Noteel cholyaeq'ae saeqsaeldye'lye za biq maoqhhae
2
Ngaeq e aqsseq aeqnilhael o, noteel laoq rongqyaol e Hhaoqsongl Yesu Jidu'ae xinlxin za laol, aeqchee zongl mael eiq cholyaeq e nildu ae'lye maeq hhae fu'ae. 2 Cholyaeq qiq hhaeq pulsheel e nyulbaeq doq hhei, fulchiq aelhongq zhigaqlye dum hhei myel noteel e huiltangq vae do'lal; saeqyaeq qiq hhaeq laoq fulchiq aelhongq suheiqlye dum hhei, yoqhhaeq eiq noteel e huiltangq vae do'lal kaollaoq, 3 Noteel laoq fulchiq aelhongq zhigaqlye dum hhei e qiq hhaeq'ae fuyo biq, kaol "saeqvae hhael meeq e zholhhael mael'ae zholgae hhei" lye gee biq. Saeqyaeq qiq hhaeq'ae gee biq: "Nol tyuqvae haoqtul deelhhei." Paelsilmyel gee biq: "Ngaeq e aeqkeel baqda e toqmoq e dongqpyeq'ae zholgae hhei". 4 Xilmael laoq, noteel cholyaeq'ae saeqsaeldye'lye maqza biq, kaol duqlaq nyuq e shenqpanl e zhiqmoq peqyil vae maeqngeel maeq?5 Ngael gaeq e aqsseq aeqnilhael o, naelhaeq gil: Momil lye milcaeq taq e saeqyaeqhael yaol saelpodu hhei maeqngeel maeq? Ngeelfeiq, cholyaeq xihael xinlxin taq'ae aeqchee eiq zacongl'ae, kaol cholyaeq xihael laoq Momil e Goqja hhamul e cholyaeq'ae. Momil e Goqja xilmael laoq yoqhhaeq'ae gaeq e cholyaeq'ae biq biq maoqlye gee gol hhae. 6 Ngeelfeiq, noteel saeqyaeqhael'ae geekyuq biq. Noteel'ae zongltyeq laeq, kaol noteel yaol zhiqmoqkae myel'ae ee'li laeq hael laoq yoha hael maeqngeel maeq? 7 Noq e Hhaoqsongl'aea geekyuq e cholyaeqhael laoq yoqhhaeteel maeqngeel maeq?
8 Momil e Suqhhaq taq'ae cu deelhhei: "Dongqpyeq e cholyaeq'ae gaeq biq mael aeqyoyoq'ae gaeqzaeqhoq laoqmyel ngeel maoqhhae." Noteel laoq zongmae e lilfaq xilmael zongl yil kaollaoq, noteel zongl mael laoq zhee meeq wae. 9 Noteel aeqchee zongl mael eiq cholyaeq e nildu ae'lye fu kaollaoq, golsiq zonglpizaeq wae, kaol lilfaq mael noteel laoq, lilfaq laoqmyel maeq zongl e cholyaeq'ae lye gee laeq wae. 10 Gilzuqmyel lilfaq mael zongl gaeyil e cholyaeq laoq, qiq mal zonglba hhei'laol, gilzuqmyel zonglba vae kaol'ae. 11 "Ochoq nyegael neemae maq hha ba'ae" lye gee e tyutaeq "cholyaeq maq hha xyeq'ae" lye eiq gee'ae; nol ochoq nyegael neemae maq ba feiq, cholyaeq xyeq laol, lilfaq laoqmyel maeq zongl yil e cholyaeq ngeelvae. 12 Noteel vae cholyaeq yaol bi zilyoq e lilfaq maellye hhae bi shenqpanl laol, noteel gee kaol zongl mael lilfaq laoqmyel ngeel maoqhhae. 13 Ochoq'ae hhaoqsaeq maeq saeq biq e cholyaeq laoq, Momil yoqhhaeq'ae hhaoqsaeq maeq saeq myel shenqpanl biq maoqlye hhae; hhaoqsaeqsaeq mael shenqpanl mael'ae jyeqli wae.
Xinlxin kaol xinqweiq
14 Ngaeq e aqsseq aeqnilhael o, qiqhhaeq laelhhaeq aeqyoyoq xinlxin za lil lye gee, ngeelfeiq, xinqweiq maqza kaollaoq, aeqchee meeqyo'lael kiq maeq? Xinlxin xilmael yoqhhaeq'ae jiul ongl maeq? 15 Aqsseq aeqnilhael, paelsilmyel aelbae aeqnilhael'ae dum e fulchiq aelhongq maqza biq, kaol qiq nao qiq nao zaeq e zaeqzael maeq lo biq kaollaoq; 16 Noteel onglci e cholyaeq yoqhhaeteel'ae gee biq: "Neesaelhhae'lye yil oq! Noteel'ae hulm'qye'lye hhae dum biq, hhae zaeqdye biq lye nyuqlil." Ngeelfeiq, yoqhhaeteel'ae aeqhhaol'ae hal mulyo mael maeq heil hhei biq, xilmael laoq aeqchee meeqyo'lael kiq maeq? 17 Xinlxin eiq xilnye ngeelvae, xinqweiq maqza kaollaoq, xinlxin xilmael aeqyoyoq laoq sil aeqmyel hhae.
18 Ngeelfeiq, xilnye gee e cholyaeq zhol'ae, noq'ae xinlxin za, ngaeq'ae xinqweiq za; kaol noq e xinqweiq maqza e xinlxin mael ngaeq'ae bi fu hhei laeq, kaol ngael ngaeq e xinqweiq ae'lye ngaeq e xinlxin mael noq'ae bi fu laeqngeel. 19 Nol laoq Momil qiq hhaeq maoq maeq zhol'ae lye xiangxinl'ae, nol xiangxinl mael laoq hoq'ae; niqhaeq haeqmae eiq xiangxinl'ae, ngeelfeiq, saeqzuq gu zuq aeqmyel gu biq hhae. 20 Yaeqzhoqzhoq e cholyaeqhael o, noteel xinqweiq maqza e xinlxin mael qiqgiq boq'ae maeqyo'ae lye maeq loq gil laeq hhaemaeq? 21 Aedeeteel e aeqpyuq aeqdae Yalboqlahanl, yoqhhaeq e yaqyo Yiqsaq yaol jiltanq taq'ae heelda hhei fu, xinqweiq gae'lye gongyil e cholyaeq'ae lye gul biq maeqngeel maeq? 22 Nol fu, yoqhhaeq e xinlxin mael kaol xinqweiq mael qiqsheel'ae, kaol xinlxin mael xinqweiq gae'lye qiqgiq geehhael maqza vae; 23 Xilmael Momil e Suqhhaq taq'ae gee laoqmyel peqlal: "Yalboqlahanl Momil'ae xiangxinl gae'lye, yoqhhaeq vae gongyil e cholyaeq'ae lye suanl biq hhae." Kaol yoqhhaeq'ae Momil e yelchoq lye eiq gul biq'ae. 24 Xilnye fu hhei'laol, cholyaeqhael vae gongyil e cholyaeq'ae lye gul biq mael laoq xinqweiq gae'lye hhae, xinlxin mael oqlye maeqngeel'ae. 25 Qiqsheel ngeelvae, jilnyuq Laheq laoq moqheilheil duyil e cholyaeqhael'ae sheeqcaq biq, kaol baeqjyelboq e gaelmae qiq keel ae'lye yoqhhaeteel yaol sheeq duyil biq hhae, kaol xinqweiq gae'lye gongyil e cholyaeq'ae lye gul biq maeqngeel maeq? 26 Tyulkaol, aeqhhaol mael yohael maeq zhol laol sil aeqwae, qiqsheel ngeelvae, xinlxin mael xinqweiq maqza kaollaoq sil e ngeelvae.