'ae, yoqhhaeq laoq aeqdae biq e geeqlongq mael mulgoq biq hhae, ngeelfeiq, aeqdae yoqhhaeq'ae maq biq biq'ae, tyulkaol, yoqhhaeq mabil zu'lye geezaeq feiq, yoqhhaeq e aeqdae yaol neemae bi nyuqpael maoqlye e jihuil maqza biq vae. 18 Noteel laoq aqlaq so hhaeq e geezhoq vae keellael maeqngeel'ae, tyuqvae laoq aeqzaeq miqhulm, nahongqlye mqdul, nahei'lye nahongq, zaeqxil xilmae, 19 Dalhaol zhangq e yotyel kaol Momil saeziq gee e yotyel za hhae; tyuqfu yotyel xilmael gaeq hhei biq e cholyaeq tyuhael laoq, yoqhhaeteel'ae saeziq haeq gee naeq laeq oq lye geezaeq biq hhae, 20 Yoqhhaeteel laoq yoqhhaeteel'ae minllinl biq e saeziq mael maeq pityeq ongl biq kaol'ae: "Geeqzhoq xilmael'ae nuq yo e byeljyeq dyel'eiq, haqlo maellye beiqsil biq maoqhhae." 21 Haelmol du'lal e yanglziq mael laoq guaeq'ei gu lal aeqmyel hhae, kaol Moxi gee: "Ngael gu kaol saeqzuqzuq yae." 22 Ngeelfeiq, noteel laoq Xi'an Geeqzhoq vae, haeqfu keellye dyeqdeel e Momil e milmae heeqmyel milcaeq vae keellael hhae, milmae heeqmyel xilmael laoq, mqmae e Ye'lulsa'lenq ngeelvae, tyuqvae laoq mee'nae ca mee'nae tongl myel e mqmae yosonglhael hhaol gae'lael aeqmyel zhol'eeq deelhhei hhae, 23 Kaol cholmilhael mqmae taq'ae cuda deelhhei e fuqbo yaqyohael e julhuil za'ae, kaol cholyaeqhael'ae shenqpanl e Momil zhol, kaol qiqgiq geehhael maqza myel peqlal e gongyil e cholyaeqhael e yohael zhol, 24 Kaol geemeeq deelhhei yosheq e danbaoq e Yesu zhol hhae, kaol yoqhhaeq lye beiqxeiq da hhei e siq eiq za hhae; siq xilmael ae'lye geegaeq e xiaoxiq mael laoq Yalboq e siq ae'lye geegaeq e xiaoxiq mael taq'ae hhael meeq'ae.
25 Noteel duqlye aeqyae'lye kei maoqhhae, noteel'ae saeziq gee laeq tyutaeq'ae maq mul biq myel haeq zongl, milcaeq ae'lye yoqhhaeteel'ae jinqgaol biq e qiq hhaeq'ae maq mul biq e tyuhael dyel'eiq golsiq mael'ae maq kibeiqzaeq ongl'ae, aedeeteel laoq mqmae ae'lye aedeeteel'ae jinqgaol laeq e qiq hhaeq'ae saeziq maeq naelhaeq biq laol nyeq'ei maeq gee kael wae. 26 Tyuqfu, yoqhhaeq e yotyel lye milcaeq mael ssu'ni hhei, ngeelfeiq, yaeqmeel yoqhhaeq gee: "Zail qiq pu laoq ngael milcaeq mael ssu'ni hhei dyul maeqcil, mqmae mael eiq ssu'ni hhei maoqlye lil." 27 Saeqvae gee e saeziq "zail qiq pu" lye mael laoq, ssu'ni biq e zongldu hhei biq hael yaol heiltael yil biq laol maeq bi ssu'ni ongl hael laoq haeqfu eiq za deel'ae. 28 Tyulkaol, maeq bi ssu'ni ongl e goqja mael aedeeteel'ae hhamul hhei laq vae laol, Momil'ae meeqyaevae lye gee biq maoqhhae, kaol Momil hhaol biq laoqmyel, neemae qiqsiqmyel Momil'ae cho'lyeq, kaol zun eiq zunjinl gu eiq gu e neemae maellye Momil'ae fuqsil maoqhhae, 29 Aedeeteel e Momil laoq aeqchee eiq zonglmye ongl e aeqzaeq doq laoqmyel kaol'ae.