Yodyeqdyeq e haqlo kaol senljyeq e goqja
2
Tyulkaol, noteel gilzuqmyel duqlaq mael, gilzuqmyel zaqgiqgiq e loqho mael, gee kaol zongl mael maeq qiqsheel mael, heiqcilnael mael, kaol gilzuqmyel geekyuq mael beiqgae maoqhhae. 2 Noteel qiqgiq maq keq myel e yohael e aeqchil mael'ae hhaol mael, caiq bogae hhei e albye laoq aeqchil mael'ae hhaol laoqmyel ngeel maoqhhae, xilnye laol, noteel yoqhhaeq ae'lye heeqda lal, kaol hha deqjiul wae, 3 Noteel laoq Hhaoqsongl haelmillye meeq hhae lye loq vae kaol'ae. 4 Hhaoqsongl'ae niqli maoqhhae, yoqhhaeq laoq yodyeqdyeq e haqlo'ae, cholyaeq lye beiqgae biq, ngeelfeiq, yoqhhaeq laoq Momil lye saelpodu hhei e hhaeqpyuqha e haqlo'ae. 5 Noteel yodyeqdyeq e haqlo geiq laol, yohael hhae lye e heelhaol bi cu du hhei, kaol senljyeq e jilsi peqlal, kaol Yesu Jidu ae'lye Momil hhaol e yohael hhae lye e zaelheel heelda hhei. 6 Momil e Suqhhaq taq'ae gee: "Fu hhei, ngaeq lye saelpodu hhei e,
hhaeqpyuqha e congqciq paeqhhael e haqlo qiq siq,
Xi'an vae heildeel hhei,
kaol yoqhhaeq'ae xiangxinl e cholyaeq laoq,
aeqdilmyel maq saqdol'ae."
7 Tyulkaol, haqlo xilmael laoq Yesu'ae xinlzaeq e cholyaeq'ae laoq hhaeqpyuqha hhae; ngeelfeiq, Yesu'ae maeq xinlzaeq e cholyaeq'ae laoq saeziq geehhael za:
"Laoqhaol cuzaq e cholyaeq lye beiqgae e haqlo mael,
congqciq paeqhhael e hhal mulyo e haqlo peqlal vae."
8 Yol gee:
"Aeqkeel'ae pyetoq e haqlo
kaol cholyaeq'ae bi jye'leeq e haqlo loongl peqyil vae."
Yoqhhaeteel jye'leeq mael laoq saeziq xilmael'ae maeq naelhaeq kaol'ae, xilmael laoq laefuqmyel gee deelhhei hhae. 9 Ngeelfeiq, noteel laoq saelpodu hhei biq e minqcuq'ae, zongmae e jilsi'ae, senljyeq e goqja'ae, Momil hhae lye e cholyaeq'ae; tyulkaol, noteel laoq noteel yaol nahongq vae lye gul du hheikaol maeqdaeqhhaeq e aeqcael onglci'ae sheeq do'li laq e tyutaeq e haelmillye meeq hhae lye mael geegaeq duyil maoqhhae.
10 "Noteel yilkaefu laoq Momil e cholyaeq maeqngeel'ae,
ngeelfeiq, yaeqmeel laoq Momil e cholyaeq peqlal aeqwae;
yilkaefu laoq qiqzael eiq hhaoqsaeq maeq bi saeq gol'ae,
ngeelfeiq, yaeqmeel laoq hhaoqsaeq bi saeq aeqwae."
Momil e yaqhacheqzaq e cholyaeq geiq
11 Ngael gaeq hael o, noteel laoq qiqlaq lye baelzhol lael e baeqjyelboq e cholyaeq'ae, ngael noteel'ae haelmeeqlye gee gil laeqngeel, noteel ruqtiq e saqdol lal aeqmyel mulgoq tyulmael maeq hhae zongl'ae; saqdol lal aeqmyel mulgoq tyulmael laoq yohael nyegael diqgae hhae. 12 Noteel baeqjyelboq minqcuq e cholyaeq onglci'ae yiqzenlmyel maeq zongl hhaeq'ae, xilnye laol, cholyaeq tyuhael noteel duqlaq myel zongl'ae lye geekyuq laeq feiq, noteel e meeq e xinqweiq mael mol gae'lye, Hhaoqsongl lael e naohaeq'ae rongqyaol mael Momil'ae biq hhei biq.
13 Noteel Hhaoqsongl gae'lye cholyaeq lye haelgee deelhhei mael, kaol laqtaq za e zongmae e saeziq mael naelhaeq maoqhhae, 14 Paelsilmyel zongmae lye moqheilheil du hhei e, duqlaqhael'ae laoq chenqfaq biq, kaol meeq e zongl hael'ae laoq hoda biq e zhiqmoq e saeziq mael naelhaeq maoqhhae. 15 Momil e zhiqyil laoq, noteel yaol meeq e zongl maellye, yaeqzhoqzhoq qiqgiq maeq loq e cholyaeq e myeqbongq mael bi deiqchiq maoqlye kaol'ae. 16 Noteel zilyoq hhae, ngeelfeiq, zilyoq ae'lye duqlaq e silqinq mael maeq hhae zonglkaeq hhei'ae, duqlye Momil e yaqhacheqzaq e cholyaeq geiq maoqhhae. 17 Noteel aeqdilmyel cholyaeqhael'ae zunjinl biq maoqhhae; jiaolhuil e aqsseq aeqnilhael'ae gaeq biq maoqhhae; Momil'ae zun eiq zunjinl gu eiq gu biq maoqhhae; zongmae'ae zunjinl biq maoqhhae.
Jidu aedeeteel'ae zonglmyeq laeq mael
18 Noteel yaqhacheqzaq e cholyaeqhael laoq, aeqchee mael taq vae eiq zun eiq zunjinl gu eiq gu e neemae maellye, hhaoqsongl e saeziq mael naelhaeq maoqhhae; neemae meeq, kaol naoqyae'lye tyutaeq e saeziq mael naelhaeq dyul maeqcilmyel, saeqsael maeq dye tyutaeq e saeziq mael eiq naelhaeq maoqhhae. 19 Noteel e liangqxin mael Momil'ae duilqiq'ongl maoqlyekaol maeqngeel maeqngeelmyel baqcheeqlaeq e nyuqsaeq mael'ae zityeq kaollaoq, xilmael laoq hha hoda zaq'ae. 20 Noteel golsiq zonglpizaeq kaol bi diq gae'lye renqnail kaollaoq, aeqchee hoda kael maeq? Ngeelfeiq, noteel meeq e zongl kaol saeq du'laq gae'lye renqnail kaollaoq, xilmael Momil'ae lye fu'li'laol hha bi hoda'ae. 21 Noteel yaol gul du hhei biq mael laoq xilmael gae'lye ngeelvae, Jidu eiq noteel gae'lye saeq du'laq gol, kaol noteel'ae zonglmyeq deelsaeq biq mael laoq, noteel yaol yoqhhaeq deel gol e paeqhhael mael'ae bi cho'lyeq maoqlye kaol'ae.
22 "Yoqhhaeq laoq golsiq maeq zonglpizaeq gol'ae,
myeqbongq ae'lye zaqgiqgiq e loqho eiq maq duyi gol'ae."
23 Yoqhhaeq'ae bi vuq fu qiqgiq lye maeq vuq hoq'ae, hail biq fu hagu e saeziq eiq maeq gee'ae, aeqyoyoq yaol gongyil gae'lael aeqmyel shenqpanl tyutaeq'ae toqshiq hhei biq dyul wae. 24 Yoqhhaeq yaol shiqziljal taq'ae diqcheeq biq, yoqhhaeq aeqyoyoq e aeqhhaol maellye aedeeteel e golsiq mael bael pi laeq vae, kaol aedeeteel'ae golsiq taq'ae bi sil laeq vae laol, gongyil taq'ae bi dyeq laq'ae. Yoqhhaeq'ae alca maellye tyelnael biq e naelheiq gae'lye, noteel yaol zonglmeeq biq vae. 25 Noteel yilkaefu laoq gaelmae deelbael e aqciq laoqmyel hhae, ngeelfeiq, yaeqmeel noteel yaol noteel e yohael mael'ae aqciq hoqzaq e cholyaeq kaol fu'qyezaq e cholyaeq laoqmyel fupol biq e tyutaeq vae sheeqmoq hoq hhei biq vae.