5
Cholyaeqhael onglci ae'lye bi saelpodu hheikaol moqheil bi heil du hhei e daljilsihael laoq, cholyaeqhael'ae dailbiaoq kaol Momil hhae lye e silqinq mael zongl hhae, kaol cholyaeqhael e golsiq gae'lye liqvuq kaol zaelheel mael Momil'ae heelda hhei biq hhae. 2 Yoqhhaeq laoq qiqgiq maeq loq hael'ae kaol deelbael e cholyaeq'ae bael nyuq kiq'ae, yoqhhaeq aeqyoyoq vae eiq ruanqroq mael lye bi zongltyeq kaol'ae, 3 Tyulkaol, yoqhhaeq laoq cholyaeqhael kaol aeqyoyoq e golsiq gae'lye zaelheel heel maoqhhae. 4 Cholyaeq qiq hhaeq eiq daljilsi e maduq za mael aeqyoyoq maeq hhae heilmul'ae, Momil lye Yallunq laoqmyel gul du hhei biq e cholyaeq maoqlaol maq hhamul'ae.5 Qiqsheel ngeelvae, daljilsi geiq e Jidu aeqyoyoq rongqyaol mul maoqlye zongl maeqngeel'ae, yoqhhaeq'ae saeziq gee biq e tyutaeq lye biq hhei biq hhae, tyutaeq gee:
"Nol laoq ngaeq e Yaqyo'ae,
yaeqnao ngael noq e aeqdae geiq maoq."
6 Baeqjyelboq e qiqgael vae yol gee:
"Nol Mailjixiqdeq e tiqxil laoqmyel
haeqfu keellye jilsi geiq hhae."
7 Jidu ruqtiq dyeqdeel e naohaeq'ae, yotyel ha'lye nyuqsaeq lael aeqmyel nyul, kaol ma'eel zu'lye heeldoq gee, kaol yoqhhaeq yaol maeq bi sil myel jiul ongl e Momil'ae geezaeq gol biq'ae, tyulkaol, yoqhhaeq Momil'ae zun eiq zunjinl gu eiq gu gae'lye Momil yoqhhaeq'ae toq biq vae. 8 Yoqhhaeq laoq Momil e Yaqyo feiq, shelkuq ae'lye Momil e saeziq naelhaeq mael xoqdozaq hhei vae. 9 Yesu laoq aedeeteel e qiqgiq geehhael maqza e daljilsi peqlal vae laol, jiul'en mael yoqhhaeq e saeziq mael naelhaeq e cholyaeqhael'ae haeqfu keellye eiq biq ongl'ae, 10 Kaol Momil yoqhhaeq'ae Mailjixiqdeq e tiqxil laoqmyel daljilsi lye gul biq hhae.
Zhen'liq mael'ae xyelpupu e cholyaeq'ae jinqgaol biq mael
11 Silqinq xilmael'ae gee'li'laol, ngaeteel gee maoq e saeziq zhee za'ae, ngeelfeiq, maeq gee'loq sael'ae, noteel maeq naelhaeq do'li ki biq kaol'ae. 12 Shiqshen'ae lye gee'li'laol, noteel haeqfu'ae'lye laoqsi geiq maoq wae, ngeelfeiq, yaeqmeel laoq Momil e saeziq mael e zhoqmyel fu e jibenq yo'liq mael noteel'ae zail geemyeq biq maoq wae siq; noteel laoq aeqchil dol maoq wae siq kaol aelhoq maeq zaeq kiq e cholyaeq laoqmyel peqyil vae. 13 Aeqchil maoq maeq dol kiq hael laoq, gongyil e saeziq mael'ae loqdaeqlye maeq loq'ae, yoqhhaeq laoq albye byeyaeq kaol'ae. 14 Heeqlo'lal e cholyaeq maoqlaol aelhoq maeq zaeq kiq'ae, yoqhhaeteel e neemae mael duanllianl gae'lye aeqchee eiq loq'ae, kaol meeqdyul fudu hhei ongl'ae.