Haeqmiq kaol haqyo
3
Qiqsheel ngeelvae, noteel haeqmiq geiq hael, aeqyoyoq e haqyo e saeziq mael naelhaeq maoqhhae, xilnye laol, Momil e yo'liq mael'ae maeq xiangxinl e haqyo zhol kaol'eiq, haeqmiq e saeziq gae'lye maeqngeel myel, xinqweiq gae'lye Hhaoqsongl'ae xiangxinl laelkiq'ae, 2 Yoqhhaeteel laoq noteel Momil'ae zun eiq zunjinl gu eiq gu mael kaol sholgaqlye xinqweiq mael mol hhei biq kaol'ae. 3 Noteel laoq aeqhhaol taq'ae, pulsheel doq, kaol zhigaq e aelhongq dum, kaol vuqduq qyelkeel pyeq ae'lye aeqyoyoq'ae haeq zonglzhizaeq, 4 Ngeelfeiq, cholyaeq neemae onglci'ae zonglhhaq deelhhei e maq buyil kiq e zhigaq mael za maoqhhae, naoqyae'lye mael kaol saeziq maeq naeq e neemae maellye aeqyoyoq yaol zonglzhizaeq; xilmael laoq Momil e yiqsi'ae zhee pyuq hhae. 5 Yilkaeaeqnao Momil'ae xiangxinl e senljyeq cholhae aeqmae laoq xilmael lye zonglzhizaeq hhae, kaol aeqyoyoq e haqyo e saeziq mael naelhaeq hhae. 6 Xilmael laoq, Saqla Yalboqlahanl e saeziq mael naelhaeq, kaol yoqhhaeq'ae hhaoqsongl lye gul biq laoqmyel hhae. Noteel meeq mael zongl, aeqchee hagu laq mael eiq maq gu laol, Saqla e yaeqmiq laoqmyel peqlal aeqwae.7 Qiqsheel ngeelvae, noteel haqyo geiq hael laoq, hoqqinq hoqliq myel haeqmiq nyegael qiqgael zonglzhol, kaol haeqmiyaeq laoq noteel taq'ae hhael ruanqroq feiq noq nyegael aeqyil e endianq mael qiqgael hhamul hhae, tyulkaol, noteel yoqhhaeteel'ae meeqlaellye za biq kaol zunjinl biq maoqhhae. Xilnye laol, noteel e heeldoq mael qiqgiq eiq maeq diqqye lalkiq wae.
Gongyil gae'lye shelkuq
8 Aeqnaol naolli laoq, noteel neemae qiqsheel laoqmyel ngeel maoqhhae, qiqhhaeq qiqhhaeq'ae guanxin, algo aeqnil laoqmyel qiqhhaeq qiqhhaeq'ae gaeq, hhaoqsaeqsaeq kiq kaol maeq dilqeizaeq e neemae za maoqhhae. 9 Duqlaq maellye duqlaq myel haeq zonglhoq, gaezaeq maellye haeq gaezaeq hoq, daoldaolmyel, geeqlongq biq biq maoqhhae, noteel yaol xilmael gae'lye gul du hhei biq mael laoq, noteel yaol geeqlongq bi mul maoqlye kaol'ae. 10 Momil e Suqhhaq taq'ae gee:
"Aeqyil'ae gaeq, kaol meeq e naohaeq gol maoqlye e cholyaeq laoq,
myeqhael ae'lye duqlaq e saeziq haeq bi duyi,
myeqho ae'lye zaqgiqgiq e saeziq haeq geedu.
11 Kaol duqlaq e xinqweiq mael beiqgae hhei,
zilzheqlye mael'ae saelpo kaol neemae qiqsiqmyel zui'qiuq maoqhhae.
12 Hhaoqsongl e ma'ne mael gongyil e cholyaeq'ae fupol'ae,
yoqhhaeq e naeqbol mael,
yoqhhaeteel e heeldoq gee mael naelhaeq'ae;
ngeelfeiq, duqlaq myel zongl e cholyaeq'ae,
maduq byezil aeqmyel zongl biq hhae."
13 Noteel laqheiqqyel lye meeq mael zongl kaollaoq, aeqsul noteel'ae hail lalkiq laeq? 14 Noteel laoq gongyil gae'lye shelkuq kaol feiq geeqlongq meeq hhae. Cholyaeq e hagu mael maq gu kael, zoq eiq maq zoqgiq kael; 15 Neemae onglci'ae Hhaoqsongl Jidu laoq senljyeq hhae, kaol yoqhhaeq'ae Hhaoqsongl'ae lye gee biq laol hhaeq vae. Qiqhhaeq laelhhaeq noteel'ae neemae onglci'ae panlwangl mael, aeqchee gae'lye lilmaeq lye naelhaeq lael laol, geehoq biq maoqlye haeqfu eiq paeqgaelsael meeq deelhhei maoqhhae; 16 Ngeelfeiq, naoqyae'lye mael, kaol zun eiq zunjinl gu eiq gu e neemae maellye geehoq biq maoqhhae. Nyuqfuhoq peq e liangqxin za maoqhhae, kaol aeqsul noteel'ae aeqchee silqinq mael taq'ae geekyuq laeq laol, noteel Jidu onglci'ae meeq e zongl maellye yoqhhaeteel'ae bi saqdol hoqli. 17 Momil e zhiqyil laoq noteel'ae meeq mael zongl gae'lye saeq bi pi maoqlye kaollaoq, maeqmeeqmyel zongl gae'lye saeq du'laq mael taq'ae hhael meeq'ae.
18 Jidu qiq pu'ae lye aedeeteel haelzhol cholyaeq e golsiq gae'lye sil vae,
gongyil mael maeq gongyil e vuqtu geiq mael laoq,
noteel yaol Momil e yiqsi'ae sheeqmyeq li biq maoqlye hhae.
Ruqtiq'ae lye gee'li'laol, yoqhhaeq yaol zonglsil biq aeqwae;
ngeelfeiq, yohael'ae lye gee'li'laol, yoqhhaeq dyeqhoqlal aeqwae.
19 Yoqhhaeq yohael xilmael ae'lye laoqgaiqkei laoqhaol vae zhol e yohael'ae Momil e saeziq geegaeq yil gol biq'ae, 20 Yohael xihael laoq, Yilkaefu Noqyal hoq hoqmae paeqgaelsael meeq, kaol Momil baorongq gil biq fu maeq xiangxinl e cholyaeq tyuhael ngeelvae. Tyuqfu, hoq hoqmae vae do'li, kaol eelcuq ae'lye deqjiul e cholyaeq maeqnaeq'ae, heiq hhaeq wae. 21 Eelcuq ae'lye lael e ciq e gui'liq mael, yaeqmeel Yesu Jidu e dyeqhoqlal ae'lye noteel yaol jiul biq hhae lye dailbiaoq hhae; ciq e gui'liq xilmael laoq, ruqtiq e suheiqlye mael zonglshol maeqngeel'ae, aedeeteel nyuqfuhoq peq e liangqxin maellye Momil'ae baoqzenl hhae lye dailbiaoq hhae. 22 Yesu mqmae vae da'li aeqwae, Momil e laqsseq boq'ae zhol hhae, haelzhol mqmae yosonglhael, laqtaq za hael, kaol onglzaeq hael gilzuqmyel yoqhhaeq'ae fuqcongq vae.