4
Ngael Momil e yiqsi'ae, aeqgael choldyeq'ae kaol cholsil'ae shenqpanl maoqlye e Jidu Yesu e yiqsi vae, yoqhhaeq e mol du'lal mael kaol yoqhhaeq e goqja gae'lye, aeqlyeq maeq lyeq myel noq'ae moqheilheil laeqngeel: 2 Aeqdilmyel Momil e saeziq mael geegaeq duyil maoqhhae; naohaeq zae'li kiq, maeq zae'li kiq feiq, duqlye neemae qiqsiqmyel zongl maoqhhae, kaol renqnail zhee za, kaol geemyeq maellye cholyaeq'ae gaezaeq, cholyaeq'ae jinqgaol biq kaol cholyaeq'ae geemyeq biq. 3 Naohaeq keellael goqbiq vae, tyuqfu, cholyaeqhael hoq e geemyeq mael'ae hol biq, naeqbol bolzhezhe biq, kaol yiqzenlmyel laoqsi zhee bi naeqlael, 4 Kaol naeqbol deiqchiq hheikaol zhen'liq maeq naelhaeq, kaol zenljul maqza myel e gee gaeyi e saeziq boq'ae polyil. 5 Nol laoq, aeqchee zongl mael eiq aeqyae'lye kei, shelkuq mael'ae zityeq, kaol fuqyin geegaeq e mulhhael mul, kaol nol zongl maoq mael zonglbyel maoqhhae.6 Ngael laoq xeiheel e zilbaeq laoqmyel lil, kaol xeiheel da laq wae, kaol sil lael naohaeq keellael wae. 7 Meeq e daqzhangl tyulmael ngael diq gol wae, ki maoq e gaelmae mael ngael ki byel wae, xiangxinl maoq mael ngael xiangxinl gaeyi wae. 8 Saeq ae'lye aeqnaol laoq, gongyil e zongmae vuqcongq mael ngaeq'ae taeq deelhhei laeq maoqlye hhae, vuqcongq tyulmael laoq, gongyil maellye shenqpanl e Hhaoqsongl, tyuqfu qiq nao ngaeq'ae biq laqngeel lye mael ngeelvae; ngaeq'ae biq laq dyul maeqcil, yoqhhaeq yaol zhee bi mol du'lal goq e haelzhol cholyaeqhael vae eiq biq biq maoqlye hhae.
Aeqnaol naolli e moqheilheil mael
9 Nol nae'naemyel ngaeq e saeqvae lael maoqhhae. 10 Diqmaq yaeqmeel e shilgail mael zhee hhaol biq, kaol ngaeq ae'lye deelsae laeq vae, kaol Tyeqsa'loqniqja'ae yil vae; Geqlelshil laoq Ja'latail'ae yil vae; Tiqdo laoq Talmaqtail'ae yil vae; 11 Ngaeq'ae saeqvae Lulja maoq maeq zhol'ae. Nol lael fu Maqkeq yaol bael sheeqlaeq, yoqhhaeq fuqsil mael taq'ae ngaeq'ae meeqyo'lael kiq kaol'ae. 12 Ngaeq lye Tuijiguq yaol Yiqfuqsoq vae yil lye moqheilheil du hhei wae. 13 Ngaeq lye Telloqyal vae Jabul zael'ae heildeelsaeq e aelhongq poljye tyu qiq koq, nol lael fu bael heil laeq, suqhhaq tyuhael eiq heil laeq, aqciq saeqgeel suqhhaq tyu qiqniq lu nyeq'ei hhael heil laeq maoqhhae. 14 Geeqsheel laqkiq Yallilshandal ngaeq'ae zonglkyuq laeq hhae; Hhaoqsongl yoqhhaeq zongl mael gae'lye yoqhhaeq'ae chenqfaq biq. 15 Nol eiq yoqhhaeq'ae fu'qyedeelzaeq hhei maoqhhae, yoqhhaeq aedeeteel e saeziq mael'ae guaeq'ei diqqye kaol'ae. 16 Ngael laefuq fuqli qiq pu aeqyoyoq gae'lye saeziq geezaeqhoq fu, qiq hhaeq eiq maeq baelzongl lael laeq'ae, gilzuqmyel ngaeq ae'lye deelsae byel laeq, golsiq xilmael yoqhhaeteel'ae haeq yo'li biq lye nyuqlil. 17 Ngeelfeiq, ngaeq e dongqpyeq vae Hhaoqsongl haoqtul deelhhei'ae, kaol ngaeq'ae aqha biq laq, kaol ngaeq'ae fuqyin mael gilzuqmyel bi geegaeq duyil ongl laeq, kaol haelzhol e baeqjyelboq minqcuq e cholyaeqhael'ae hhae bi gaeq; ngaeq yaol eiq shiziq e myeqbongq ae'lye jiul duhoq yi laq. 18 Hhaoqsongl lye ngaeq yaol gilzuqmyel duqlaq myel ae'lye jiul du hhei laq'ae, kaol ngaeq'ae yoqhhaeq e Mqmae Goqja vae bi do'li laqngeel lye eiq jiul laeq. Rongqyaol mael haeqfu keellye yoqhhaeq'ae biq biq lye nyuqlil. Amen!
Meeqlaeqmaeq lye naelhaeq mael kaol geeqlongq biq mael
19 Baiqji'la, Yalju'la kaol A'niqselfuq toq e cholyaeqhael'ae meeqlaeqmaeq lye bael naelhaeq hhei biq. 20 Yiqladu laoq Ge'linqdo vae zholdeelsaeq vae. Telloqfeimoq laoq nael biq hhae, kaol ngaeq lye yoqhhaeq yaol Miqlildu vae bi zholdeelsaeq wae. 21 Nol aqga baehae keellael laefuq'ae, nae'naemyel ngaeq'ae saeqvae keellael maoqhhae. Yoqbulloq, Bultinq, Lilnuq, Geqlaoqdiqyal kaol aqsseq aeqnilhael gilzuqmyel noq'ae meeqlaeqmaeq lye naelhaeq'ae. 22 Hhaoqsongl noq e yohael nyegael baelzhol biq lye nyuqlil. Enhuil mael noteel nyegael baelzhol biq lye nyuqlil.