Jaq xianzhi kaol jaq laoqsi
2
Yilkaefu, cholyaeqhael onglci'ae jaq xianzhi zhol'ae; qiqsheel ngeelvae, aeqgael noteel onglci vae eiq jaq laoqsi zhol maoqlye hhae, kaol yotyel maqdumyel cholyaeq yaol zonglmye e maq hoq e gaelmae vae sheeq do laq. Yoqhhaeteel laoq yoqhhaeteel yaol vulhoq biq e Hhaoqsongl'ae nyeq'ei maeq renl'ae, tyulkaol, Momil yoqhhaeteel yaol nae'naemyel zonglmye biq maoqlye hhae. 2 Haelnaeqmyel cholyaeq laoq yoqhhaeteel ochoq nyegael neemaeba e xinqweiq mael bael zongl, kaol zhen'liq e gaelmae mael'ae yoqhhaeteel gae'lye bi geekyuq hhei. 3 Yoqhhaeteel aeqchee mael eiq mulgoq, kaol zaqgiqgiq e saeziq maellye noteel ae'lye dyuqbaq mael giq zaq yil. Yoqhhaeteel'ae chenqfaq biq maoqlye mael, yilkaeaeqnao ae'lye mael yaeqmeel keellye qiqzael eiq maeq dan'goq'ae; yoqhhaeteel e myeyil mael eiq nae'naemyel keellael'ae.4 Momil golsiq zonglpizaeq e mqmae yosongl vae eiq maeq yuanqliangl biq dyul maeqcilmyel, yoqhhaeteel yaol daq'oqlaqmae'ae beiqdo biq, nahongqlye vae ee'longl deelhhei kaol shenqpanl biq maoqlye doq deelhhei; 5 Momil yilkaeaeqnao e shilgail vae eiq maeq yuanqliangl biq'ae, haqmeq eeldeel deelmae mael xinlyangq maeq meeq e shilgail e cholyaeqhael'ae bi yo'li, gongyil e xiaoxiq geegaeq e Noqyal qiq haoq toq e cholyaeq heiq hhaeq'ae ocongq biq dyul wae; 6 Momil Soqdomaq kaol Eqmoqla'ae chenqfaq biq, milmae heeqmyel tyu niq mal zonglmye hhei, kaol haeqlyel pe peq hhei, kaol aeqnaol e shiqdail vae xinlyangq maeq meeq e cholyaeqhael'ae jinqgaol biq hhae, 7 Cholbahael ochoq nyegael neemaeba gae'lye duqlye nyuqsaeq e gongyil e cholyaeq Loqdeq'ae jiul biq dyul wae, 8 Gongyil e cholyaeq tyutaeq yoqhhaeteel onglci vae zhol, kaol yoqhhaeq e gongyil e neemae mael naochomyel, yoqhhaeteel lilfaq laoqmyel maeq zongl e silqinq mael gaeq hhei biq kaol mol hhei biq gae'lye nyuqsaeq biq kaol'ae; 9 Xilnye laol, Hhaoqsongl loq'ae, xinlyangq meeq e cholyaeq yaol haelmillye jiul biq, kaol yoqhhaeteel yaol shilfu myel ae'lye bi kitaelzaeq, kaol maeq gongyil e cholyaeq yaol chenqfaq e holhhaq vae bi zhol deelhhei, kaol shenqpanl e naohaeq mael'ae bi doq deelhhei maoqlye hhae, 10 Ruqtiq'ae saqdol lal aeqmyel mulgoq tyulmael, kaol maeqshol myel e neemae laoqmyel zonglzhol e cholyaeq, kaol Hhaoqsongl e laqtaq mael'ae maeq fu'qiq'ongl e cholyaeqhael vae laoq nyeq'ei maeq gee kael vae.
Yoqhhaeteel neemae bozaeq, haelzongl goq myel zongl, qiqgiq eiq maq gu zaq myel rongqyaol za e tyuhael'ae geekyuq biq hhae; 11 Rongqyaol za e tyuhael laoq mqmae yosongl ngeelvae. Mqmae yosonglhael laoq yoqhhaeteel taq'ae hhael onglzaeq kaol laqtaq hhal za feiq, Hhaoqsongl e yiqsi'ae yoqhhaeteel'ae geekyuq e saeziq maellye maeq konglgaol peq biq'ae. 12 Ngeelfeiq, cholyaeq xihael laoq maeq nyuq kiq e jyeqyaeq laoqmyel, dyeqlal fu qiq nao ae'lye bi deiqtyeq hheikaol xyeq biq maoqlye gee deelhhei hhae. Yoqhhaeteel aeqyoyoq maeq loq e silqinq mael'ae geekyuq, cholyaeq'ae maeqmeeqmyel zongl biq fu, aeqyoyoq yaol eiq bi zonglmye hhei ngeelvae, 13 Maeq gongyil myel zongl e xinqweiq maellye maeqmeeq e hhaeqpyuq mul. Yoqhhaeteel mqnao laoq nyelhhae lo lo mael hhaol biq, yoqhhaeteel'ae laoq bi zonglsu aeqwae, kaol maeqmeeqmyel za wae, noteel nyegael aelhoq qiqgael zaeq fu, aeqyoyoq e zaqgiqgiq gae'lye hhaol biq. 14 Yoqhhaeteel e ma'ne laoq duqlye yaeqmiyaeq'ae maoq maeq chifu goq, duqlye golsiq zonglpizaeq, neemae maeq sseetae e cholyaeq'ae cheeqmu biq, duqlye zhee mulgoq neemae za, yoqhhaeteel laoq doqchiq hhae bi gee e qiqmiq'ae. 15 Yoqhhaeteel zhoqsae'lye gaelmae ae'lye deelsae hhei, kaol deelbael biq vae, kaol Biq'eq e yaqyo Ba'lanq e gaelmae'ae cho'lyeq yil; Ba'lanq laoq maeqmeeqmyel zonglzaeq laeq e dyuqbaq mael mulgoq e cholyaeq ngeelvae, 16 Saeziq maeq gee kiq e mao'lyu qiq yaeq lye cholyaeq e yotyel maellye xianzhi e dilqeizaeq mael diqqye biq, yoqhhaeq zonglba e silqinq gae'lye yoqhhaeq'ae gaezaeq biq vae.
17 Cholyaeq xihael laoq eelcuq maq du e eelbi'ae, zaeqxil xilmae lye bokiq bo'nyelmyel bo biq e zhiqhaoq'ae, kaol naheiqlye e nahongq mael yoqhhaeteel'ae taeq deelhhei biq. 18 Yoqhhaeteel qiqgiq yilsi maqza myel puhenq e saeziq gee, ruqtiq e saqdol lal aeqmyel mulgoq tyulmael kaol ochoq nyegael neemaeba maellye, maq hoq myel ssuqhaoq caqzaq myel ae'lye zhoq duyi e cholyaeq'ae cheeqmu biq. 19 Yoqhhaeteel ochoq'ae bi zilyoq laeqngeel lye gee biq, ngeelfeiq, aeqyoyoq laoq bayil e hhaeq'ongq ongqzaeq e cholyaeq geiq, cholyaeq laoq aeqsul lye bi zonglyae hhei'laol aeqsul e hhaeq'ongq ongqzaeq e cholyaeq kaol'ae. 20 Yoqhhaeteel aedeeteel e Hhaoqsongl kaol jiulzuq Yesu Jidu'ae loq gae'lye, milcaeq taq e maeqshol myel ae'lye dongbeiqzaeq hhei vae, aeqnaol, maeqshol maellye yol bi leeltyeq hhei, kaol bi zonglyae hhei kaollaoq, yoqhhaeteel aeqnaol e qinqkuangl mael laefuq taq'ae hhael beeqzaeq wae. 21 Yoqhhaeteel gongyil e gaelmae mael loq'ae, ngeelfeiq, yoqhhaeteel'ae geegaeq hhei biq e senljyeq e gailminl mael beiqgae hhei vae, xilnye kaollaoq, maeq loq mael hhael meeq wae. 22 Cholyaeqhael duqlye gee e saeziq mael maq ba she:
"Aeqkeeq mael zipol hoqlael kaol aeqyoyoq lye pyeq du hhei mael zaeq hoq;"
"Aqhhaq mael ciqshol biq feiq hongbye vae yol long hoq li."
Saeziq xihael yoqhhaeteel'ae zhee zae gae li she.