Mailjixiqdeq e jilsi tiqxil
7
Mailjixiqdeq xitaeq laoq Sa'lenq e zongmae ngeelvae, yoqhhaeq laoq hhaelgao gao'li Momil e jilsi'ae. Yoqhhaeq laoq Yalboqlahanl lye zongmaehael yaol diq yinqzaeq biq kaol hoqlal fu Yalboqlahanl'ae sheeqcaq yil biq, kaol yoqhhaeq'ae geeqlongq biq biq. 2 Yalboqlahanl eiq aeqyoyoq'ae hael hhae'lael biq hael, qyel mael onglci e qiq mal yoqhhaeq'ae heil hhei biq. Yoqhhaeq e laefuq fuqli e cholmil qiq mal laoq geepolduhoq hhei'laol "gongyil e zongmae" lye hhae, yoqhhaeq'ae "Sa'lenq e zongmae" lye yol gul biq hhae, Sa'lenq e zongmae laoq hoqpinq e zongmae lye yilsi'ae. 3 Cholyaeq qiq hhaeq eiq yoqhhaeq e aeqdae aeqmae, pyuqcheq, dyeqlal e naohaeq kaol sil e naohaeq mael maeq loq'ae, yoqhhaeq laoq Momil e Yaqyo nyedullye hhae, kaol haeqfu keellye jilsi geiq hhae.4 Noteel nyuq fufu, cholyaeq xitaeq haelmillye weiqdal she maeq! Aeqpyuq aeqdae Yalboqlahanl dyel'eiq yoqhhaeq lye diq yinqzaeq laeq mael qyel mael onglci e qiq mal yoqhhaeq'ae heil hhei biq. 5 Jilsi zaeqhhael mael zaeq e Lilveil e houldail tyuhael, lilfaq e tiaoqlil laoqmyel cholyaeqhael ae'lye qyel mael onglci e qiq mal heilzaeq hhae, cholyaeq xihael laoq aeqyoyoq e aqsseq aeqnil'ae, yoqhhaeteel laoq Yalboqlahanl aeqyoyoq ae'lye du'lal e houldail feiq, gee deelhhei laoqmyel heilzaeq wae siq. 6 Mailjixiqdeq laoq yoqhhaeteel nyegael qiqzonglyaeq maeqngeel, qiqsheel e pyuqcheq maeqngeel e Yalboqlahanl ae'lye qyel mael onglci e qiq mal heilzaeq dyul wae, kaol biq laqngeel lye gee biq mael hhamul e Yalboqlahanl'ae geeqlongq biq biq. 7 Haeqfu eiq zaeqhhael hhael heeq e qiq hhaeq zaeqhhael hhael nil e qiq hhaeq'ae geeqlongq biq biq hhae, xilmael laoq qiqgiq geegae hhael maqza'ae. 8 Silqinq xilmael taq'ae, xi qiqboq'ae lye gee'li'laol, qyel mael onglci e qiq mal daeqzaeq hael laoq sil yil kiq e cholyaeq'ae; ngeelfeiq, yul qiqboq'ae lye gee'li'laol, qyel mael onglci e qiq mal daeqzaeq e Mailjixiqdeq'ae laoq dyeqdeel wae siq lye zenlminq biq vae. 9-10 Mailjixiqdeq Yalboqlahanl'ae sheeqcaq biq fu, Lilveil laoq yoqhhaeq e aeqpyuq aeqdae e aeqhhaol onglci'ae zhol wae siq. Tyulkaol, aedeeteel xilnye gee kael'ae, qyel mael onglci e qiq mal daeqzaeq e Lilveil eiq Yalboqlahanl ae'lye qyel mael onglci e qiq mal heil du hhei vae.
11 Xilnye fu hhei'laol, Momil lye jilsi e zaeqhhael e jicuq taq'ae cholyaeqhael'ae lilfaq biq gayi biq vae. Cholyaeqhael laoq Lilveil cholyaeq e jilsi zaeqhhael ae'lye qiqgiq geehhael maqza myel zongl keel ongl kaollaoq, aeqcheekaol Yallunq e tiqxil laoqmyel maeqngeel myel, Mailjixiqdeq e tiqxil laoqmyel baeqjyelboq e jilsi qiq hhaeq zongltul hhei maoq wae siq maeq? 12 Jilsi e zaeqhhael mael zonglpael vae laol, lilfaq mael eiq aeqdilmyel zonglpael maoqhhae. 13 Saeziq xihael laoq tyutaeq'ae gee biq hhae, tyutaeq laoq baeqjyelboq e zhipail hhae lye e cholyaeq'ae, tyu yiq gol zhipail onglci'ae jiltanq yiqsi'ae fuqsil gol e qiq hhaeq eiq maeq zhol'ae. 14 Zhee fudu ongl'ae, aedeeteel e Hhaoqsongl laoq Yoqdal qiqzonglyaeq ae'lye du'lal hhae, ngeelfeiq, xi yiq gol zhipail'ae gee'li'laol, Moxi laoq jilsi e silqinq maeq gee yo gol'ae.
15 Mailjixiqdeq laoqmyel baeqjyelboq e jilsi qiq hhaeq bi tullael kaollaoq, aelmaol, ngael gee e saeziq mael laoq loqdaeqlye hhae loq wae. 16 Yoqhhaeq jilsi peqlal mael laoq, lilfaq taq e ruqtiq hhae lye e tiaoqlil laoqmyel maeqngeel'ae, maq ba yilkiq e aeqyil e onglzaeq mael laoqmyel hhae. 17 Yoqhhaeq'ae bal zoqzenl biq e saeziq xilnye gee kaol'ae:
"Nol Mailjixiqdeq e tiqxil laoqmyel
haeqfu keellye jilsi geiq hhae."
18 Laefuq e gailminl mael laoq ruanqroq kaol qiqgiq boq'ae maeq yo gae'lye bi beiqgae vae, 19 Aedeeteel'ae hhael meeq e panlwangl qiq mal za vae laol, panlwangl ximael'ae kaolzaeq kaol Momil'ae hhae niqli vae. Lilfaq mael'ae oqlye kaolzaeq laol qiqgiq maq peqlal ongl'ae.
20 Zail laoq, Yesu'ae jilsi bi geiq mael laoq, Momil faqsilkei e saeziq maqza maeqngeel'ae; baeqjyelboq e jilsihael'ae jilsi bi geiq fu xilnye faqsilkei e saeziq maqza'ae, 21 Faqsilkei e saeziq ae'lye zongltul hhei biq e qiq hhaeq laoq Yesu wae, yoqhhaeq yaol zongltul hhei biq e tyutaeq yoqhhaeq'ae xilnye gee biq kaol'ae:
"Hhaoqsongl faqsilkei vae,
aeqdilmyel maeq paelyil kiq wae.
Nol laoq haeqfu keellye jilsi geiq wae."
22 Faqsilkei e saeziq ae'lye zongltul hhei biq hhae lye laol, Yesu laoq hhael meeq e geemeeq deelhhei mael e danbaoq e cholyaeq geiq vae. 23 Jilsi peqlal e cholyaeq e sulmuq laoq naeq hhae, sil mael lye zongltyeq kiq kaol haeqfu keellye jilsi zaeqhhael mael maeq zaeq gaeyil ongl kaol'ae. 24 Ngeelfeiq, xitaeq laoq haeqfu keellye zholdeel hhae, kaol yoqhhaeq'ae laoq qiqzael eiq maeq hhae zonglpael e jilsi zaeqhhael mael za hhae. 25 Tyulkaol, yoqhhaeq'ae kaolzaeq kaol Momil e yiqsi'ae keelli e cholyaeqhael vae laoq, yoqhhaeq aeqnaol naolli'ae keellye jiul keel ongl hhae, yoqhhaeq laoq haeqfu keellye dyeqdeel, kaol yoqhhaeteel'ae bael geezaeq biq kaol'ae.
26 Aedeeteel hhal mulyo e daljilsi laoq aeqdilmyel xitaeq'ae, yoqhhaeq laoq senljyeq, maeq duqlaq, maeq zongl su yo, golsiq maqza, kaol mqmaehael taq'ae heeq jyeqli wae. 27 Daljilsi tyuhael laoq haeqfu qiq nao eiq laefuq laoq aeqyoyoq e golsiq gae'lye, aeqnaol laoq cholyaeqhael e golsiq gae'lye zaelheel heelda hhei maoqhhae, ngeelfeiq, yoqhhaeq laoq tyuhael laoqmyel maeq zongl kael'ae, yoqhhaeq qiq pu'ae lye aeqyoyoq yaol zaelheel heelda hheikaol golsiq diqshiq e silqinq xilmael zonglbyel vae kaol'ae. 28 Lilfaq ae'lye zongltul hhei e daljilsi laoq ruanqroq lye za'ae, ngeelfeiq, lilfaq e aeqnaol vae, Momil faqsilkei e saeziq maellye Yaqyo yaol daljilsi bi geiq, kaol yoqhhaeq yaol haeqfu keellye jiulsuq e zongl maoqlye gee deelhhei mael leza'lye bi zonglbyel vae.