Haeqfu eiq meeq mael zongl maoqhhae
3
Nol yoqhhaeteel'ae zhiqmoqzaeq hael, kaol laqtaq za hael gee laoqmyel zongl, kaol yoqhhaeteel'ae fuqcongq maoqhhae, kaol haeqfu qiqlaq eiq, maeq qiqsheel e meeq e silqinq mael zongl yil maoq vae lye paeqgaelsael meeq deelhhei maoqhhae lye geetae gil biq. 2 Cholyaeq'ae haeq geekyuq, cholyaeq nyegael haeq deiqgae, aeqsul nyegael eiq hoqga'li kiq maoqhhae, kaol haelzhol cholyaeq'ae naoqyae'lye meeq biq maoqhhae. 3 Aedeeteel yilkaefu laoq qiqgiq maeq loq, saeziq maeq naelhaeq, bi cheeqmu hhei, kaol maeq qiqsheel e aeqyoyoq zhee mulgoq e nyuq mael kaol nyelhhae mael e hhaeq'ongq ongqzaeq e cholyaeq geiq, duqlaq kaol heiqcilnael onglci'ae zonglzhol, ochoq'ae neema bi su zaq, kaol qiqhhaeq qiqhhaeq'ae neemasu yae lye zongl. 4 Ngeelfeiq, aedeeteel e jiulzuq Momil yoqhhaeq e meeq kiq mael, kaol gaeq mael mol du'lal e keellael fu, 5 Yoqhhaeq aedeeteel yaol jiul laeq vae, aedeeteel gongyil gae'lael aeqmyel zongl gae'lye maeqngeel'ae, yoqhhaeq e hhaoqsaeqsaeq gae'lye hhae. Yoqhhaeq laoq zail qiq pu bi bo duhoq hhei e ciq e gui'liq, kaol senllinq lye yosheq zonglpael ae'lye aedeeteel'ae jiul laeq hhae. 6 Senllinq laoq, Momil aedeeteel e jiulzuq Yesu Jidu ae'lye aedeeteel e aeqhhaol taq'ae haelnaeq naeqmaemyel beiqxeiq da hhei laq e tyutaeq ngeelvae, 7 Kaol aedeeteel yoqhhaeq e endianq mael gae'lye gongyil e cholyaeq'ae lye hhae bi gul, yoqhhaeq biq laqngeel lye gee mael zaeqdye halngeiq hhamul gayil e cholyaeq peqlal, kaol haeqfu eiq zadeel e aeqyil mael'ae hhae panlwanglzaeq aeqwae. 8 Saeziq xilmael laoq xiangxinl hhaeq'ae, kaol nol xihael hae'nae pu myel geegaeq hhei gil biq, kaol Momil'ae xiangxinl e cholyaeqhael meeq e zongl mael neemae'ae nyuqtongq deelhhei biq lye nyuqlil; xihael laoq gilzuqmyel meeq hhae, kaol cholyaeq'ae meeqyo'lael hhae. 9 Nol laoq yaeqzhoq laoqmyel e geegae, pyuqcheq, deiqgae kaol lilfaq gae'lye zonglgae mael'ae gaelmaolsae'lye hoqhhaq maoqhhae, xihael laoq qiqgiq yilsi maqza, qiqgiq maeq meeqyo'lael kiq kaol'ae. 10 Yoqhhaeq boq'ae bi pol yi maoqlye ee'longqzaeq e cholyaeq vae laoq, qiqniq pu gee biq kaol maeq naelhaeq laol, nol yoqhhaeq nyegael yelchoq haq mul oq. 11 Nol laoq loq maoqhhae, xilnye cholyaeq laoq Momil e gaelmae mael maeq deel, duqlye golsiq zonglpizaeq, kaol aeqyoyoq haelzongl maellye aeqyoyoq'ae golsiq za'ae lye bi gee wae.Moqheilheil biq mael kaol meeqlaeqmaeq lye naelhaeq mael
12 Ngael Yaltiqmaq paelsilmyel Tuijiguq yaol noq tyuqvae moqheilheil du hheikaol bi yil fu, nol nae'naemyel Niqgebo'li vae ngaeq'ae mol lael maoqhhae, ngael tyuqvae aqga baehae gol maoqlye nyuqmeeq kaollil. 13 Nol Xi'nal lyulshi, kaol Yalbo'loq'ae gaelmae'ae mulyo e dyuqbaq haeldyul heildu ongl laol haeldyul heil hhei biq, kaol yoqhhaeteel'ae aeqchee eiq bi mulloq. 14 Aedee cholyaeqhael eiq meeq e zongl mael xoqxiq maoqhhae, kaol mulyo biq hael'ae heil biq, aeqgael aelsiq maeq siq du'lal maeqhe. 15 Ngaeq nyegael baelzhol e cholyaeqhael noq'ae meeqlaeqmaeq lye naelhaeq'ae. Xinlyangq gae'lye ngaeteel'ae gaeq laeq e cholyaeq tyuhael'ae, nol yoqhhaeteel'ae meeqlaeqmaeq lye bael naelhaeq biq. Enhuil mael noteel haelzhol cholyaeqhael nyegael qiqgael baelzhol biq lye nyuqlil.