Yesu laoq Moxi'ae jyeqli aeqwae
3
Tyulkaol, Momil lye gul du hhei biq e senljyeq e aqsseq aeqnilhael o, noteel Yesu'ae nyuq fufu gil, yoqhhaeq laoq aedeeteel cenqrenl e shiqtuq kaol daljilsi'ae; 2 Yoqhhaeq laoq yoqhhaeq'ae moqheilheil duyi biq e qiq hhaeq'ae neemae xyelpu maqpu biq mael, Moxi Momil toq e qiqhaoq qiqjyel'ae neemae xyelpu maqpu biq laoqmyel hhae. 3 Yoqhhaeq hhamul hhei biq e rongqyaol mael Moxi e rongqyaol mael taq'ae hhael naeq mael laoq zae hhae, laoqhaol cu e cholyaeq laoq laoqhaol mael taq'ae maduq hhal za laoqmyel hhae; 4 Laoqhaol hae qiq ssul eiq cholyaeq lye cutul hhei biq hhae, ngeelfeiq, halza haelzholhael zongltul hhei biq e tyutaeq laoq Momil'ae. 5 Momil e yaqhacheqzaq e cholyaeq Moxi laoq, Momil toq e qiqhaoq qiqjyel'ae neemae xyelpu maqpu biq'ae, kaol aeqgael geegaeq maoqlye e silqinq gae'lye zoqzenlkei; 6 Ngeelfeiq, Momil e Yaqyo Jidu laoq, Momil toq'ae guanqliq hhae. Aedeeteel panlwangl gae'lye maqguzaq mael kaol hodazaq mael za gayil kaollaoq, aedeeteel laoq Momil toq e cholyaeq ngeelvae.Momil e cholyaeqhael e hhaeqnaeqnaeq mael
7 Tyulkaol, senllinq gee laoqmyel:
"Yaeqnao, noteel yoqhhaeq e yotyel mael gaeq kaollaoq,
8 Aeqpyuq aeqdaehael'ae diqsheelleeldye vae bi shilfu laol,
Momil'ae neemae xyelpupu biq e naohaeq'ae
neehaha laoqmyel maeq hhae zongl'ae.
9 Tyuqvae lye, noteel e aeqpyuq aeqdae ngaeq'ae shilfu laeq,
kaol ngael haelzonglhael mol mael,
10 Yuqqyel hoq zoq wae.
Tyulkaol, ngael tyuqfu shiqdail e cholyaeqhael'ae xinqga yae,
gee: Yoqhhaeteel e neemae laoq duqlye deelbael hhei,
kaol ngaeq e gaelmae mael maeq loq biq'ae!
11 Kaol ngael hol gae'lael aeqmyel faqsilkei:
Yoqhhaeteel ngaeq e hhaeqnaeq naeqhhael vae
aeqdilmyel maq hha do'li'ae!"
12 Aqsseq aeqnilhael o, noteel aeqyae'lye kei maoqhhae, aeqgael noteel onglci e qiqhhaeq laelhhaeq laoq duqlaq e maeq xiangxinl e neemae za, kaol haeqfu keellye dyeqdeel e Momil ae'lye deelsae hhei maeqhe. 13 Yaeqnao lye za siq fu, naochomyel qiqhhaeq qiqhhaeq'ae haelmeeqlye gee biq maoqhhae, aeqgael noteel onglci e qiqhhaeq laelhhaeq laoq golsiq lye bi cheeqmu hhei, kaol neehaha maeqhe. 14 Aedeeteel laoq aedeeteel Yesu'ae zhoq xinlzaeq fu e xinlxin mael aeqnaol naolli vae za ga keelyil laol, Jidu nyegael mulhhael qiqgael mul e cholyaeq peqlal wae. 15 Momil e Suqhhaq taq'ae gee:
"Yaeqnao, noteel yoqhhaeq e yotyel mael gaeq kaollaoq,
aeqpyuq aeqdaehael diqsheelleeldye vae neemae xyelpupu fu
neehaha laoqmyel maeq hhae zongl'ae."
16 Yoqhhaeq e yotyel mael gaeq feiq yoqhhaeq'ae neemae xyelpupu biq mael aeqsul maeq? Moxi nyegael Aijiq ae'lye duyi e cholyaeqhael maeqngeel maeq? 17 Momil aeqsul'ae yuqqyel hoq faqhoqkei biq hhaemaeq? Golsiq zonglpizaeq kaol sil e aeqhhaol mael diqsheelleeldye vae leeqgul deelhhei e cholyaeq tyuhael'ae maeqngeel maeq? 18 Momil yoqhhaeteel yaol yoqhhaeq e hhaeqnaeq naeqhhael vae maeq bi do'li lye faqsilkei biq mael aeqsul vae maeq? Saeziq maeq naelhaeq e cholyaeq tyuhael vae maeqngeel maeq? 19 Xilnye fu hhei'laol, yoqhhaeteel hhaeqnaeq naeqhhael vae maq hha do'li mael laoq maeq xiangxinl gae'lye kaol'ae.