10
Lilfaq mael laoq naeshoq aeqnao e meeq e silqinq e aelbillaelbael dyul wae, silqinq e laefuq e molkol mael maeqngeel'ae, tyulkaol, haeqfu qiq hoq eiq heelda hhei e qiqsheel e zaelheel ae'lye, do'li e cholyaeq tyuhael yaol qiqgiq geehhael maqza myel maeq bi peqlal ongl'ae. 2 Maeqngeel laol, zaelheel heel e silqinq mael haeqfu'ae'lye maeq zongl vae maeqngeel maeq? Heel e cholyaeq'ae qiq pu'ae lye bi zonglshol hhei'laol, liangqxin mael golsiq za yae lye zail eiq maeq kei kael vae kaol'ae. 3 Ngeelfeiq, zaelheel xihael lye haeqfu qiq hoq eiq cholyaeq'ae golsiq mael'ae bi nyuq tullaeq, 4 Aeqnuq nuqpaeq kaol aqciq ciqpaeq e siq maellye golsiq mael maeq heilgae ongl kaol'ae. 5 Tyulkaol, Jidu milcaeq taq'ae yi fu, gee:"Momil o,
zaelheel kaol liqvuq mael nol mul maoqlye maeqngeel feiq,
noq lye ngaeq'ae aeqhhaol paeqgaelsael meeq deelhhei laeq vae.
6 Pebyel Zaelheel kaol Golsiq Zaelheel mael
nol laoq maeq hhaol biq'ae.
7 Tyuqfu ngael gee:
Fu hhei! Ngael yi aeqwae, ngaeq e silqinq mael
Momil e Suqhhaq taq'ae cuda deelhhei aeqwae;
Momil o! Ngael yi mael laoq
noq e zhiqyil laoqmyel zongl yi maoqlye lil."
8 Sataqboq'ae gee: "Zaelheel, liqvuq, Pebyel Zaelheel kaol Golsiq Zaelheel mael, nol mul maoqlye maeqngeel'ae, nol hhaol biq eiq maeqngeel'ae." Xihael gilzuqmyel lilfaq laoqmyel heelda hhei hhae. 9 Yoqhhaeq yol gee: "Fu hhei! Ngael yi mael laoq, noq e zhiqyil laoqmyel zongl maoqlye lil." Xilnye laol, yoqhhaeq lye laefuq'ae za mael beiqgae hhei mael laoq, aeqnaol'ae za mael zongltul hhei maoqlye hhae. 10 Aedeeteel laoq zhiqyil xilmael lye, kaol Yesu Jidu qiq pu'ae lye yoqhhaeq e aeqhhaol mael heelda hhei gae'lye senljyeq wae lye peqlal vae.
11 Haelzhol jilsihael naochomyel haoqtul deelhhei kaol Momil'ae fuqsil hhae, duqlye qiqsheel e zaelheel heelda hhei, zaelheel xilmael laoq golsiq mael qiqzael eiq maeq heilgae ongl'ae. 12 Ngeelfeiq, Jidu laoq golsiq gae'lye qiq pu'ae lye haeqfu keellye eiq zoqyonglqiq e Golsiq Zaelheel heelda hhei vae, kaol Momil e laqsseq boq'ae zholgae hhei, 13 Kaol tyuq ae'lye aeqnaol laoq, yoqhhaeq e diqrenq yaol yoqhhaeq e aeqkeel baqda e toqmoq peqlal biq lye doq deelhhei hhae. 14 Yoqhhaeq aeqyoyoq yaol qiq pu'ae lye heelda hhei'laol, senljyeq wae lye peqlal e cholyaeq tyuhael yaol qiqgiq geehhael maqza myel bi peqlal kaol'ae.
15 Senllinq eiq aedeeteel'ae zoqzenl bael kei laeq'ae, yoqhhaeq xilnye gee gol vae:
16 "Hhaoqsongl gee: Tyuqfu naohaeq e aeqnaol,
ngael yoqhhaeteel nyegael
geemeeq deelhhei mael laoq xilnye hhae:
Ngael ngaeq e lilfaq mael
yoqhhaeteel e neemae onglci'ae heil do hhei biq maoq,
kaol yoqhhaeteel e neemae nyuq mael taq'ae cuda hhei biq maoq."
17 Yol gee:
"Yoqhhaeteel e golsiq mael
kaol yoqhhaeteel e lilfaq laoqmyel maeq zongl mael,
ngael aeqdilmyel maeq nyuqdeel biq vae."
18 Golsiq xihael shelmianq biq vae laol, golsiq gae'lye zaelheel maeq heelda kael wae.
Haelmeeqlye gee biq mael kaol jinqgaol mael
19-20 Tyulkaol, aqsseq aeqnilhael o, aedeeteel laoq Yesu e siq mael'ae kaolzaeq kaol qiqgiq maq gu zaq myel, yoqhhaeq lye aedeeteel'ae tongl hhei laeq e yosheqsheq e aeqyil za e gaelmae, geqchiq haeqpael ae'lye deelpol duyil kaol zhilsenlsoq vae hha do'li hhae; geqchiq haeqpael xilmael laoq yoqhhaeq e aeqhhaol ngeelvae. 21 Aedeeteel'ae Momil toq'ae guanqliq e weiqdal e daljilsi qiq hhaeq zhol vae laol, 22 Aedeeteel laoq zaqgiq maq giq e neemae kaol baq'oq za e xinlxin maellye Momil'ae niqli gil maoq, aedeeteel e golsiq za e liangqxin mael zonglshol hhei, kaol geelxu'lye e eelcuq maellye aeqhhaol mael eiq ciqshol gil maoq. 23 Aedeeteel laoq yotyel ha'lye geedu hhei gol e panlwangl mael'ae aqni maqni myel xiangxinl gaeyil maoqhhae, aedeeteel'ae biq laqngeel lye gee laeq e tyutaeq laoq haelmillye gee laol haelmillye zongl kaol'ae. 24 Aedeeteel qiqhhaeq qiqhhaeq'ae fuchoq biq, neegaeq bi gaeq tullaeq kaol meeq e silqinq bi zongl maoqhhae; 25 Aedeeteel laoq julhuil maeq kei myel zongl zhozho e cholyaeq laoqmyel, julhuil maeq kei myel maeq zongl hhaeq'ae, daoldaolmyel qiqhhaeq qiqhhaeq'ae haelmeeqlye gee biq maoqhhae, noteel naohaeq tyulmael niqlael vae lye loq vae laol, nyeq'ei xilnye ngeel maoqhhae.
26 Aedeeteel zhen'liq e zhishiq mael loq aeqnaol'ae baelyaelmyel golsiq zonglpizaeq siq kaollaoq, Golsiq Zaelheel mael zail eiq maeq taeqdeelsaeq laeq wae, 27 Aedeeteel laoq shenqpanl mael'ae, kaol diqrenq yaol meqdo maoqlye e aeqzaeq zaeqmae mael'ae gu'ni'lye doq deelhhei dyul oq vae. 28 Aeqsul Moxi e lilfaq laoqmyel maeq zongl yil laol, niq nulhhaeq paelsilmyel suq nulhhaeq bal zoqzenl laol, yoqhhaeq yaol aeqdilmyel zonglsil biq maoqhhae, hhaoqsaeq maeq hhae saeq biq'ae, 29 Momil e Yaqyo yaol nuqhaeq biq e cholyaeq'ae laoq nyeq'ei maeq gee kael wae, yoqhhaeteel laoq yoqhhaeq yaol senljyeq wae lye bi peqlal e geemeeq deelhhei e siq mael maeq shol'ae lye zongl hhae, kaol endianq biq laq e senllinq'ae yol fudyul biq, noteel nyuq fufu, yoqhhaeq'ae laoq guaeq'ei hhae bi chenqfaq maeqngeel maeq? 30 Aedeeteel laoq aeqsul xilnye gee'ae lye loq kaol'ae:
"Bal gaiqjiq mael laoq ngael lil,
ngael aeqdilmyel chenqfaq biq maoqlye lil.
Yol gee:
"Hhaoqsongl laoq aeqyoq e cholyaeqhael'ae shenqpanl biq maoqlye hhae."
31 Haeqfu eiq dyeqdeel e Momil e aqlaq onglci vae leeqdo hhei mael gu lal aeqmyel she! 32 Noteel laefuq e naohaeq'ae nyuq fufu hoq maoqhhae; noteel'ae aeqcael maellye bi cuqmol aeqnaol, haeldyul dyulmae shelkuq onglci'ae haelmillye zongl eiq maeqngeel myel mael zityeq hhae: 33 Qiqzael laelzael laoq, cholyaeqhael e yiqsi ae'lye bi geekyuq, kaol saeqlael puqlael; qiqzael laelzael laoq, xilnye shelkuq e cholyaeq tyuhael'ae yelchoq bael bo biq. 34 Noteel laoqgaiqkei laoqhaol vae koqlongl biq e cholyaeq tyuhael'ae hhaoqsaeqsaeq biq'ae, jadanglhael cholyaeq lye diqkoqzaeq yil feiq neemae maq suzaq myel jyeqshel gil'ae, noteel laoq aeqyoyoq'ae hhael meeq myel e haeqfu eiq zadeel e jadangl za'ae lye loq kaol'ae. 35 Tyulkaol, noteel maq gu zaq e neemae mael haeq beiqgae gil hhei, xilnye neemae za laol, shangqcil haelnaeqmyel hhamul'ae. 36 Noteel aeqdilmyel renqnail maoq wae siq, xilnye laol noteel Momil e zhiqyil mael zonglbyel hhei'laol, biq laqngeel lye gee mael hhamul wae. 37 Xilnye kaol'ae:
"Shiqshen aelheel za siq,
lael maoqlye e tyutaeq keellael goqbiq vae,
aeqdilmyel maeq dan'goq'ae;
38 Ngeelfeiq, ngaeq e gongyil e cholyaeq laoq
aeqdilmyel xiangxinl gae'lye dyeqdeel maoqlye hhae;
yoqhhaeq naolzizi hoq kaollaoq,
ngaeq e neemae mael yoqhhaeq'ae maeq hhaol yaevae."
39 Ngeelfeiq, aedeeteel laoq naolzizi hoq kaol myeyil hhei e tyulnye cholyaeq maeqngeel'ae, xinlxin za kaol aeqyil hhamul e cholyaeq'ae.