6
1-2 Tyulkaol, aedeeteel Jidu e zhoqmyel fu e jibenq yo'liq ae'lye deelsae hhei, kaol hael zonglkeel ongl myel neemae heeqlo'lal e dilbul'ae zongl keel maoqhhae, cholyaeq yaol bi sil kiq e xinqweiq haeq zongl maoq ngeelzhol'ae yae lye mael, Momil'ae xiangxinl mael, ciq e gui'liqhael, aqlaq baqcheeq da e gui'liq mael, cholsil onglci ae'lye dyeqhoqlal mael kaol haeqfu keellye e shenqpanl mael, congqciq paeqhhael laoqmyel e jibenq yo'liq xihael laoq zail qiq pu maeq geemyeq biq kael wae. 3 Momil hhaeq lil lye kaollaoq, aedeeteel laoq xilnye zongl maoqhhae. 4 Momil e aeqcael mael cuq yo gol biq, mqmae hhae lye e encil mael zaeq fufu gol, senllinq nyegael vuqtu bal zoq, 5 Momil e saeziq e meeq mael kaol aeqgael shilgail e onglzaeq mael zaeq fufu gol e cholyaeq tyuhael laoq, 6 Xinlyangq ae'lye deelsae hhei kaollaoq, yoqhhaeteel'ae neemae zail qiq pu paellael e silqinq maeq bi zongl vae; tyulnye zongl kaollaoq, yoqhhaeteel aeqyoyoq lye Momil e Yaqyo yaol shiqziljal taq'ae zail qiq pu diqcheeq da biq, kaol cholyaeqhael e yiqsi ae'lye yoqhhaeq'ae maduq maqza myel zonglpeq biq kaol'ae. 7 Aedeeteel laoq haeldye qiq koq laoqmyel hhae. Haeldye qiq koq vae vuq'yel hae'nae pu myel yelnyeq ga hhei biq, kaol aeqhael mulyaeq'ae oqbye oqnyul dyeq du hhei biq kaollaoq, Momil ae'lye geeqlongq hhamul wae. 8 Ngeelfeiq, haeldye xi qiq koq vae aelgong kaol pongqdeiq dyeq du'lal kaollaoq, qiqgiq boq'ae maeqyo myel peqyil hhei wae, kaol doqchiq bi gee goq biq vae, jyeqjuq laoq bi pe hhei ngeelvae. 9 Ngaeteel gaeq e cholyaeq0hael o, ngaeteel xilnye gee feiq, ngaeteel laoq noteel'ae hhael meeq e qinqkuangl za'ae, kaol jiul'en mael'ae hhael niq vae lye zhee xiangxinl oqyil siq. 10 Momil laoq maeq gongyil maeqngeel'ae, kaol yoqhhaeq laoq noteel e mulhhael, kaol noteel yoqhhaeq e cholmil gae'lye neegaeqgaeq du hhei mael yelbael hhei maeqngeel'ae, neegaeqgaeq mael laoq, noteel laefuq kaol yaeqmeel senltuq'ae fuqsil biq e neegaeqgaeq mael ngeelvae. 11 Ngaeteel laoq noteel aeqsul eiq qiqsheel e laqheiqqyel mael aeqnaol naolli'ae keellye zongl keel lye panlwangl lil, xilnye laol, noteel e panlwangl mael gilzuqmyel peqlal kiq wae. 12 Xilnye laol, noteel qiqgiq maeq mulzaeqnaol myel maeqngeel wae, daoldaolmyel, xinlxin kaol renqnail ae'lye biq laqngeel lye gee mael hhamul gayil e cholyaeqhael zongl laoqmyel bael zongl e cholyaeq peqlal vae.Momil aeqdilmyel biq laqngeel lye gee mael
13 Momil Yalboqlahanl'ae biq laqngeel lye gee gol biq fu, aeqyoyoq taq'ae hhael heeq e faqsilkei lael aeqmyel e qiq hhaeq maeq zhol biq laol aeqyoyoq'ae tyuq deelhhei kaol faqsilkei, 14 Gee: "Ngael noq'ae aeqdilmyel geeqlongq haelnaeqmyel biq laqngeel, kaol noq'ae houldail haelnaeqmyel bi naeqlael laeqngael." 15 Xilnye laol, Yalboqlahanl nailxin za lye doq deelhhei gae'lye biq laqngeel lye gee mael hhamul hhei biq vae. 16 Cholyaeq laoq aeqyoyoq taq'ae hhael heeq qiq hhaeq'ae tyuq deelhhei kaol faqsilkei hhae, kaol faqsilkei maellye danbaoqkei hhae, kaol maeq qiqsheel e deiqgae mael maeq bi deiqgae vae. 17 Qiqsheel ngeelvae, Momil laoq biq laqngeel lye gee mael hhamul e cholyaeq gae'lye, yoqhhaeq e zhiqyil mael maeq hhae zonglpael'ae lye hhael loqdaeq myel bi mol du'lal, kaol yoqhhaeq faqsilkei maellye danbaoqkei hhae. 18 Aedeeteel kihhaq milmae vae kihhaq yil e cholyaeq xihael, maeq hhae zonglpael e silqinq xi niq mal ae'lye, aqhabo'lye neehongq zhee bi hulm laeq vae, kaol aedeeteel e laefuqboq'ae za e panlwangl mael'ae nuqtyeq zaeq ongl'ae; silqinq xihael taq'ae Momil zaqgiq maqgiq kiq'ae. 19 Aedeeteel'ae panlwangl xilmael za vae, panlwangl xilmael laoq sulmde laoqmyel, sseetae'lye kaol kildong'lye hhae, kaol geqchiq haeqpael aeqnaol e zhilsenlsoq vae do'li. 20 Yesu laoq aedeeteel gae'lye laefuqboq'ae sheeqmyeqzaeq e qiq hhaeq geiq, kaol geqchiq haeqpael onglci'ae do'li vae; yoqhhaeq laoq Mailjixiqdeq e tiqxil laoqmyel haeqfu keellye daljilsi geiq hhae.