Biqdeq Houlsu
Meeqlaeqmaeq lye naelhaeq
1
Yesu Jidu e yaqhacheqzaq e cholyaeq kaol shiqtuq Ximenq Biqdeq laoq, aedeeteel e Momil kaol jiulzuq Yesu Jidu e gongyil gae'lye, ngaeteel nyegael qiqsheel e pyuqjyeqjyeq e xinlyangq mul e cholyaeqhael'ae xinl cu biq. 2 Enhuil kaol neesaelhhae mael, noteel Momil'ae kaol aedeeteel e Hhaoqsongl Yesu'ae siqcongl gae'lye, haelnaeqmyel noteel'ae biq da hhei biq lye nyuqlil!Gul du hheikaol saelpodu hhei e senltuqhael
3 Momil laoq yoqhhaeq e onglzaeq maellye gilzuqmyel aeqyil, kaol neemae qiqsiqmyel Momil'ae cho'lyeq mael aedeeteel'ae biq hhei laq wae, aedeeteel laoq aeqyoyoq e rongqyaol kaol haelmillye meeq hhae lye maellye aedeeteel yaol saelpodu hhei laq e Momil yaol siqcongl kaol'ae. 4 Tyulkaol, yoqhhaeq lye pyuqjyeqjyeq e kaol zhee heeq e biq laqngeel lye gee mael, aedeeteel'ae biq hhei laq wae, kaol aedeeteel yaol milcaeq taq e saqdol lal aeqmyel mulgoq tyulmael ae'lye lael e ba mael'ae bi kihezaq laq, xilnye laol, noteel laoq Momil e yanglziq mael za wae. 5 Xilmael gae'lye, noteel nyeq'ei hael zonglkeel ongl myel zongl maoqhhae. Xinlxin za vae laol, xilmael taq'ae meeq e xinqweiq za maoq wae siq; meeq e xinqweiq za vae laol, xilmael taq'ae zhishiq za maoq wae siq; 6 Zhishiq za vae laol, xilmael taq'ae aeqyoyoq'ae zongltyeqzaeq ongl mael za maoq wae siq; aeqyoyoq'ae zongltyeqzaeq ongl mael za vae laol, xilmael taq'ae nailxin za maoq wae siq; nailxin za vae laol, xilmael taq'ae neemae qiqsiqmyel Momil'ae cho'lyeq mael za maoq wae siq; 7 Neemae qiqsiqmyel Momil'ae cho'lyeq mael za vae laol, xilmael taq'ae aqsseq aeqnil'ae gaeq biq e neemae za maoq wae siq; aqsseq aeqnil'ae gaeq biq e neemae za vae laol, xilmael taq'ae haelzhol cholyaeq'ae gaeq biq e neemae za maoq wae siq. 8 Noteel xihael za vae laol, xihael taq'ae nyeq'ei ta nyeq'ei hhael zongl meeq hhei kaollaoq, noteel laoq aedeeteel e Hhaoqsongl Jidu'ae loq e silqinq xilmael taq'ae, qiqgiq maeq mulzaeqnaol kaol aelsiq maeq siq du myel maq peqyil kiq wae. 9 Xihael maqza e cholyaeq laoq mabyeq'ae, niqza'lye maoq maeq mol congl, kaol yoqhhaeq e laefuq e golsiq mael zonglshol laeq vae lye yelbael biq aeqwae. 10 Tyulkaol, aqsseq aeqnilhael o, Momil lye noteel yaol gul du hhei biq kaol yoqhhaeq'ae bi cho'lyeq, noteel yaol saelpodu hheikaol yoqhhaeq e cholyaeq bi geiq, tyulkaol, noteel nyeq'ei hael zonglkeel ongl myel zongl maoqhhae. Noteel xihael zonglkeel ongl laol maeq jye'leeq laelkiq wae. 11 Xilnye laol, noteel laoq duqgongqgongqlye za ga'lal aeqmyel, aedeeteel e Hhaoqsongl jiulzuq Yesu Jidu e haeqfu eiq za e goqja vae hha do'li wae.
12 Noteel silqinq xihael loq vae, kaol noteel'ae za vae e zhen'liq taq'ae sseetae'lye feiq, ngael duqlye xihael noteel'ae geetae biq maoq siq. 13 Ngael nyuq laoq, ngael ngaeq e aeqhhaol milcaeq taq e haeqpael haelcul xilmael onglci'ae zhol siq fu, noteel'ae bi nyuq tullaeq maoq, 14 Ngael aedeeteel e Hhaoqsongl Yesu Jidu ngaeq'ae tyuqmyeq laeq laoqmyel, milcaeq taq e haeqpael haelcul xilmael onglci'ae maeq hhae zhol e naohaeq keellael wae lye loq kaollil. 15 Ngael hael zonglkeel ongl myel noteel'ae ngael sil hhei aeqnaol'ae duqlye silqinq xihael bi nyuqdeel ongl maoqhhae.
Jidu e rongqyaol kaol xianzhi e saeziq
16 Yilkaefu, ngaeteel lye aedeeteel e Hhaoqsongl Yesu Jidu e onglzaeq mael, kaol yoqhhaeq zail yi maoqlye mael noteel'ae geegaeq hhei biq mael laoq, zaqgiqgiq e yilsi maqzamyel e guqjin maeqngeel'ae, ngaeteel laoq ma'ne lye yoqhhaeq e rongqyaol mael mol gol e cholyaeq lil. 17 Yoqhhaeq Aeqdae Momil zaellye maduq zhee za mael kaol rongqyaol mael hhamul fu, haeqheemyel rongqyaol onglci ae'lye yotyel gaeq duyi, yoqhhaeq'ae gee biq: "Xitaeq laoq ngael gaeq e Yaqyo'ae, yoqhhaeq ngaeq'ae neezae zhee lael yae." 18 Ngaeteel yoqhhaeq nyegael senljyeq geeqzhoq vae zhol fu, naeqbol mael yotyel xilmael mqmae ae'lye gaeq duyi gaeq wae.
19 Aedeeteel'ae xianzhi gee gol e xiangxinl hhaeq kael e saeziq za'ae, tyulkaol, noteel laoq mqbaebae lael fu mqshoq e aeqgeel mael noteel e neemae onglci'ae mol dullal fu keellye, nahongqlye vae keeqmol deelhhei e aeqdael doqhoq mael'ae nyuqtongq deelhhei laoqmyel, saeziq xihael'ae haelmeeqlye nyuqtongq deelhhei maoqhhae. 20 Dilyiq loq maoq mael laoq, Momil e Suqhhaq taq'ae peqlal maoqlye mael geedu e saeziq mael, aeqyoyoq e yilsi maellye maeq hhae gee'loq'ae, 21 Peqlal maoqlye mael geedu e saeziq mael cholyaeq e yilsi ae'lye lael e qiq doq eiq maqza'ae, cholyaeq'ae senllinq ganqdongl biq kaol Momil e saeziq mael bi geedu hhei kaol'ae.