Tiqdo Su
Meeqlaeqmaeq lye naelhaeq
1
Ngael Baoqloq laoq Momil e yaqhacheqzaq e cholyaeq, kaol Yesu Jidu e shiqtuq geiq mael laoq, Momil lye saelpodu hhei e cholyaeqhael'ae xinlxin bi za, zhen'liq bi loq, xinlyangq meeq, 2 Kaol haeqfu eiq zadeel e aeqyil mael'ae bi loq maoqlye lil; haeqfu eiq zadeel e aeqyil xilmael laoq, zaqgiq maqgiq e Momil mqdongq milbei maeq bei fu ae'lye biq laqngeel lye gee gol wae. 3 Ngeelfeiq, yaeqmeel Momil e naohaeq keellael wae, kaol aedeeteel fuqyin geegaeq duyil ae'lye, Momil e saeziq mael bi mol du'lal wae. Geegaeq duyil e zeqrenl xilmael laoq, aedeeteel e jiulzuq Momil e minllinl laoqmyel ngaeq'ae toqshiq hhei laeq hhae. 4 Ngael Tiqdo'ae xinl cu biq, yoqhhaeq laoq qiqsheel e xinlyangq taq'ae ngaeq e aeqdilmyel yaqyo geiq e tyutaeq ngeelvae. Enhuil kaol neesaelhhae mael, Aeqdae Momil kaol aedeeteel e jiulzuq Yesu Jidu ae'lye noq'ae yo'li biq lye nyuqlil.Tiqdo Kelliqtel vae mul e mulhhael mael
5 Yilkaefu, ngael noq yaol Kelliqtel daoq vae bi zholdeelsaeq mael laoq, maeq zonglbyel mael noq'ae bi zonglbyel maoqlye lil, kaol ngael noq'ae moqheilheil biq laoqmyel haeqvae lael'ee myel milmae heeqmyel vae, zhangqlaoq hha geiq e cholyaeq bi saelpodu hhei maoqlye kaollil. 6 Zhangqlaoq hha geiq e cholyaeqhael laoq xilnye ngeel maoqhhae: Qiqgiq geehhael maqza myel, haeqmiq qiq hhaeq e haqyo maoq maq geiq, yaeqmiq yaqyohael Hhaoqsongl'ae xiangxinl, cholyaeq qiq hhaeq eiq yoqhhaeteel'ae aeqchee zongl goq laol aeqchee zongl kaol maeq bi guanq nae'ae lye maeq konglgaol biq e cholyaeqhael ngeelvae. 7 Mulhhael fu'qyezaq e cholyaeq laoq Momil e guanqja'ae, kaol xilnye ngeel maoqhhae: Yoqhhaeteel laoq qiqgiq geehhael maqza, maeq guqhenq, maeq dilholzaeq kiq, zilbaeq maeq hhaol, cholyaeq'ae maeq diq, kaol maeqmeeqmyel zonglzaeq laeq e dyuqbaq mael'ae teel eiq maq mulgoq; 8 Ngeelfeiq, daeqxi'ae zhee sheeqcaq nae, neemae eiq meeq, aeqyoyoq'ae guanq meeq ongl, zaqgiq maqgiq, senljyeq kaol aeqyoyoq'ae zongltyeqzaeq ongl, 9 Kaol hael geemyeq e aeqdilmyel xiangxinl hhaeq kael e yo'liq mael'ae xiangxinl gaeyil maoqhhae, xilnye laol, yoqhhaeq hoq e yo'liq maellye cholyaeqhael'ae hhae geemyeq biq wae, kaol deiqgae hoqlael e cholyaeqhael yaol gee yinqzaeq biq.
10 Haelnaeqmyel cholyaeq laoq maeq bi guanq nae'ae, gee dyul maoq maeq zongl, kaol cholyaeq'ae zaqgiqgiq biq hhae; yeqgae gui'liq zongl gol e cholyaeqhael hhael jyeq wae siq. 11 Yoqhhaeteel maeqmeeq e dyuqbaq gae'lye, ochoq'ae maeq hhae geemyeq mael geemyeq biq, ochoq toq yaol qiq haoq myel sheeqmyeq ba biq, kaol nol yoqhhaeteel e myeqbongq mael deiqchiq biq maoqhhae. 12 Kelliqtel tyuqvae milcaeq e xianzhi qiq hhaeq gee gol: "Kelliqtel e cholyaeqhael laoq duqlye zaqgiqgiq hhae, sheqpyeq zilvuqlye e jyeqyaeq'ae, zaeq maoqlaol qiqgiq maeq mulzaeqnaol'ae." 13 Zoqzenl e xilmael laoq aeqdilmyel hhae. Xilmael gae'lye, nol yoqhhaeteel'ae aeqlyeq teel eiq maeq lyeq myel gaezaeq biq maoqhhae, kaol yoqhhaeteel'ae xinlyangq taq'ae qiqgiq geehhael maeq bi za. 14 Kaol Yoqtail cholyaeqhael e yiqzenlmyel gee mael, kaol zhen'liq mael maq mul nae e cholyaeqhael e minllinl mael'ae haeq naelhaeq. 15 Shol e cholyaeq'ae lye gee'li'laol gilzuqmyel shol hhae; ngeelfeiq, maeqshol hael kaol maeq xiangxinl e cholyaeq'ae lye gee'li'laol shol e qiqgiq maqza'ae, yoqhhaeteel nyuq mael kaol liangqxin mael dyel'eiq maeqshol'ae. 16 Yoqhhaeteel laoq Momil yaol siqcongl lil lye gee, ngeelfeiq, xinqweiq mael taq'ae laoq yoqhhaeq yaol maeq siqcongl e cholyaeq laoqmyel hhae. Yoqhhaeteel laoq xinqlalmyel hhae, Momil e saeziq mael maeq naelhaeq'ae, kaol meeq e qiqgiq maeq zongl du hhei kiq'ae.