Yoqhanl Elsu
Meeqlaeqmaeq lye naelhaeq
1
Ngael zhangqlaoq geiq e qiq hhaeq, Momil lye saelpodu hhei e haeqmiyaeq'ae kaol yoqhhaeq e yaeqmiq yaqyohael'ae xinl cu biq lil. Ngael zhen'liq onglci'ae lye noteel'ae gaeq biq; ngael dyul maeqcilmyel, zhen'liq hael loqhael eiq, 2 Zhen'liq gae'lye noteel'ae gaeq biq. Zhen'liq xilmael aedeeteel onglci'ae za, kaol aedeeteel nyegael haeqfu keellye qiqgael baelzhol'ae. 3 Enhuil mael, hhaoqsaeqsaeq mael, neesaelhhae mael, Aeqdae Momil kaol yoqhhaeq e Yaqyo Yesu Jidu, zhen'liq kaol gaeq onglci ae'lye aedeeteel nyegael qiqgael baelzhol laeq lye nyuqlil.Aeqchee zongl mael eiq zhen'liq kaol gaeq gae'lye zongl maoqhhae
4 Ngael noq e yaeqmiq yaqyohael onglci e qiq miq laoq, aedeeteel e aeqdae tyuqvae lye naelhaeq do zaq hhei e minllinl mael laoqmyel, zhen'liq onglci vae zongl yil mol aeqwae, kaol ngael zhee hhaol yae. 5 Haeqmiyaeq o, ngael yaeqmeel noq'ae geezaeq lil, aedeeteel qiqhhaeq qiqhhaeq'ae gaeq maoqhhae. Ngael noq'ae xinl cu biq mael laoq, minllinl yosheq qiq doq maeqngeel'ae, aedeeteel'ae zhoqmyel fu ae'lye za mael'ae. 6 Aedeeteel yoqhhaeq minllinl laoqmyel zongl laol, xilmael laoq gaeq mael ngeelvae. Noteel zhoqmyel fu ae'lye gaeq hhei biq e minllinl tyulmael laoq, noteel'ae aeqchee zongl mael eiq gaeq e gae'lye zongl maoqhhae lye kaol'ae.
7 Haelnaeqmyel zaqgiqgiq e cholyaeq milcaeq taq'ae du'lal, yoqhhaeteel Yesu Jidu laoq cholyaeq peqlal kaol yi e maeqngeel'ae lye gee hhae; xihael laoq cholyaeq'ae zaqgiqgiq hael kaol Jidu'ae diqqye hael ngeelvae. 8 Kaol noteel aeqyae'lye kei maoqhhae, zonglbyel e mulhhael mael haeq zonglba gil hhei, ngeelfeiq, gilzuqmyel shangqcil mael mul maoqlye hhae. 9 Jidu e geemyeq mael'ae jyeqli, kaol yol maeq naelhaeq hael laoq, neemae onglci'ae Momil maeq zhol'ae; geemyeq e xilmael naelhaeq hael laoq, neemae onglci'ae aeqdae kaol Yaqyo zhol wae. 10 Aeqsul noteel tyuqvae lael kaol geemyeq e xilmael maeq geegaeq kaollaoq, noteel yoqhhaeq yaol laoqhaol'ae haeq sheeqcaq do'laq, kaol yoqhhaeq'ae meeqlaeqmaeq lye haeq naelhaeq biq; 11 Yoqhhaeq'ae meeqlaeqmaeq lye naelhaeq biq hael laoq, yoqhhaeq laoqmyel duqlaq e bael zongl ngeelvae.
Meeqlaeqmaeq lye naelhaeq e saeziq
12 Ngael noteel'ae cu biq maoq e saeziq zhee za wae siq, ngeelfeiq, ngael suqhhaq kaol meqshuiq maellye maq cu goq yaevae, ngael noteel zael'ae yil kaol noteel yaol mol gae'lael aeqmyel gee'naeq maoqlye panlwangl lil, kaol aedeeteel e hhaol mael bong'lye bi za. 13 Saelpodu hhei e noq e aelbae aeqnilhael e yaeqmiq yaqyohael, gilzuqmyel noq'ae meeqlaeqmaeq lye naelhaeq hhae.