Milcaeq taq e aeqnaol naolli fu cholyaeq e neemae mael
3
Nol loq maoqhhae, aeqnaol naolli naohaeq'ae maq gol sael myel e naohaeq keellael maoqlye hhae. 2 Tyuqfu, cholyaeqhael aeqyoyoq'ae maoq maeq gaeq zaeq, dyuqbaq mael'ae neemae zhee gaesil, aeqyoyoq'ae hodazaq, dilqeizaeq, geekyuq, aeqdae aeqmae e saeziq maeq naelhaeq, meeqyaevae lye maqza kiq, neemae maeq senljyeq, 3 Aeqyotoq e cholyaeq'ae maeq gaeq, ochoq nyegael maeq maoqhoqli nae, ochoq'ae buqzaq mael hhaol biq, aeqyoyoq'ae maeq zongltyeqzaeq ongl, piqqil mael miqxil dilci laoqmyel, meeq mael'ae laoq maeq hhaol, 4 Hhaoqsongl kaol yelchoq'ae neemae xyelpupu, haelmillye zongl goq laol haelmillye zongl, dilqeizaeq, nyelhhae mael hhaol, Momil'ae maeq gaeq, 5 Fu hhei'laol neemae qiqsiqmyel Momil'ae cho'lyeq e yanglziq za, ngeelfeiq, xinlyangq meeq e onglzaeq mael deiqtael, xilnye cholyaeqhael'ae nol deeltael maoqhhae. 6 Yoqhhaeteel onglci e qiq miq laoq ochoq toq'ae haoq ki do'li, kaol qiqgiq maeq loq e cholhae aeqmaehael'ae aeqchee lye gee biq laol aeqchee lye bi zongl yil; kaol cholhae aeqmae xihael'ae golsiq lye bi yaqtyeq hhei, kaol maeq qiqsheel e aeqyoyoq zhee mulgoq e nyuq mael lye bi cheeqmu hhei, 7 Cholhae aeqmae tyuhael duqlye xoqxiq feiq, zhen'liq zhee siqcongl wae lye maeq zonglkeel ongl biq wae siq. 8 Yilkaefu, Yaqniq kaol Yangqbiq laoq Moxi'ae haelmillye diqqye biq laol, cholyaeq xihael eiq zhen'liq mael'ae haelmillye diqqye hhae; yoqhhaeteel e neemae ba yil hhei, kaol xinlyangq mael'ae shilfu biq fu maeq xiangxinl gaeyil ongl'ae. 9 Ngeelfeiq, yoqhhaeteel xilnye maeq hhae zongl gaeyil wae, yoqhhaeteel e yaeqzhoqzhoq mael, cholyaeqhael e yiqsi'ae aeqdilmyel mol du'lal maoqlye mael, tyu niq nulhhaeq laoqmyel kaol'ae.Tiqmoqtail'ae aeqnaol naolli qiq pu tyuqmyeq biq mael
10 Ngeelfeiq, nol laoq ngaeq e geemyeq mael, xinqweiq mael, zonglkeel maoqlye nyuq mael, xinlxin mael, neemaekuan mael, gaeq e neemae mael, renqnail mael, 11 Kaol ngaeq'ae Antiq'a, Yiqge'nianl kaol Lulsideq vae guaeq'ei diqqye laq mael kaol kuqnanl puqlael laeq mael'ae cho'lyeq vae. Ngael laoq guaeq'ei diqqye laq mael'ae haeldyul dyulmae zityeq wae! Ngeelfeiq, Hhaoqsongl lye ngaeq yaol gilzuqmyel kuqnanl onglci ae'lye jiul du hhei laq vae. 12 Qiqshiq laoq, aeqsul Jidu Yesu onglci vae xinlyangq meeq e naohaeq gol maoqlye nyuqmeeq laol, guaeq'ei hhae bi diqqye hhae. 13 Ngeelfeiq, duqlaq myel zongl e kaol zaqgiqgiq e cholyaeqhael nyeq'ei ta nyeq'ei hhael jyeq tullaeq, kaol cholyaeq'ae cheeqmu biq laol cholyaeq lye bi cheeqmu hhei ngeelvae. 14 Ngeelfeiq, nol laoq, hal xoqxiq mael kaol hael xiangxinl mael zongl gaeyil maoqhhae; nol laoq aeqsul ae'lye xoq hhei lil lye loq'ae, 15 Kaol mildi'lye fu ae'lye Momil e Suqhhaq mael loq'ae lye eiq loq kaol'ae. Momil e Suqhhaq xilmael laoq noq'ae Jidu Yesu onglci'ae lye, xiangxinl gae'lye deqjiul e geel mael bi za laq hhae. 16 Momil e Suqhhaq mael gilzuqmyel Momil lye cholyaeq'ae ganqdongl hhei biq kaol cu du hhei hhae; Suqhhaq xilmael laoq geemyeq mael, zonglba e cholyaeq'ae gaezaeq biq mael, cholyaeq yaol maeqmeeq boq ae'lye meeq boq'ae bi polhoqlael mael, kaol cholyaeq'ae gongyil mael xoqxiq lye geemyeq mael'ae meeqyo'li kiq hhae, 17 Xilnye laol, Momil e cholyaeqhael laoq, maeq qiqsheel e meeq e silqinq mael zongl yil maoq vae lye haelmeeqlye paeqgaelsael meeq deel byel wae.