Weiqdal e jiul'en
2
Tyulkaol, aedeeteel gaeq gol e fuqyin mael aeqdilmyel nyeq'ei aeqyae'lye kei maoqhhae, aeqgael aedeeteel laoq alpaq mael eelcuq lye pi zaeq yil laoqmyel peqyil hhei maeqhe. 2 Mqmae yosongl ae'lye geegaeq e saeziqhael aeqdilmyel ngeel'ae lye laol, gee deelhhei laoqmyel maeq zongl kaol saeziq maeq naelhaeq e cholyaeqhael laoq, gilzuqmyel shel maoq e chenqfaq mael shel vae; 3 Aedeeteel weiqdal e jiul'en mael neemae onglci'ae maeq nyuqtongq deelhhei kaollaoq, haelmillyekaol chenqfaq onglci ae'lye kihezaq ongl laeq? Jiul'en xilmael laefuq laoq Hhaoqsongl aeqyoyoq gee hhae, aeqnaol laoq gaeq hhei biq e cholyaeq lye aedeeteel'ae zenlminq hhei laeq vae. 4 Momil aeqyoyoq e zhiqyil laoqmyel, shenqjiq, maeqdaeqhhaeq e silqinq, maeq qiqsheel e onglzaeq mael, kaol senllinq e encil maellye, yoqhhaeteel nyegael qiqgael zoqzenlkei hhae.Jiul'en e sheeqmyeqzaeq e yoheeq
5 Momil laoq aedeeteel gee gol e naeshoq aeqnao e shilgail mael mqmae yosonglhael'ae maeq bi guanqliq'ae. 6 Ngeelfeiq, qiqhhaeq laelhhaeq laoq Momil e Suqhhaq taq e qiqgael laelgael vae xilnye zenlminq hhae, gee:
"Cholyaeq aeqchee suanl laeq,
nol yoqhhaeq'ae nyuqdeel biq;
milcaeq taq e cholyaeq aeqchee suanl laeq,
nol yoqhhaeq'ae fupol biq.
7 Nol yoqhhaeq yaol mqmae yosonglhael taq'ae,
dilweil qiqlaq hhael bi nil hhae,
nol rongqyaol kaol maduq za mael,
yoqhhaeq'ae zongmae vuqcongq laoqmyel congq da hhei biq,
nol yoqhhaeq'ae noq e aqlaq lye
zongldu hhei hael'ae bi guanqliq,
8 Kaol halza haelzholhael
yoqhhaeq e aeqkeel holhhaq vae maeq fuqcongq maeq hhaeq'ae."
Halza haelzholhael yoqhhaeq'ae bi fuqcongq lael vae laol, yoqhhaeq'ae maeq fuqcongq myel qiqgiq maq zadeelsaeq vae. Ngeelfeiq, yaeqmeel aedeeteel laoq halza haelzholhael gilzuqmyel yoqhhaeq'ae fuqcongq lael biq vae lye maeq mol yo wae siq; 9 Ngeelfeiq, yaeqmeel laoq aedeeteel mqmae yosonglhael taq'ae dilweil qiqlaq hhael nil e Yesu yaol mol vae, yoqhhaeq sil e nael mael shel gol kaol maduq za mael kaol rongqyaol za mael zongmae vuqcongq laoqmyel congq hhei biq vae, tyulkaol, yoqhhaeq Momil e endianq gae'lye haelzhol cholyaeqhael sil maoq vuqtu mael bael sil biq vae.
10 Qiqshiq laoq, halza haelzholhael yoqhhaeq gae'lye za kaol yoqhhaeq ae'lye zongldu hhei e Momil laoq, haelnaeqmyel yaeqmiq yaqyohael yaol rongqyaol onglci vae bi sheeq do'li maoqlyekaol, yoqhhaeteel'ae jiul biq e sheeqmyeqzaeq e yoheeq Yesu vae zonglkyuq biq kaol yoqhhaeq'ae qiqgiq geehhael maqza myel bi peqlal mael laoq hoq hhae. 11 Cholyaeq yaol senljyeq wae lye bi peqlal e Yesu, kaol senljyeq wae lye hha peqlal e cholyaeqhael laoq, gilzuqmyel aeqdae qiqdae ae'lye du'lal hhae. Xilmael gae'lye, Yesu yoqhhaeteel'ae aqsseq aeqnilhael lye gul biq fu maduq maqza yae lye maeq kei biq'ae, 12 Kaol Momil'ae gee biq:
"Ngael noq e cholmil mael ngaeq e aqsseq aeqnilhael'ae geegaeq biq maoq,
kaol huilzhongl onglci'ae lye noq'ae maeqdaeqhhaeq'ae lye gee maoq."
13 Yesu xilnye eiq gee:
"Ngael Momil'ae kaolzaeq maoq."
Yoqhhaeq yol gee:
"Fu hhei! Ngael Momil lye ngaeq'ae biq hhei laq e
yoqhhaeq e yaeqmiq yaqyohael nyegael saeqvae zhol lil."
14 Yaeqmiq yaqyohael haetaeq vae eiq ruqtiq za vae laol, qiqsheel ngeelvae, Yesu aeqyoyoq eiq ruqtiq za e cholyaeq peqlal mael laoq, yoqhhaeq e sil maellye cholyaeq yaol zonglsil e laqtaq za e niqhaeq haeqmae yaol zonglmye biq, 15 Kaol sil mael'ae gu gae'lye qiqyil myel hhaeq'ongq ongqzaeq e cholyaeq geiq e tyuhael yaol pyeqduhoq hhei biq maoqlye hhae. 16 Aedeeteel loqdaeqlye loq'ae, yoqhhaeq mqmae yosonglhael'ae maeq baelzongl biq'ae, Yalboqlahanl e houldailhael'ae baelzongl biq hhae. 17 Tyulkaol, yoqhhaeq aeqchee silqinq mael taq vae eiq yoqhhaeq e aqsseq aeqnilhael laoqmyel dul mael laoq, Momil e silqinq taq'ae hhaoqsaeqsaeq kiq e, xiangxinl hhaeq kael e daljilsi peqlal, kaol cholyaeqhael e golsiq gae'lye Golsiq Zaelheel heelda hhei maoqlye hhae. 18 Yoqhhaeq aeqyoyoq'ae bi cheeqmu gol kaol shelkuq gol vae laol, bi cheeqmu e cholyaeq'ae baelzongl ongl'ae.