Geemeeq deelhhei yosheq e daljilsi
8
Ngaeteel gee e silqinqhael onglci'ae hhal mulyo mael laoq: Aedeeteel'ae daljilsi xilnye qiq hhaeq zhol'ae, yoqhhaeq laoq mqmae vae hhaelheeq heeqli e qiq hhaeq e zongmae duqtyel e laqsseq boq'ae zhol deelhhei aeqwae, 2 Kaol Momil e haeqpael haelcul senlsoq vae yaqhacheqzaq e cholyaeq geiq hhae; haeqpael haelcul xilmael laoq Hhaoqsongl lye diqkaeq hhei hhae, cholyaeq lye diqkaeq hhei maeqngeel'ae. 3 Haelzhol e daljilsihael laoq liqvuq kaol zaelheel bi heel maoqlye zongltul hhei hhae, tyulkaol, daljilsi xitaeq eiq aeqdilmyel heelda hhei maoq e zaelheel za maoqhhae. 4 Yoqhhaeq milcaeq taq'ae zhol kaollaoq, jilsi maq geiq kael wae, lilfaq laoqmyel liqvuq heel e jilsi zhol vae kaol'ae. 5 Moxi Momil'ae haeqpael haelcul cu biq maoqlye fu, Momil yoqhhaeq'ae jinqgaol biq, gee: "Nol aeqyae'lye kei maoqhhae, gilzuqmyel ngael noq'ae geeqzhoq vae lye tyuqmyeq biq e yanglziq laoqmyel zongl yil maoqhhae." Tyulkaol, yoqhhaeteel milcaeq taq'ae Momil'ae heel biq e loqho mael laoq mqmae taq'ae heel gil e yanglziq paelsilmyel aelbillaelbael'ae. 6 Yaeqmeel Yesu laoq hhael jyeqli e mulhhael mael hhamul hhei biq vae, yoqhhaeq hhael meeq e geemeeq deelhhei mael e danbaoq e cholyaeq geiq laoqmyel hhae; geemeeq deelhhei e xilmael laoq hhael meeq e biq laqngeel lye gee maellye zongltul hhei hhae.7 Dilyiq gol geemeeq deelhhei mael maeqmeeqmyel qiqgiq maqza kaollaoq, baeqjyelboq e geemeeq deelhhei e qiq mal maeq saelpo kael wae. 8 Tyulkaol, Momil yoqhhaeteel'ae gaezaeq biq, gee:
"Hhaoqsongl gee,
fu hhei, naohaeq keellael goqbiq wae,
ngael Yiqsellyel toq kaol Yoqdal toq nyegael
baeqjyelboq e geemeeq deelhhei yosheq zail qiq mal zongltul hhei maoq;
9 Ngael yoqhhaeteel e aeqpyuq aeqdae e aqlaq mael'ae cheel hhei aeqmyel,
Aijiq milcaeq ae'lye sheeq duyi biq fu,
yoqhhaeteel nyegael zongltul hhei e geemeeq deelhhei laoqmyel maeqngeel'ae;
yoqhhaeteel ngaeq e geemeeq deelhhei mael
duqlye maeq zongl gaeyil'ae,
tyulkaol, ngael yoqhhaeteel'ae maeq gee'naeq goq yae;
xilmael laoq Hhaoqsongl gee hhae.
10 Hhaoqsongl yol gee:
Naohaeq tyuhael aeqnaol'ae,
ngael Yiqsellyel toq nyegael
geemeeq deelhhei mael laoq xilnye hhae:
Ngael ngaeq e lilfaq mael yoqhhaeteel e
neemae nyuq e onglci'ae heil do hhei biq,
kaol yoqhhaeteel e neemae mael'ae cuda hhei biq maoq;
ngael yoqhhaeteel e Momil geiq maoq,
yoqhhaeteel laoq ngaeq e cholyaeq geiq maoqlye hhae.
11 Yoqhhaeteel aeqsul eiq
aeqyoyoq e goqja e cholyaeq'ae
kaol aeqyoyoq e aqsseq aeqnil'ae
xilnye maeq geemyeq biq kael'ae,
gee: Nol Hhaoqsongl'ae siqcongl maoqhhae;
yoqhhaeteel hhaelnil nilli ae'lye mael
hhaelheeq heeqli'ae keellye,
gilzuqmyel ngaeq'ae siqcongl maoqlye kaol'ae.
12 Ngael yoqhhaeteel e maeqmeeq mael
yuanqliangl biq maoq,
kaol yoqhhaeteel e golsiq mael
aeqdilmyel maeq nyuqdeel biq vae."
13 Momil "geemeeq deelhhei yosheq" mael'ae gee keelli vae laol, aelmaol, dilyiq gol geemeeq deelhhei mael laoq yogeil peqyil aeqwae; kaol aeqyae aeqyae'lye yogeilgeil yil, aeqyae aeqyae'lye guolshiq yil hhei e geemeeq deelhhei tyulmael laoq, aeqdilmyel nae'naemyel buyil hhei wae.