Momil e meeq e guanqja
4
Jidu laoq aeqhhaol taq'ae shelkuq gol vae laol, noteel eiq xilnye e neemae'ae nyuq maellye diqgae e moqgoq geiq maoqhhae, aeqhhaol taq'ae shelkuq gol laol golsiq nyegael guanxil maqza vae kaol'ae, 2 Xilnye laol, saeq ae'lye aeqnaol laoq noteel laoq Momil e zhiqyil mael naelhaeq maoqlaol, cholyaeq e saqdol lal aeqmyel mulgoq tyulmael'ae maeq cho'lyeq wae, kaol milcaeq taq'ae za siq e naohaeq zonglzhol. 3 Yilkaefu, noteel baeqjyelboq minqcuq e cholyaeq e nyuq mael'ae cho'lyeq, kaol ochoq nyegael neemaeba, aeqchee eiq zhee mulgoq, zilbaeq bu, puqqil maqza myel nyelhhae, zilbaeq dol sil maoqmyel dol, kaol hol lael aeqmyel zongl du hhei e momilhael'ae heel heel myel zonglzhol hhae, xilnye naohaeq gol lo vae kaol'ae. 4 Silqinq xihael taq'ae, yoqhhaeteel laoq, noteel yoqhhaeteel nyegael puqqil maqza myel haelmillye zongl goq laol, haelmillye zongl e gaelmae'ae maeq bael deel e mol hhei biq laol qiqguail biq, kaol noteel'ae geekyuq biq. 5 Yoqhhaeteel aeqdilmyel choldyeq kaol cholsil'ae shenqpanl maoqlye Hhaoqsongl e yiqsi'ae hhae gee'loq du hhei hhae. 6 Tyulkaol, cholsil vae eiq fuqyin geegaeq gol biq'ae, kaol yoqhhaeteel e ruqtiq mael'ae cholyaeq e biaozhunq laoqmyel shenqpanl biq vae, ngeelfeiq, yoqhhaeteel e yohael laoq Momil gae'lye hha dyeqdeel'ae.7 Halza haelzholhael e jyeqjuq laoq niqlael vae. Tyulkaol, noteel aeqyae'lye kei, aeqyoyoq'ae zongltyeqzaeq maoqhhae, yuqnyuqgeellye heeldoq gee maoqhhae. 8 Hhal mulyo yo'li mael laoq qiqhhaeq qiqhhaeq'ae aeqdilmyel gaeq mael'ae, gaeq mael haelnaeqmyel e golsiq mael zonglkaeq ongl kaol'ae. 9 Noteel maq buqzaq myel qiqhhaeq qiqhhaeq'ae sheeqcaq maoqhhae. 10 Haetaeq eiq aeqyoyoq hhamul hhei biq e encil maellye qiqhhaeq qiqhhaeq'ae fuqsil, kaol Momil biq laq e maeq qiqsheel e encil e meeq e guanqja geiq maoqhhae. 11 Aeqsul aeqchee saeziq geegaeq maoqlye kaollaoq, Momil e saeziq laoqmyel geegaeq maoqhhae; aeqsul choqyaeq'ae fuqsil maoqlye kaollaoq, Momil biq biq e aqha laoqmyel fuqsil maoqhhae, kaol Momil'ae aeqchee silqinq mael taq vae eiq Yesu Jidu gae'lye rongqyaol bi za. Rongqyaol kaol laqtaq mael haeqfu keellye yoqhhaeq'ae biq hhei biq lye nyuqlil. Amen!
Jidutuq e saeq mael
12 Ngael gaeq hael o, aeqzaeq laoqmyel e shilfu mael noteel'ae yo'lael fu, haeq qiqguail gil, maeq nyuqkeel ongl myel silqinq mael puqlael hhae lye haeq kei gil; 13 Daoldaolmyel hhaol maoqhhae, noteel Jidu nyegael saeqlael saeqchoqbo du'laq hhae, kaol noteel'ae yoqhhaeq e rongqyaol mael mol du'lal fu dilqei dilqei myel bi hhaol laeq'ae. 14 Noteel'ae Jidu e cholmil gae'lye bi vuq kaollaoq, geeqlongq meeq hhae, Momil e rongqyaol e yohael mael noteel e aeqhhaol taq'ae zhol kaol'ae. 15 Noteel onglci'ae laoq, cholyaeq xyeq, lolbiq haoq, duqlaq e zongl, yoqhhaeq'ae maeq guanqyo mael guanq, xihael gae'lye shelkuq e cholyaeq maeq hhae zhol'ae. 16 Aeqsul jidutuq geiq gae'lye shelkuq kaollaoq, maduq maqza yae lye haeq kei, cholmil xilmael gae'lye rongqyaol mael Momil'ae biq biq maoqhhae. 17 Naohaeq keellael vae, Momil toq ae'lye zhoq shenqpanl maoqlye kaol'ae; aedeeteel ae'lye zhoq shenqpanl kaollaoq, aelmaol, Momil e fuqyin mael'ae maeq xiangxinl e cholyaeq e jyeqgoq mael laoq haelmillye hhaemaeq?
18 "Gongyil e cholyaeq deqjiul dyel'eiq maeq yael kaollaoq,
Momil'ae maeq cho'lyeq kaol golsiq zonglpizaeq e cholyaeq laoq
haoqtul e milcaeq haeqvae za hhaemaeq?"
19 Tyulkaol, Momil e zhiqyil laoqmyel shelkuq e cholyaeq laoq neemae qiqsiqmyel meeq mael zongl maoqhhae, kaol aeqyoyoq e yohael mael zaqgiq maqgiq e mqdongq milbeibei e Hhaoqsongl'ae heilmoq hhei biq.