Fei'lilmenq Su 1

Fei'lilmenq Su

Meeqlaeqmaeq lye naelhaeq mael

Yesu Jidu gae'lye koqlongl e Baoqloq, kaol aqsseq aeqnil Tiqmoqtail laoq, ngaeteel nyegael mulhhael qiqgael bal mul e ngaeteel gaeq biq e Fei'lilmenq'ae, 2 Kaol Yesu'ae xinlzaeq e yaeqmiyaeq Yalfeiyal'ae, dangbin qiqgael kei e yelchoq Yaljibul'ae, kaol notoq e jiaolhuil'ae xinl cu biq lil. 3 Enhuil kaol neesaelhhae mael aedeeteel e Aeqdae Momil kaol Hhaoqsongl Yesu Jidu ae'lye, noteel'ae yo'li biq lye nyuqlil.

Baoqloq Fei'lilmenq'ae laqma deiqqei biq

4-5 Ngael nol laoq Hhaoqsongl Yesu onglci'ae xinlxin za, kaol senltuqhael'ae neegaeqgaeq biq'ae lye gaeq wae, kaol ngael haeqfu qiqzael heeldoq gee kaol noq'ae bael gee fu, duqlye ngaeq e Momil'ae meeqyaevae lye gee biq lil. 6 Nol cholyaeqhael'ae noq e xinlxin mael geegaeq gil biq fu, yoqhhaeteel naelhaeq dozaq hhei biq lye nyuqlil, kaol cholyaeqhael'ae aedeeteel onglci'ae meeq e silqinq haelzonglhael laoq Jidu gae'lye zongl hhae lye bi loq. 7 Aqsseq aeqnil o! Ngael eiq noq e neegaeqgaeq mael gae'lye zhee hhaol yae, kaol neemae maeq nyuqsaeq yaevae, senltuqhael e neemae mael noq gae'lye zholsael gil biq kaol'ae.

Baoqloq Fei'lilmenq'ae Ou'niqximuq gae'lye geezaeq biq

8 Ngael Jidu onglci'ae lye qiqgiq maqguzaq myel, noq'ae nol zongl maoq mael moqheil hhae heil'ae, 9 Ngeelfeiq, ngael yaeqmeel Jidu Yesu gae'lye koqlongl deelhhei e cholhoq li e Baoqloq laoq noq'ae neegaeqgaeq gae'lye geezaeq maoqlye zhee nyuq lil, 10 Ngaeq yaol koqlongl laeq fu bo hhei e Ou'niqximuq gae'lye noq'ae geezaeq lil. 11 Yilkaefu yoqhhaeq noq'ae qiqgiq maeq meeqyo'lael kiq'ae, ngeelfeiq, yaeqmeel laoq noq'ae kaol ngaeq'ae meeqyo'lael kiq'ae. 12 Ngael yaeqmeel yoqhhaeq yaol noq zael'ae hoqyil lye moqheilheil du hhei wae; yoqhhaeq laoq ngael gaeq e cholyaeq'ae. 13 Ngael laefuq laoq yoqhhaeq yaol ngaeq e saeqvae bi zholdeelsaeq maoqlye nyuq lil, kaol ngaeq yaol fuqyin gae'lye koqlongl deelhhei laeq fu, nol ngaeq'ae zhaofu laeq maoq e vuqtu mael yoqhhaeq yaol bi zhaofu. 14 Ngeelfeiq, nol hhaeq'ae lye maeq gee siq laol, ngael xilnye maeq zongl yil, xilnye laol, nol meeq e zongl mael laoq, nol maeqzonglgoq maeqzaeqmyel bi zongl maeqngeel yil, nol aeqyoyoq zongl goq aeqmyel zongl aeqmeel. 15 Yoqhhaeq noq'ae qiqtongq deelsae hhei mael laoq, haeqfu myel noq e cholyaeq peqlal maoqlye maeqhe, 16 Kaol yoqhhaeq laoq hhaeq'ongq ongqzaeq e cholyaeq maeqngeel wae, hhaeq'ongq ongqzaeq e cholyaeq taq'ae hhael heeq li wae, kaol aedeeteel gaeq biq maoq e aqsseq aeqnil'ae. Ngaeq'ae lye gee'li'laol xilnye hhae, noq'ae lye gee'li'laol, cholyaeq e guanxil haoq, paelsilmyel Hhaoqsongl onglci e guanxil haoq, nyeq'ei xilnye ngeel maoqhhae.

17 Tyulkaol, nol laoq ngael noq nyegael mulhhael qiqgael bal mul e cholyaeq'ae lye kei kaollaoq, ngaeq'ae neemae onglci ae'lye jyeqshel laq laoqmyel yoqhhaeq'ae neemae onglci ae'lye jyeqshel biq maoqhhae. 18 Yoqhhaeq lye noq'ae aeqchee zonglzhil laeq, paelsilmyel noq'ae aeqchee ca kaollaoq, ngaeq'ae suanl da hhei aeqmeel. 19 "Ngael heilhoq hhaeq", xilmael laoq Baoqloq ngaeq lye cu hhei lil. Ngael noq'ae maeq gee biq kael'ae, noq e aeqyil dyel'eiq ngaeq'ae ca hhae. 20 Tyulkaol, aqsseq aeqnil o! Nol Hhaoqsongl e onglci'ae ngaeq'ae baelzongl laeq, xilnye laol, ngaeq e neemae mael Jidu onglci'ae zholsael wae. 21 Ngael nol laoq ngael gee mael naelhaeq'ae lye aeqdilmyel xiangxinl lil, kaol nol zongl maoqlye mael laoq, ngael gee mael dyul maeqcilmyel'ae lye loq lil, tyulkaol, xinl xilmael noq'ae cu biq lil. 22 Zail laoq, nol ngaeq'ae zholhhael paeqgaelsael meeq deelhhei laeq, ngael laoq noteel heeldoq bael gee laeq ae'lye pyeqduhoq hhei laq laol, noteel zael'ae yi maoqlye panlwangl deelzaeq hhei kaollil.

Meeqlaeqmaeq lye naelhaeq e saeziq

23 Jidu Yesu gae'lye ngaeq nyegael laoqgaiqkei qiqgael bael kei e Yiqbafuq, 24 Kaol ngaeq nyegael mulhhael qiqgael bal mul e Maqkeq, Yalliqdaqguq, Diqmaq kaol Lulja gilzuqmyel noq'ae meeqlaeqmaeq lye naelhaeq hhae. 25 Hhaoqsongl Yesu Jidu e endianq mael noteel nyegael qiqgael baelzhol biq lye nyuqlil.