Shilgail nyegael yelchoq haq geiq
4
Noteel onglci'ae deiqgae gil kaol tyelgae gil mael haeqvae lye lael hhaemaeq? Noteel onglci'ae zonglgae gil e aeqyoyoq zhee mulgoq e nyuq mael lye lael maeqngeel maeq? 2 Noteel aeqchee eiq mulgoq, maq hhamul biq laol cholyaeq xyeq; noteel heiqcilnael, qiqgiq eiq maeq hhamul biq laol, deiqgae tyelgae gil. Noteel maq hhamul mael laoq, noteel maeq geezaeq kaol'ae; 3 Noteel geezaeq feiq maq hhamul mael laoq, noteel yiqzenlmyel geezaeq, kaol hhae'lael mael noteel e nyelhhae goq mael'ae zongl do byel maoqlye kaol'ae. 4 Ochoq nyegael neemaeba e cholyaeqhael o, noteel laoq shilgail nyegael yelchoq geiq laol, Momil nyegael diqrenq geiq hhae lye maeq loq gil laeq hhaemaeq? Tyulkaol, shilgail nyegael yelchoq geiq laol, Momil e diqrenq peqyil wae. 5 Momil e Suqhhaq taq'ae gee: "Momil laoq yoqhhaeq lye aedeeteel onglci vae heil do hhei e yohael mael'ae gaeq biq, gaeq mael heiqcilnael dyul keelli aeqwae." Noteel lye kei laol saeziq xilmael alngeiqmyel gee hhae lye kei laeq hhaemaeq? 6 Ngeelfeiq, Momil hhael naeq myel e endianq biq laq; tyulkaol, Momil e Suqhhaq taq'ae gee: "Momil dilqeizaeq e cholyaeq'ae diqqye hhae, maeq dilqeizaeq e cholyaeq'ae laoq meeq biq." 7 Tyulkaol, noteel Momil e saeziq mael naelhaeq maoqhhae, kaol niqhaeq haeqmae'ae diqqye maoqhhae, xilnye laol, niqhaeq haeqmae noteel ae'lye kisae vae. 8 Noteel Momil'ae deelniq laol Momil eiq noteel'ae deelniq laeq'ae. Golsiq za e cholyaeqhael o, noteel e aqlaq mael zonglshol maoqhhae; neemae qiqsiqmyel maeq zongl e cholyaeqhael o, noteel e neemae mael zonglshol maoqhhae. 9 Noteel hhae saeq, hhae nyuqsaeq, hhae nyul hhae, kaol eelxul mael nyuqsaeq peqlal, hhaol mael neemae maeq bae myel peqlal. 10 Noteel Hhaoqsongl e yiqsi'ae hhael nil lil lye qiq hhaeq geiq maoqhhae, kaol yoqhhaeq noteel'ae hhael gao myel vae deiqda hhei laq'ae.Qiqhhaeq qiqhhaeq'ae maeq hhae panlduanl'ae
11 Aqsseq aeqnilhael, noteel qiqhhaeq qiqhhaeq'ae maeq hhae panlduanl'ae; cholyaeq aqsseq aeqnilhael'ae panlduanl, paelsilmyel maeqmeeqmyel gee kaollaoq, lilfaq mael'ae panlduanl ngeelvae. Nol lilfaq mael'ae panlduanl kaollaoq, lilfaq mael laoqmyel zongl yil e cholyaeq maeqngeel wae, shenqpanl e zhiqmoq wae. 12 Lilfaq gee deelhhei e qiq hhaeq kaol shenqpanl e qiq hhaeq laoq qiq hhaeq wae, tyutaeq laoq cholyaeq yaol jiul ongl, kaol cholyaeq yaol eiq zonglmye ongl e Momil ngeelvae; nol laoq dongqpyeq e cholyaeq'ae panlduanl e cholyaeq, nol aeqsul lil lye kei laeq hhaemaeq?
Aeqyoyoq'ae maq hodazaq hhaeq'ae
13 Noteel gee: "Yaeqnao paelsilmyel naeshoq, ngaeteel milmae heeqmyel tyuqvae yil maoq, kaol tyuqvae qiq hoq zhol, tyuqvae senyil mulzaeq kaol dyuqbaq zonglzaeq maoq." 14 Qiqshiq laoq, naeshoq haelmillye hhae lye noteel maeq loq'ae. Noteel e aeqyil mael haelmillye hhaemaeq? Noteel laoq zhiqhaoq laoqmyel, qiqlaq mol du'lal laol buyil hhei wae. 15 Noteel xilnye gee maoqhhae: "Hhaoqsongl hhaeq lil lye kaollaoq, ngaeteel laoq hha dyeqdeel'ae, kaol silqinq xilmael yulmael myel hhae zongl wae." 16 Ngeelfeiq, yaeqmeel noteel dilqeizaeq kaol hodazaq, hodazaq e xihael laoq duqlaq hhae. 17 Tyulkaol, cholyaeq meeq mael zongl maoqhhae lye loq feiq, maeq zongl yil kaollaoq, xilmael laoq yoqhhaeq e golsiq mael ngeelvae.