Xiboqlaiq Su
Momil yoqhhaeq e Yaqyo ae'lye saeziq gee
1
Yilkaeaeqnao, Momil xianzhihael ae'lye hae'nae pu myel kaol haelnaeqmyel e loqho maellye, aedeeteel e aeqpyuq aeqdaehael'ae saeziq gee biq, 2 Aeqnaol naolli naohaeq'ae, yoqhhaeq e Yaqyo ae'lye aedeeteel'ae saeziq gee laeq. Yoqhhaeq e Yaqyo laoq halza haelzholhael mul gayil e qiq hhaeq'ae, yoqhhaeq eiq mqsongl milcaeq mael zongldu hhei e qiq hhaeq'ae 3 Yoqhhaeq laoq Momil e rongqyaol e aeqcael'ae, Momil aeqyoyoq e aeqdilmyel e molkol'ae, yoqhhaeq laoq haeqfu eiq onglzaeq e minllinl maellye halza haelzholhael weiqchiq deelhhei hhae. Yoqhhaeq lye cholyaeq e golsiq mael zonglshol aeqwae, kaol haeqgaomyel e mqmae taq vae hhaelheeq heeqli e qiq hhaeq e laqsseqboq'ae zhol deelhhei hhae.Momil e Yaqyo laoq mqmae yosonglhael'ae jyeqli aeqwae
4 Momil yoqhhaeq e Yaqyo'ae biq biq e cholmil mael mqmae yosonglhael e cholmil mael taq'ae maduq hhal za'ae, tyulkaol, Yaqyo laoq mqmae yosonglhael taq'ae jyeqli aeqwae. 5 Momil mqmae yosongl haetaeq'ae
"nol laoq ngaeq e Yaqyo'ae,
yaeqnao ngael noq e aeqdae geiq maoq",
paelsilmyel
"ngael yoqhhaeq e aeqdae geiq maoq,
yoqhhaeq ngaeq e Yaqyo geiq maoqlye hhae" lye
gee gol biq maeq?
6 Ngeelfeiq, Momil yoqhhaeq e fuqbo yaqyo yaol milcaeq taq'ae bi yi fu, mqmae yosonglhael'ae gee biq:
"Noteel gilzuqmyel yoqhhaeq'ae heel biq maoqhhae."
7 Mqmae yosongl'ae gee keelli laol, Momil gee:
"Momil laoq mqmae yosongl yaol zaeqxil laoqmyel bi ngeel,
yaqhacheqzaq e cholyaeq yaol aeqzaeq miqhulm laoqmyel bi ngeel.
8 Ngeelfeiq, Yaqyo'ae gee'li'laol, yoqhhaeq gee:
"Momil o, noq e zongmae duqtyel mael laoq
haeqfu keellye za keel hhae;
noq e goqja e laqtaq dailbiaoq e zaeqngeeq mael laoq
saeqsaeldye e laqtaq dailbiaoq e zaeqngeeq'ae.
9 Nol gongyil mael'ae hhaol biq,
golsiq mael'ae hol biq hhae,
tyulkaol, Momil laoq noq e Momil'ae,
hhaol mael zhoqcae cil laoqmyel noq'ae xyecheeq hhei biq mael,
noq e yelchoqhael'ae xyecheeq hhei biq mael taq'ae jyeqli aeqwae."
10 Yoqhhaeq yol gee:
"Hhaoqsongl o, noq lye laefuq fuqli ae'lye
milcaeq mael zongltul hhei,
mqmae mael eiq noq e aqlaq lye zongldu hhei hhae.
11 Mqmae milcaeq laoq myeyil kiq hhae,
ngeelfeiq, nol laoq haeqfu eiq zhol deel'ae;
mqmae milcaeq mael aelhongq laoqmyel
aeqyae aeqyae'lye yogeilgeil yil kiq'ae;
12 Nol mqmae milcaeq mael aelhongq
qiq ko lu laoqmyel lutyeq maoqlye hhae,
mqmae milcaeq mael gilzuqmyel
aelhongq laoqmyel paelyil kiq hhae.
Ngeelfeiq, nol laoq qiqzael eiq maeq paelyil kiq'ae;
noq e naohaeq mael jyeqsuq yil kiq lye qiq nao eiq maqza'ae."
13 Momil mqmae yosongl haetaeq'ae
"ngaeq lye noq e diqrenq yaol,
noq e aeqkeel baqda e toqmoq bi geiq fu keellye,
nol ngaeq e laqsseqboq'ae zhol deelhhei" lye
gee gol biq maeq?
14 Mqmae yosonglhael laoq gilzuqmyel Momil'ae fuqsil e yohael'ae, Momil lye yoqhhaeteel yaol jiul'en hhamul maoqlye e cholyaeq tyuhael'ae baelzongl yil biq lye moqheilheil du hhei biq maeqngeel maeq?