Yoqdal Su
Meeqlaeqmaeq lye naelhaeq
1
Yesu Jidu e yaqhacheqzaq e cholyaeq Yaqgel e aeqnil Yoqdal, saelpodu hhei e cholyaeq tyuhael'ae xinl cu biq, yoqhhaeteel laoq Aeqdae Momil onglci'ae lye gaeq mael hhamul hhei biq e cholyaeqhael, kaol Yesu Jidu fupol biq e cholyaeqhael ngeelvae, 2 Hhaoqsaeqsaeq mael, neesaelhhae mael kaol gaeq mael noteel'ae haelnaeqmyel biq hhei biq lye nyuqlil.Jaq e laoqsihael'ae chenqfaq biq
3 Ngael gaeq e cholyaeqhael o, ngael haeqfu'ae'lye noteel'ae xinl cu biq maoqlye zhee nyuq laeq wae, kaol aedeeteel'ae hhaellaelmyel za e jiul'en mael'ae gee keelli laol, yaeqmeel ngael noteel'ae xinl cu hheikaol geemyeq biq mael hhal mulyo'ae lye nyuq lil, yilkaefu, qiq pu'ae lye gilzuqmyel senltuqhael'ae biq biq e xinlyangq mael, hal zoq e aqha maellye songlqye deelhhei ongl maoqhhae. 4 Cholyaeq qiq miq noteel onglci vae haoq ki do'laq vae. Haoq ki do'laq hael laoq, Momil yilkaeaeqnao ae'lye gee gol e chenqfaq biq maoqlye e cholyaeq ngeelvae, yoqhhaeteel laoq neemae qiqsiqmyel Momil'ae maeq cho'lyeq, kaol aedeeteel e Momil e endianq mael saqdol lal aeqmyel mulgoq tyulmael haelmillye zongl goq laol haelmillye zongl e jihuil zonglpeq vae, kaol aedeeteel e jiulzuq qiqhhaeq hhaeqli Hhaoqsongl Yesu Jidu'ae maeq renl'ae.
5 Silqinq xihael noteel yilkaefu ae'lye loq feiq, ngael noteel'ae geetae gil laeqngeel siq: Yilkaefu, Hhaoqsongl lye cholyaeqhael yaol Aijiq vae lye jiul duyi biq, aeqnaol, Momil lye maeq xiangxinl e tyuhael yaol zonglmye biq vae. 6 Zail laoq, aeqyoyoq e laqtaq mael maq mul myel zholhhael ae'lye deelsae e mqmae yosonglhael yaol, Hhaoqsongl lye kildong'lye e sulmca maellye kaltoq biq, kaol aeqnaol naolli e shenqpanl e naohaeq fu keellye, nahongqlye vae koqlongl deelhhei biq. 7 Soqdomaq, Eqmoqla kaol dongqpyeq dongqjyel e milmae heeqmyel e cholyaeqhael laoq, yoqhhaeteel laoqmyel ochoq nyegael neemaeba hhae, haqyoyaeq kaol haqyoyaeq qiqgael ssuqza mael niqhhaq ssuqza laoqmyel zongl hhae, kaol maq myeyil kiq e aeqzaeq maellye pe e chenqfaq mael bi yo'li, kaol aeqnaol e cholyaeqhael'ae xilnye maeq zongl hhaeq'ae lye bi fu do'li.
8 Xilnye feiq, matutu e cholyaeq xihael xilnye aeqyoteel e aeqhhaol mael maeqshol myel zonglpeq hhei, kaol Hhaoqsongl e laqtaq mael'ae fudyul, kaol rongqyaol za hael'ae geekyuq biq. 9 Mqmae yosongl e yoheeq Miqja'lel laoq, sil e Moxi e aeqhhaol gae'lye niqhaeq haeqmae nyegael geegae fu, geekyuq e saeziq maellye niqhaeq haeqmae'ae golsiq za'ae lye dyel'eiq maeq gee peq biq'ae, xilnye gee dyul wae: "Hhaoqsongl noq'ae gaezaeq biq!" 10 Ngeelfeiq, cholyaeq xihael laoq yoqhhaeteel maeq loq mael'ae geekyuq biq hhae. Yoqhhaeteel laoq qiqgiq maeq nyuq kiq e jyeqyaeq laoqmyel bogae hhei fu ae'lye, siqconglhael zongl dyul wae, kaol xihael taq ae'lye aeqyoyoq yaol zonglmye zaq vae. 11 Yoqhhaeteel'ae zaihuol za vae, yoqhhaeteel Gaiyinq laoqmyel qiqsheel e gaelmae deel, kaol dyuqbaq gae'lye Ba'lanq e maq hoq boq'ae ki yil, kaol Keqla e neemae xyelpupu onglci'ae lye myeyil hhei kaol'ae. 12 Cholyaeq xihael noteel nyegael aelhoq bael zaeq peq, yoqhhaeteel laoq aeqyoyoq zaeqdye dyul wae, noteel baqwanq zaeq e cholyaeqhael onglci e maeqshol e cholyaeq'ae, vuq'yel maeq deeq e zhiqhaoq'ae, zaeqxil haeqvae bo laol haeqvae yil; kaol zaelsiq heillezaq e naohaeq'ae aelsiq maeq siq e aelbol'ae, kaol aelcil nae'naemyel eepu hhei, kaol chiqlye sil vae; 13 Kaol eeldeel deelmae onglci e eeldiq diqmae'ae, aeqyoyoq e miqyil daoqcheeq e haqmeq mael diqqei hhei; kaol haeqvae yil maoqlye maqza myel e aeqgeel'ae, kaol naheiqlye e nahongq mael haeqfu keellye yoqhhaeteel'ae taeq deelhhei biq maoqlye hhae.
14 Yaldang e siq cheq cholyaeq Yiqnol, cholyaeq xihael'ae peqlal maoqlye mael gee gol: "Naelhaeq, Hhaoqsongl yoqhhaeq e hae'nae ca hae'nae tongl senljyeq mqmae yosonglhael yaol sheeq hheikaol gaeyi, 15 Kaol cholyaeqhael'ae shenqpanl maoqlye hhae, kaol xinlyangq maeq meeq e cholyaeqhael xinlyangq maeq meeq e silqinq mael haelzongl goq myel zongl mael zenlminq, kaol xinlyangq maeq meeq e golsiq za cholyaeqhael saeziq maeq naelhaeq myel Momil'ae deiqgaehoq mael eiq zenlminq maoqlye hhae." 16 Cholyaeq xihael laoq duqlye meelduhenq, aeqchee mael eiq ochoq'ae baqcheeq da, aeqyoyoq e saqdol lal aeqmyel mulgoq tyulmael laoqmyel zongl, maeq zonglkeel ongl myel e saeziq gee, aeqyoyoq'ae meeqyo'lael mael gae'lye baelyaelmyel ochoq'ae hoda biq.
Yesu'ae xinlzaeq e cholyaeqhael'ae geemyeq biq mael
17 Ngeelfeiq, noteel laoq, ngael gaeq e cholyaeq o, noteel laoq aedeeteel e Hhaoqsongl Yesu Jidu e shiqtuqhael, yilkaefu gee gol e saeziq mael nyuqdeel maoqhhae. 18 Yoqhhaeteel noteel'ae gee gol biq: "Aeqnaol naolli naohaeq vae, baelyaelmyel ochoq'ae eelfu e cholyaeq zhol hhae, aeqyoyoq xinlyangq maeq meeq e zhee mulgoq e nyuq mael laoqmyel zongl." 19 Cholyaeq xihael laoq cholyaeqhael yaol bi zonglgae tullaeq, yoqhhaeteel laoq aeqyoyoq nyuq laoqmyel zongl, senllinq maeq zhol'ae. 20 Ngeelfeiq, noteel laoq, ngael gaeq e cholyaeq o, noteel laoq hhael senljyeq jyeqli e xinlyangq taq'ae aeqyoyoq yaol aqha hhael bi bo'lael maoqhhae, kaol senllinq onglci'ae heeldoq gee, 21 Kaol aeqyoyoq yaol songlqye zaq, Momil e gaeq e onglci'ae zhol maoqhhae, aedeeteel e Hhaoqsongl Yesu Jidu e hhaoqsaeqsaeq mael'ae chifu deelzaeq, kaol haeqfu eiq zadeel e aeqyil vae do'li. 22 Cholyaeq qiq miq laoq huaiqyiq biq hhae, kaol noteel yoqhhaeteel'ae hhaoqsaeqsaeq biq maoqhhae; 23 Qiq miq'ae laoq noteel jiul biq maoqhhae, kaol yoqhhaeteel yaol aeqzaeq doq myel onglci ae'lye jiul du hhei biq; qiq miq'ae laoq noteel yoqhhaeteel'ae gu'ni'lye hhaoqsaeqsaeq biq maoqhhae, saqdol lal aeqmyel mulgoq maellye zonglsu e aelhongq mael dyel'eiq xinq yae lye zongl maoqhhae.
Geeqlongq biq biq
24-25 Aedeeteel e qiqhhaeq hhaeqli Momil, aedeeteel e jiulzuq laoq, noteel'ae golsiq onglci'ae maeq bi jye'leeq do, kaol maeqmeeqmyel qiqgael eiq maqza myel bi ngeel, kaol hhaol gae'lael aeqmyel yoqhhaeq e rongqyaol e yiqsi'ae hhae zhol biq lye nyuqlil. Aedeeteel e Momil laoq jiulzuq Yesu Jidu ae'lye maduq za lye rongqyaol hha za hhei biq, yoqhhaeq'ae onglzaeq kaol laqtaq mael hhamul hhei biq, laefuq fuqli fu ae'lye mael yaeqmeel keellye, haeqfu keellye xilnye hhae. Amen.