Zacongl e cholyaeqhael'ae jinqgaol biq
5
Noteel zacongl hael o, noteel laoq aeqgael noteel'ae zai'nanl yo'lael maoqlye e gae'lye hhae nyul, kaol nyul sil maoqmyel hhae nyul hhae. 2 Noteel e jadanglhael buq ga maoqlye hhae, kaol noteel e aelhongq mael aeqyiq lye meqzaq maoqlye hhae, 3 Noteel e pulziq pulsheel mael sulmkiq zaeq li vae, kaol sulmkiq mael noteel'ae zhiqmoqkae e zenljul peqlal, kaol doq e aeqzaeq maellye noteel e saeqzil mael meqdo hhei laoqmyel hhae. Noteel laoq aeqnaol naolli naohaeq'ae dyuqbaq taeqdeelzaeq gil wae siq. 4 Naelhaeq gil, aeqhael mulyaeq noteel'ae zaelsiq bael heille biq, noteel yoqhhaeteel e mulhhael hhaeqpyuq mael baelyaelmyel teel keelzaeq biq, kaol mulhhael hhaeqpyuq tyulmael yoqhhaeteel'ae bael gul bonggaebyel biq; kaol zaelsiq heillezaq e cholyaeqhael gul mael, mqmae e junduilhael e Hhaoqsongl e naeqbol'ae gaeq keelli wae. 5 Noteel milcaeq taq'ae hael zaeq maoq myel zaeq, hael nyelhhae maoq myel nyelhhae, kaol xyeq biq maoqlye e naohaeq keellael goqbiq fu eiq aeqyoyoq yaol cu cul zaeq aeqwae siq. 6 Noteel lye gongyil e cholyaeq'ae golsiq baqcheeq hhei biq kaol xyeqsil biq, ngeelfeiq, yoqhhaeq noteel'ae maeq zonglhoq biq'ae.Renqnail za e cholyaeq laoq geeqlongq meeq vae
7 Tyulkaol, aqsseq aeqnilhael o, naelhaeq gil, noteel Hhaoqsongl lael fu keellye, renqnail za maoqhhae, aeqhael mulyaeq aeqhael ae'lye meeq e zaelsiq bi du'lal maoqlyekaol neemaegil lye vuq'yel doqdeelzaeq hhei laoqmyel ngeel maoqhhae. 8 Kaol noteel eiq renqnail za maoqhhae, kaol aeqyoyoq e neemae mael sseetae'lye ngeel maoqhhae; Hhaoqsongl lael e naohaeq niq vae kaol'ae. 9 Aqsseq aeqnilhael o, noteel qiqhhaeq qiqhhaeq'ae haq buqzaq gil, aeqgael noteel'ae shenqpanl lael maeqhe. Naelhaeq gil, shenqpanl e Hhaoqsongl oheiq vae haoqtul deelhhei wae. 10 Aqsseq aeqnilhael o, noteel laoq Hhaoqsongl e cholmil maellye saeziq gee e xianzhihael laoqmyel ngeel maoqhhae, yoqhhaeteel laoq shelkuq ongl, renqnail za hhae. 11 Naelhaeq gil, renqnail za e cholyaeq tyuhael'ae, aedeeteel yoqhhaeteel'ae geeqlongq meeq e cholyaeq'ae lye gul biq; noteel Yoboq e renqnail mael gaeq gol'ae, kaol Hhaoqsongl yoqhhaeq'ae heil biq jyeqjuq mael eiq mol vae, kaol Hhaoqsongl vae hhaoqsaeqsaeq kiq kaol meeq kiq mael bong'lye za'ae lye loq wae. 12 Ngaeq e aqsseq aeqnilhael o, hhal mulyo mael laoq faqsil maeq hhae kei'ae; mqmae'ae tyuq deelhhei kaol faqsil maeq hhae kei'ae, milcaeq'ae tyuq deelhhei kaol eiq faqsil maeq hhae kei'ae, qiqgiq maellye eiq maeq hhae faqsil'ae. Noteel e saeziq mael, ngeel mael laoq ngeel'ae lye gee, maeqngeel mael laoq maeqngeel'ae lye gee maoqhhae; aeqgael shenqpanl holhhaq'ae leeqdo laqngeel.
Gongyil e cholyaeq gee e heeldoq mael laoq aqhabo hhae
13 Noteel onglci e aeqsul saeq laol, yoqhhaeq heeldoq gee maoqhhae. Aeqsul hhaol laol, yoqhhaeq changlgo changl maoqhhae. 14 Noteel onglci e aeqsul nael biq laol, yoqhhaeq jiaolhuil e zhangqlaoqhael yaol gul laeq, kaol yoqhhaeteel yaol Hhaoqsongl e cholmil maellye, yoqhhaeq'ae cil soda hheikaol heeldoq bi bael gee. 15 Xinlxin za lye heeldoq gee laol, cholnael meeqhoqlael kiq'ae, kaol Hhaoqsongl yoqhhaeq yaol bi tullael; yoqhhaeq golsiq zonglpizaeq kaol'eiq shelmianq biq'ae. 16 Tyulkaol, noteel qiqhhaeq qiqhhaeq'ae golsiq za yae lye cenqrenl maoqhhae, kaol qiqhhaeq qiqhhaeq'ae heeldoq bael gee biq, xilnye laol, noteel laoq meeqsholyil wae. Gongyil e cholyaeq e heeldoq e aqha mael laoq zoqyongl zhee qiq hhae. 17 Yiqlilyal laoq aedeeteel laoqmyel e cholyaeq'ae; yoqhhaeq neemae qiqsiqmyel vuq'yel haeq yel lye heeldoq gee laol, milcaeq taq'ae vuq'yel maeq yel myel sul hoq pa zoq vae; 18 Yoqhhaeq heeldoq yol gee laol, mqmae ae'lye vuq'yel'yel gae hhei vae, kaol milcaeq vae zaelsiq dyeq du'lal vae.
19 Ngaeq e aqsseq aeqnilhael o, noteel onglci e qiq hhaeq zhen'liq ae'lye deelbael hhei kaollaoq, yoqhhaeq yaol bi polhoqlael maoqhhae. 20 Noteel loq maoqhhae, golsiq za e cholyaeq yaol deelbael e gaelmae ae'lye bi polhoqlael e tyutaeq laoq, deelbael e tyutaeq e yohael mael sil aeqmyel lye jiul duhoq yi biq, kaol yoqhhaeq e haelnaeqmyel e golsiq mael baqkaeq biq wae.