Milcaeq taq e kaol mqmae taq e senlsoq
9
Dilyiq gol geemeeq deelhhei mael dyel'eiq heel e gui'liq kaol milcaeq taq'ae hhae lye e senlsoq za hhae. 2 Momil e haeqpael haelcul qiqssul mael paeqgaelsael meeq deelhhei vae: Nildu yiq kongl laoq senlsoq lye gul hhae, onglci'ae laoq denjal, zaelheel heelda e zaelzhee kaol zaelheel heel e aqba za hhae. 3 Onglci yiq kongl'ae geqchiq haeqpael aeqnao'ae Momil e haeqpael haelcul yol yiq kongl za'ae, zhilsenlsoq lye gul hhae, 4 Onglci'ae laoq pulsheel xiangtanq kaol qiq mal myel pulsheel bao da hhei e yoqguil za hhae, yoqguil onglci'ae laoq maqnaq heil do hhei e pulsheel buqyaeq, Yallunq e aelnuqnuq du'lal gol e zaeqngeeq kaol lilfaq cuda hhei e haqlo hoba niq siq zoq hhae; 5 Rongqyaol za e ji'lulboq yoqguil holtaq'ae golsiq shelmianq myel vae congqkaeq deelhhei hhae. Yaeqmeel ngael silqinq xihael qiq mal qiq mal lye loqlilshe'lye maeq hhae gee yaevae.6 Moqgoq xihael paeqgael xilnye sael meeq hhei vae laol, jilsihael naochomyel nildu yiq kongl e Momil e haeqpael haelcul vae do'li kaol Momil'ae heel biq e gui'liq zongl hhae. 7 Onglci yiq kongl e Momil e haeqpael haelcul vae laoq, daljilsi aeqyoyoq qiq hhaeq myel qiq hoq qiq pu do'li hhae, siq maq baq hhei myel qiqzael eiq maq do'li'ae, kaol aeqyoyoq gae'lye zaelheel heelda hhei, kaol cholyaeqhael qiqgiq maeq loq biq kaol golsiq zonglpizaeq gae'lye eiq zaelheel heelda hhei hhae. 8 Senllinq laoq xilmael ae'lye tyuqmyeq du hhei, nildu yiq kongl e Momil e haeqpael haelcul mael za siq fu, zhilsenlsoq vae do'li e gaelmae mael maeq mol du'lal wae siq. 9 Nildu yiq kongl Momil e haeqpael haelcul tyulmael laoq yaeqmeel e shiqdail mael'ae gee hhae, qiqshiq laoq heelda hhei e liqvuq kaol zaelheel mael laoq, heel e cholyaeqhael'ae liangqxin mael taq'ae qiqgiq geehhael maqza myel maeq bi peqlal ongl'ae. 10 Silqinq xihael laoq zaeq dol kaol maeq qiqsheel myel zonglshol e gui'liq mael'ae gee hhae, ruqtiq hhae lye e gui'liq'ae, gui'liq xihael e zoqyonglqiq mael laoq zonglpael e naohaeq yosheq keellael fu'ae keel hhae.
11-12 Ngeelfeiq, yaeqmeel Jidu keellael kaol meeq e silqinq mael zonglbyel e daljilsi geiq vae, hhael heeq kaol qiqgiq gee hhael maqza e Momil e haeqpael haelcul ae'lye deelpol duyil laol, qiq pu ae'lye zhilsenlsoq vae do'li kaol cholyaeqhael e golsiq mael haeqfu keellye bi shelmianq hhei vae. Momil e haeqpael haelcul tyulmael laoq cholyaeq e aqlaq ae'lye cu hhei maeqngeel'ae, shilgail ximael hhae lye eiq maeqngeel'ae; Jidu cholyaeqhael'ae golsiq bael diqshiq biq mael laoq, aqciq ciqpaeq kaol lalbu buyaeq e siq maellye maeqngeel'ae, aeqyoyoq e siq maellye hhae. 13 Aqciq ciqpaeq, aeqnuq nuqpaeq e siq kaol nyelhael haelyaeq pe e haeqlyel mael, maeqshol e cholyaeq e aeqhhaol taq'ae beiqxeiq da hhei biq laol, cholyaeq yaol dyel'eiq senljyeq wae lye bi peqlal, kaol aeqhhaol mael zonglshol hhei ongl kaollaoq, 14 Jidu e siq mael laoq nyeq'ei maeq gee kael wae, yoqhhaeq haeqfu keellye dyeq e yohael ae'lye aeqyoyoq yaol maeqmeeqmyel qiqgael'ae maqza myel Momil'ae heelda hhei biq, yoqhhaeq e siq mael lye aedeeteel e liangqxin mael hhael zonglshol ongl'ae, kaol cholyaeq yaol bi sil kiq e xinqweiq mael beiqgae hhei, xilnye laol aedeeteel laoq haeqfu keellye dyeqdeel e Momil'ae hhae fuqsil biq wae.
15 Xilmael gae'lye, Jidu laoq geemeeq deelhhei yosheq e danbaoq e cholyaeq'ae; yoqhhaeq aeqyoyoq sil maellye, dilyiq gol geemeeq deelhhei e holhhaq'ae golsiq zonglpizaeq e cholyaeqhael yaol suq duhoq hhei biq vae, Momil lye gul du hhei biq e cholyaeqhael vae biq laqngeel lye gee e haeqfu keellye zaeqdye halngeiq mael bi mul hhei vae. 16 Aeqsul zhoqheilheil deelsaeq laol, zhoqheilheil deelsaeq e cholyaeq aeqdilmyel sil vae lye zenlminq du hhei maoqhhae. 17 Cholyaeq sil hhei'laol, sil e laefuq'ae geedeelsaeq e saeziq mael caiq suanl hhaeq hhae; sil e laefuq'ae geedeelsaeq e saeziq gee e cholyaeq dyeq siq laol, sil e laefuq'ae geedeelsaeq e saeziq mael maeq suanl hhaeq'ae. 18 Tyulkaol, dilyiq gol geemeeq deelhhei mael eiq siq maellye zongltul hhei hhae. 19 Moxi lye lilfaq laoqmyel maeq qiqsheel e gailminl mael cholyaeqhael'ae geegaeq hhei biq fu, yoqhhaeq nyelna'na e caeqhum kaol niuqxi haelsael heil hhei, lalbu buyaeq kaol aqciq ciqpaeq e siq kaol eelcuq mael lilfaq e suqhhaq taq'ae beiqxeiq da hhei, cholyaeqhael e aeqhhaol taq vae eiq beiqxeiq da hhei biq laol, 20 Gee: "Siq xilmael laoq Momil noteel nyegael geemeeq deelhhei e zenljul ngeelvae." 21 Yoqhhaeq siq mael Momil e haeqpael haelcul mael'ae, kaol heel fu mul e maeq qiqsheel e moqgoqhael taq'ae tyulnye beiqxeiq da hhei. 22 Lilfaq laoqmyel gee'li'laol, aeqchee qiqsheel moqgoq mael eiq siq maellye zonglshol byel maoq myel wae; siq maeq bi yuldu kaollaoq, golsiq mael maeq hhae bi shelmianq'ae.
Jidu lye cholyaeqhael e golsiq mael zonglgae biq vae
23 Xilnye laol, mqmaehael taq e yanglziq mael laoqmyel zongldu hhei e moqgoqhael laoq gui'liq xihael lye zonglshol maoqhhae, ngeelfeiq, mqmae taq'ae za hael laoq, hhael meeq e zaelheel maellye zonglshol maoqhhae. 24 Jidu laoq cholyaeq e aqlaq lye cu hhei e senlsoq vae do'li maeqngeel'ae, yaeqmeel aedeeteel'ae Momil e yiqsi'ae caiq mol du hhei laq e mqmae e senlsoq vae do'li hhae, cholyaeq e aqlaq lye cu hhei e senlsoq mael laoq mqmae e senlsoq e yanglziq'ae, 25 Yoqhhaeq laoq daljilsi haeqfu qiq hoq eiq aeqnuq aqciq e siq heil hheikaol zhilsenlsoq vae do'li laoqmyel maeq zongl kael'ae, yoqhhaeq laoq hae'nae pu myel aeqyoyoq yaol maeq heelda hhei kael'ae. 26 Heelda maoqhhae lye kaollaoq, yoqhhaeq laoq mqdongq milbeibei du hhei fu ae'lye hae'nae pu myel shelkuq aeqwae. Ngeelfeiq, yaeqmeel laoq, yoqhhaeq laoq yaeqmeel shilgail e aeqnaol naolli vae mol du'lal, kaol qiq pu'ae lye aeqyoyoq yaol zaelheel heelda hhei, xilnye laol cholyaeqhael e golsiq mael hhae bi zonglgae hhei wae. 27 Gee deelhhei laoqmyel, aeqsul eiq sil li kiq lye qiqzael za hhae, sil hhei aeqnaol laoq hhae bi shenqpanl hhae. 28 Qiqsheel ngeelvae, Jidu qiq pu'ae lye aeqyoyoq yaol heelda hhei'laol, haelnaeqmyel cholyaeq e golsiq mael bael pi vae, naeshoq aeqnao'ae dil'el cil mol duhoqlal maoqlye wae siq, golsiq gae'lye maeqngeel'ae, laqheiqqyel lye yoqhhaeq'ae doq deelhhei e cholyaeq'ae jiul yi hhae.