Hoq e yo'liq mael geegaeq maoqhhae
2
Nol laoq, hoq e yo'liq mael geemyeq gil biq maoqhhae. 2 Nol laoq aeqbol yaeqmoqhael'ae geemyeq biq fu, xihael bi loq maoqhhae: Zilbaeq dol zaezae kiq, yiqzenlmyel maeq zongl, aeqyoyoq'ae guanq meeq ongl, xinlxin, neegaeqgaeq kaol neemaegil mael taq'ae haelmeeqlye zongl du hhei maoqhhae. 3 Qiqsheel ngeelvae, aeqpiq yaeqmoqhael'ae geemyeq biq fu, xihael bi loq maoqhhae: Aeqchee zongl mael vae eiq Momil'ae cho'lyeq e cholyaeq laoqmyel ngeel maoqhhae, ochoq'ae maeqngeel maeqngeelmyel haeq gee, zilbaeq e hhaeq'ongq ongqzaeq e cholyaeq haq geiq, kaol meeq e yo'liq maellye cholyaeqhael'ae geemyeq biq maoqhhae lye geemyeq biq, 4 Yoqhhaeteel xilnye zongl laol, cholhoq maeq heeq e cholhae aeqmaehael'ae xilnye hhae geetae biq: Haqyo kaol yaeqmiq yaqyohael'ae gaeq biq maoqhhae, 5 Kaol aeqyoyoq'ae guanq meeq ongl, aeqchee zongl feiq meeqlaellye zongl maoqhhae, laoqhaol pashoqzaeq, neemae meeq maoq, haqyo e saeziq mael naelhaeq maoqhhae, aeqgael Momil e yo'liq mael'ae geekyuq gil hhei maeqhe.6 Qiqsheel ngeelvae, yaqyoyaeqhael'ae aeqchee silqinq mael taq vae eiq aeqyoyoq'ae guanq meeq ongl maoqhhae lye geemyeq biq. 7 Nol aeqyoyoq laoq meeq e xinqweiq maellye yoqhhaeteel'ae zonglmyeq du hhei biq maoqhhae, kaol geemyeq mael taq'ae zaqgiq haq giq, yiqzenlmyel maeq zongl myel ngeel maoqhhae, 8 Gee e saeziq mael hoq maoq, kaol qiqgiq geehhael maqza myel ngeel maoqhhae, diqqye e cholyaeqhael aedeeteel'ae maeqmeeqmyel maeq geedu hhei ongl biq gae'lye, aeqyoyoq'ae bi saqdol hoqli.
9 Nol laoq yaqhacheqzaq e cholyaeqhael'ae xihael geemyeq biq: Yoqhhaeteel aeqchee mael taq vae eiq aeqyoyoq e hhaoqsongl e saeziq mael'ae naelhaeq, yoqhhaeq'ae bi hhaol, kaol yoqhhaeq'ae maeq hhae deiqgaehoq'ae, 10 Jadanglhael maeq hhae haoqzaeq'ae, ngeelfeiq, aeqchee mael taq vae eiq qiqgiq geehhael maqza myel e neemae maeqpaelmyel gaeq mael bi mol du'lal maoqhhae, xilnye zongl laol, aeqchee mael taq vae eiq aedeeteel e jiulzuq Momil e geemyeq mael'ae hhae rongqyaol biq wae. 11 Momil haelzhol cholyaeqhael'ae jiul maoqlye e endianq mael mol du'lal vae kaol'ae. 12 Endianq xilmael aedeeteel'ae xilnye geemyeq laeq: Neemae qiqsiqmyel xinlyangq meeq e neemae mael, kaol milcaeq taq ae'lye lael e saqdol lal aeqmyel mulgoq tyulmael heilgae hhei, kaol xi qiqyil laoq aeqyoyoq'ae guanqtyeq ongl, zaqgiq maqgiq kaol xinlyangq meeq gae'lael aeqmyel zonglzhol maoqhhae, 13 Kaol geeqlongq meeq e panlwangl tyulmael'ae doqdeelzaeq, xilmael laoq aedeeteel e heeq e Momil, kaol jiulzuq Yesu Jidu e rongqyaol mael mol du'lal mael ngeelvae. 14 Yoqhhaeq aedeeteel gae'lye aeqyoyoq yaol beiqgae hhei, aedeeteel yaol golsiq onglci ae'lye suq duhoq laqngeel lye hhae, kaol aedeeteel yaol zonglshol laeq laol, yoqhhaeq aeqyoyoq lye saelpodu hhei e cholyaeq bi geiq laq, kaol laqheiqqyel lye meeq e mael zongl maoqhhae. 15 Nol xihael geegaeq maoqhhae, gilzuqmyel laqtaq maellye cholyaeqhael'ae geemyeq biq, gaezaeq gil biq; kaol cholyaeqhael noq'ae maeq fu'qiq'ongl yae lye haeq bi zongl.