Myeqhael mael zonglyae biq maoqhhae
3
Ngaeq e aqsseq aeqnilhael o, laoqsi mee'nae hhaeq geiq laol hhaeq vae, ngaeteel laoqsi geiq hael aeqgael hhael bi shenqpanl maoqlye kaol'ae. 2 Aedeeteel laoq haelnaeqmyel silqinq taq'ae zonglba gol'ae, aeqsul saeziq taq'ae maeq geeba gol kaollaoq, yoqhhaeq laoq qiqgiq geehhael maqza e cholyaeq wae, kaol aeqhhaol qiqsiqmyel eiq zongltyeqzaeq hoq ongl'ae. 3 Aedeeteel longqtong mael aeqmaoq e myeqbongq mael'ae taol da hhei biq, kaol aeqmaoq mael zonglyae biq, kaol nol aeqmaoq mael haeqvae bi yil maoqlaol haeqvae bi yil. 4 Hoq mael'ae nyuq fufu gil, hoq mael heeq'ae, zaeqxil xilmae maellye guaeq'ei bo biq feiq, hoq he e qiq hhaeq mildi'lye duol maellye hoq mael haeqvae bi yil maoqlye laol haeqvae kai yil ongl'ae. 5 Qiqsheel ngeelvae, myeqhael laoq aeqhhaol taq e mildi'lye qiq mal'ae, ngeelfeiq, puhenq e saeziq gee kiq hhae. Nyuq fufu gil, miqxil maellye sheeqcongq congqmae mael pezaq ongl hhae. 6 Myeqhael laoq aeqzaeq'ae, aedeeteel e aeqhhaol taq'ae halcuqhael onglci vae, myeqhael laoq duqlaq e shilgail'ae, aeqhhaol qiqsiqmyel maeqshol myel zonglpeq ongl hhae, kaol aeqyil e lunqziq mael keeqdoq hhei ongl hhae, kaol daq'oqlaqmae e aeqzaeq maellye keeqdoq hhei hhae. 7 Haelzhol e jyeqyaeqhael, haeqzilhael, congni e aeqzuqhael kaol eelcuq onglci vae zhol e yodyeq hael, gilzuqmyel zonglyae ongl hhae, kaol cholyaeq lye zonglyae biq aeqwae; 8 Ngeelfeiq, cholyaeqhael aeqyoyoq e myeqhael mael qiq hhaeq eiq maeq zonglyae ongl'ae; hhaeqnaeq maeq naeq e duqlaq e qiqsheel'ae, kaol cholyaeq yaol zonglsil ongl e duq zoq bonggaebyel aeqmyel hhae. 9 Aedeeteel myeqhael maellye aedeeteel e Hhaoqsongl kaol mqmae Aeqdae'ae maeqdaeqhhaeq'ae lye gee biq, myeqhael maellye Momil laoqmyel dul lael aeqmyel zongldu hhei e cholyaeq'ae doqchiq yol gee biq. 10 Maeqdaeqhhaeq'ae lye gee mael, kaol doqchiq mael myeqbongq qiq siq ae'lye geedu hhei hhae; ngaeq e aqsseq aeqnilhael o, xilnye maeq zongl hhaeq'ae! 11 Eelbi qiq bi ae'lye yochilchil kaol yohaeqhaeq e eelcuq yul duyi kiq maeq? 12 Ngaeq e aqsseq aeqnilhael o, siqpyu'laq'oq e aelbol mael'ae zhoqcae e aelsiq siq laelkiq maeq? Siqbaq aelbol mael'ae siqpyu'laq'oq e aelsiq siq laelkiq maeq? Kaol caqdeq haeq e eelbi ae'lye yochilchil e eelcuq maeq yul duyi kiq'ae.Mqmae ae'lye lael e geel mael
13 Noteel onglci'ae aeqsul laoq geel eiq geel kaol suqhhaq eiq loq hhaemaeq? Yoqhhaeq laoq geel e naoqyae'lye maellye aeqyoyoq e meeq e zongl mael bi mol du'lal maoqhhae. 14 Noteel e neemae onglci'ae duqlaq e heiqcilnael kaol aeqyoyoq'ae maoq maeq nyuqzaeq kaollaoq, haq hodazaq, kaol zaqgiq maellye zhen'liq mael'ae haeq diqqye. 15 Geel e xilmael mqmae ae'lye lael maeqngeel'ae, milcaeq taq hhae, saqdol lal aeqmyel mulgoq tyulmael hhae, kaol niqhaeq haeqmae hhae. 16 Heiqcilnael mael kaol aeqyoyoq'ae maoq maeq nyuqzaeq mael haeqvae za laol, aeqvuqlaelvuqmyel mael kaol duqlaq myel mael tyuqvae za hhae. 17 Ngeelfeiq, mqmae ae'lye lael e geel mael, hhal mulyo mael laoq shol hhae, aeqnaol hhal mulyo mael laoq hoqpinq, naoqyae'lye, maeq dilqeizaeq, hhaoqsaeqsaeq kaol aelsiq yomeeq bong'lye za'ae, saeqsaeldye, gee kaol zongl mael maeq qiqsheel mael maqza'ae. 18 Cholyaeq yaol bi hoqpinq e cholyaeq laoq hoqpinq mael kae do hhei, kaol gongyil e aelsiq yomeeq siq du'lal vae.