Yoqhanl Sansu
Meeqlaeqmaeq lye naelhaeq
1
Ngael zhangqlaoq geiq e qiq hhaeq, ngael gaeq e Gaiyoq'ae xinl cu biq, xitaeq laoq, ngael zhen'liq onglci'ae lye gaeq e qiq hhaeq ngeelvae. 2 Ngael gaeq e qiq hhaeq o, ngael laoq nol aeqchee zongl mael eiq shunl biq, kaol noq e yohael mael saelza'lye laoqmyel, aeqhhaol mael eiq tyulnye zholsael biq lye nyuqlil. 3 Saeqvae lael e aqsseq aeqnilhael, noq e neemae onglci'ae zhen'liq za, aeqchee zongl mael eiq zhen'liq onglci'ae zongl hhae lye geegaeq laeq vae, tyulkaol, ngael zhee hhaol yae. 4 Ngael ngaeq e yaeqmiq yaqyohael aeqchee zongl mael eiq zhen'liq onglci'ae zongl'ae lye gaeq hhei'laol zhee hhaol yae, ngaeq e hhaol mael xilmael taq'ae hhael heeq myel maqza vae.Yoqhanl Gaiyoq'ae laqma deiqqei biq
5 Ngael gaeq e qiq hhaeq o, nol laoq aqsseq aeqnilhael baeqjyelboq e milcaeq ae'lye lael feiq, yoqhhaeteel'ae neemae maeqpaelmyel gaeq biq hhae. 6 Yoqhhaeteel noq e gaeq mael jiaolhuil e yiqsi ae'lye zoqzenl du hhei vae; kaol nol yaeqmeel Momil hhaol laoqmyel, yoqhhaeteel'ae mulyo mael heil biq kaollaoq, nol xilnye zongl mael laoq zhee meeq wae. 7 Yoqhhaeteel Hhaoqsongl e cholmil gae'lye baeqjyelboq e milcaeq vae yil, kaol yoqhhaeteel Yesu'ae maeq xinlzaeq e cholyaeqhael zaellye qiqgiq maeq daeqzaeq gol'ae. 8 Tyulkaol, aedeeteel xilnye cholyaeqhael'ae sheeqcaq biq maoqhhae, xilnye laol, aedeeteel laoq zhen'liq gae'lye mulhhael qiqgael mul e cholyaeq peqlal wae.
Meeq mael zongl maoqhhae
9 Ngael laefuq jiaolhuil'ae xinl cu gol biq wae, ngeelfeiq, yoqhhaeteel onglci e yoheeq geiq mael hhaol biq e Diutelfei ngaeteel'ae maeq sheeqcaq laq'ae. 10 Tyulkaol, ngael lael fu, yoqhhaeq haelzongl e silqinq mael geedu hhei maoq, silqinq xihael laoq, yoqhhaeq duqlaq e saeziq maellye ngaeteel'ae geekyuq laeq, kaol yoqhhaeq aqsseq aeqnilhael'ae maeq sheeqcaq biq, sheeqcaq nae e tyuhael'ae diqqye biq dyul maeqcilmyel, yoqhhaeteel yaol jiaolhuil ae'lye lyeqdu biq mael ngeelvae. 11 Ngael gaeq e qiq hhaeq o, maeqmeeq mael haeq bael zongl, meeq mael bael zongl maoqhhae. Meeq e zongl hael laoq Momil ae'lye lael, maeqmeeq e zongl hael laoq, Momil yaol maeq mol gol'ae. 12 Diqmiqdiu meeq mael zongl'ae, kaol cholyaeqhael yoqhhaeq'ae bal zoqzenl biq, zhen'liq mael aeqyoyoq eiq yoqhhaeq'ae bal zoqzenl biq. Ngaeteel eiq yoqhhaeq'ae bal zoqzenl biq, kaol nol ngaeteel zoqzenl mael laoq aeqdilmyel hhae lye loq'ae.
Meeqlaeqmaeq lye naelhaeq e saeziq
13 Ngael noteel'ae cu biq maoq e saeziq zhee za wae siq, ngeelfeiq, ngael laoq biq kaol meqshuiq maellye maq cu goq yaevae. 14 Ngael noq yaol nae'naemyel mol goq yae, kaol noq yaol mol gae'lael aeqmyel saeziq gee'naeq maoqlye panlwangl lil. 15 Noq'ae neesaelhhae mael yo'li biq lye nyuqlil! Saeqvae e yelchoqhael noq'ae meeqlaeqmaeq lye naelhaeq hhae. Nol tyuqvae e yelchoqhael'ae qiqhhaeq qiqhhaeq'ae lye meeqlaeqmaeq lye bael naelhaeq hhei biq.