4
Tyulkaol, yoqhhaeq e hhaeqnaeq naeqhhael vae bi do'li laqngeel lye gee gol mael za siq laol, aedeeteel laoq gu e neemae za maoqhhae, aeqgael aedeeteel onglci e qiqhhaeq laelhhaeq laoq hhaeqnaeq maeq hhae naeq hhei biq laoqmyel maeqhe. 2 Aedeeteel'ae geegaeq hhei laeq e fuqyin mael, kaol yoqhhaeteel'ae geegaeq hhei biq e fuqyin mael laoq aeqdilmyel qiqsheel kaol'ae; ngeelfeiq, gaeq hhei biq e saeziq mael yoqhhaeteel'ae qiqgiq maeq meeqyo'li biq'ae, yoqhhaeteel gaeq hhei biq e saeziq mael xinlxin za lye zongl yil maoqhhae lye feiq maeq zonglkeel ongl biq kaol'ae. 3 Ngeelfeiq, aedeeteel xiangxinl vae e cholyaeq laoq hhaeqnaeq naeqhhael vae hha do'li, xilmael laoq Momil gee laoqmyel hhae:"Ngael hol gae'lael aeqmyel faqsilkei:
Yoqhhaeteel aeqdilmyel ngaeq e
hhaeqnaeq naeqhhael vae maq hha do'li'ae!"
Qiqshiq laoq, halza haelzholhael zongldu e mulhhael mael laoq, mqdongq milbei zhoq bei du hhei fu ae'lye mul byel aeqwae. 4 Dilqiq tian'ae gee keelli laol, Momil e Suqhhaq taq'ae xilnye qiq doq gee'ae: "Dilqiq tian'ae, Momil yoqhhaeq haelzongl maoqlye hael gilzuqmyel hhaeqnaeqnaeq gae hhei vae." 5 Baeqjyelboq e qiqgael vae eiq gee: "Yoqhhaeteel aeqdilmyel ngaeq e hhaeqnaeq naeqhhael vae maq hha do'li'ae!" 6 Hhaeqnaeq naeqhhael xilmael cholyaeq qiq miq'ae bi do'li maoqlye taeq deelhhei biq hhae, ngeelfeiq, laefuq fuqyin gaeq gol e cholyaeq tyuhael laoq, saeziq maeq naelhaeq gae'lye maq hha do'li'ae, 7 Tyulkaol, Momil mee'nae hoq e aeqnaol'ae, Dalweil e suqhhaq taq'ae naohaeq qiq nao yol gee deelhhei, naohaeq xilmael'ae laoq "yaeqnao" lye gul biq hhae, laefuqboq eiq gee gol laoqmyel:
"Yaeqnao, noteel yoqhhaeq e yotyel mael gaeq kaollaoq,
neeha maq hha ha'ae."
8 Yoshuyal lye yoqhhaeteel'ae hhaeqnaeq bi naeq vae kaollaoq, aeqnaol Momil laoq baeqjyelboq e naohaeq qiq nao maeq gee wae. 9 Xilnye fu hhei'laol, Momil mqdongq milbeiqbeiq e mulhhael taq'ae hhaeqnaeqnaeq gae hhei laoqmyel e anxiqriq mael Momil e cholyaeqhael'ae taeq deelhhei biq hhae. 10 Momil yoqhhaeq e mulhhael mael hhaeqnaeqnaeq gae hhei laoqmyel, hhaeqnaeq naeqhhael vae do'li e tyuhael eiq aeqyoyoq e mulhhael mael hhaeqnaeqnaeq gae hhei vae kaol'ae. 11 Tyulkaol, aedeeteel hhaeqnaeq naeqhhael vae do'li maoqlye hael zonglkeel ongl myel zongl maoqhhae, aeqgael qiqhhaeq laelhhaeq laoq saeziq maeq naelhaeq myel xoqdozaq hhei'laol jye'leeq hhei maeqhe.
12 Momil e saeziq mael laoq aeqyil za hhae, zoqyonglqiq hhae, niqboqmyel ta e halza e maejyel mael taq'ae hhal ta hhae, yohael kaol aeqyil, saeq'yuq yuqcheq kaol pultongq mael dyel'eiq cobongq hhei ongl kaol yeqpa hhei ongl hhae, neemae onglci'ae nyuq mael kaol zuqyil mael dyel'eiq fu loq ongl hhae. 13 Bi zongldu hhei hael, yoqhhaeq e yiqsi'ae maeq mol du'lal myel qiqgiq eiq maqza'ae; halza haelzholhael yoqhhaeq e ma'ne yiqsi'ae laoq nyelguqlye mol du'lal aeqmyel hhae, aedeeteel aeqyoyoq hael zongl e silqinq mael yoqhhaeq'ae gee'loq hhei biq maoqhhae.
Yesu laoq daljilsi'ae
14 Aedeeteel'ae laoq weiqdal e, haeqgaomyel e mqmae'ae da'li e daljilsi qiq hhaeq zhol vae laol, aedeeteel laoq aedeeteel cenqrenl e xinlyangq mael zongl gaeyil maoqhhae, daljilsi xitaeq laoq, Momil e Yaqyo Yesu'ae. 15 Aedeeteel e daljilsi laoq aedeeteel e ruanqroq mael'ae hhaoqsaeq maeq saeq kiq maeqngeel'ae; yoqhhaeq eiq aedeeteel laoqmyel aeqchee mael taq vae eiq bi shilfu gol aeqwae, ngeelfeiq, yoqhhaeq laoq golsiq maeq zonglpizaeq'ae. 16 Tyulkaol, aedeeteel laoq qiqgiq maq gu zaq myel Momil e zongmae duqtyela e yiqsi'ae lael mael laoq, hhaoqsaeqsaeq mael hhamul, enhuil hhamul, kaol zhee mulyo fu bi baelzongl maoqlye hhae.