Qiqshillul
Yoqhanl jiaolhuilhael'ae meeqlaeqmaeq lye naelhaeq biq mael
1
Xihael laoq Yesu Jidu e qiqshil'ae. Momil lye qiqshil mael Yesu'ae biq hhei biq, kaol yoqhhaeq yaol nae'naemyel peqlal maoqlye e silqinqhael Yesu'ae xiangxinl e cholyaeqhael'ae bi tyuqmyeq yil laol, yoqhhaeq lye mqmae yosongl yaol moqheilheil du hheikaol yoqhhaeq e yaqhacheqzaq e cholyaeq Yoqhanl'ae bi tyuqmyeq yil, 2 Tyulkaol, Yoqhanl aeqyoyoq haelmol e yilxiangl mael gilzuqmyel zoqzenl du hhei vae. Yilxiangl xilmael laoq, Momil e saeziq, kaol Yesu Jidu e zoqzenl mael ngeelvae. 3 Peqlal maoqlye mael geedu e saeziq xihael'ae duq e cholyaeq, kaol gaeq hhei biq kaol saeziq xihael zongl gaeyil e tyuhael laoq, gilzuqmyel geeqlongq meeq wae, shiqshen tyulmael niqlael vae kaol'ae. 4-5 Yoqhanl Yalxilyal e jiaolhuil siq gael'ae xinl cu biq. Yaeqmeel zhol, yilkaeaeqnao zhol, aeqgael haeqfu eiq zhol e Momil, kaol yoqhhaeq e zongmae duqtyel e laefuqboq e yohael siq hhaeq, kaol haelmillye gee laol haelmillye zongl e bael mol e, cholsilhael onglci ae'lye laefuq fuqli dyeqhoqlal e, milcaeq taq'ae zongmaehael e yoheeq Yesu Jidu tyutaeq, enhuil kaol neesaelhhae mael noteel'ae biq biq lye nyuqlil.Yoqhhaeq aedeeteel'ae gaeq laeq, kaol aeqyoyoq e siq maellye aedeeteel yaol golsiq onglci ae'lye pyeqduhoq hhei laq hhae, 6 Kaol aedeeteel yaol goqja qiq mal e cholyaeq bi peqlal laq, kaol yoqhhaeq e Aeqdae Momil e jilsi bi geiq laq hhae. Rongqyaol mael, onglzaeq mael haeqfu keellye yoqhhaeq'ae biq biq lye nyuqlil. Amen!
7 "Fu hhei, yoqhhaeq mqdul nyegael gaeyi;
ma'ne hae qiq siq eiq yoqhhaeq yaol mol maoqlye hhae;
yoqhhaeq'ae co gol biq e cholyaeq tyuhael dyel'eiq
yoqhhaeq yaol mol maoqlye hhae;
kaol milcaeq taq e haelzhol minqcuq eiq
yoqhhaeq gae'lye nyuqsaeq lael aeqmyel nyul maoqlye hhae."
Xilmael laoq aeqdilmyel hhae. Amen! 8 Hhaoqsongl Momil gee: "Ngael laoq A'lafaqa lil, ngael laoq Oqmeiqgab lil, kaol yaeqmeel zhol, yilkaeaeqnao zhol, aeqgael haeqfu eiq zhol e hhael'onglzaeq zaeqli qiq hhaeq lil."
Jidu Yoqhanl'ae bi molli
9 Ngael Yoqhanl laoq noteel e aqsseq aeqnil lil, Yesu onglci'ae, noteel nyegael saeqlael saeqchoqbo, goqja qiqgael hhamul, kaol qiqgael renqnail lil; Momil e saeziq gae'lye, kaol Yesu'ae zoqzenl bael kei biq mael gae'lye, laefuq Baqmo lye gul e haiqdaoq vae zhol gol aeqwae. 10 Liqbailtian e qiq nao'ae, ngaeq'ae senllinq ganqdongl laeq'ae, ngaeq e aeqnaolboq'ae yotyel tyelmae gaeqlael laeq'ae, dalhaol zhangq e yotyel laoqmyel hhae, 11 Gee: "Nol haelmol e silqinqhael laoq suqhhaq taq'ae cuda hhei, kaol Yiqfuqsoq, Shilmeiqnaq, Byeqjamoq, Tuiyaqtui'la, Saqdiq, Fei'latyeqfei, kaol Laoqdiqja jiaolhuil tyu siq gael'ae bi heil yil." 12 Ngael zipol lael kaol aeqsul e yotyel mael ngaeq nyegael saeziq geechoq hhaemaeq lye chifu maoq. Ngael zhoq zipol lael laol, pulsheel denjal siq mal mol aeqwae; 13 Denjal kaol denjal e kaeqlaeq'ae Cholyaeq Yaqyo laoqmyel qiq hhaeq zhol'ae, yoqhhaeq'ae aeqkeel vae gae keelyil aeqmyel poljye haeqmaomyel dum hhei hhae, neeto'ae laoq pulsheel oqlongl paq hhei hhae. 14 Yoqhhaeq e vuqduq kaol qyelkeel mael pulchi'lye hhae, aqciq ciqpul e caeqhum laoqmyel hhae, haeqnyel laoqmyel eiq dul'ae; yoqhhaeq e ma'ne mael laoq aeqzaeq miqhulm laoqmyel hhae. 15 Aeqkeel niqboq laoq yuqduq'ae pe gol kaol zheelniqlye e geeqsheel laoqmyel hhae, yotyel laoq haelnaeqmyel eelcuq yul e yotyel laoqmyel hhae. 16 Yoqhhaeq e laqsseq vae laoq aeqgeel siq mal heil hhei hhae; yoqhhaeq e myeqbongq ae'lye niqboqmyel ta e maejyel qiq mal mye du hhei, maduq mael laoq guaeq'ei hongl e neelmae mael aeqcael cael du laoqmyel hhae. 17 Ngael yoqhhaeq yaol zhoq mol hhei'laol, yoqhhaeq e aeqkeel yiqsi'ae oqbaqbaq ga hhei, kaol cholsil laoqmyel oqyil vae. Yoqhhaeq e laqsseq mael ngaeq'ae baqcheeq hhei laeq kaol gee: "Maq gu kael. Ngael laoq laefuq fuqli lil, aeqnaol naolli lil, 18 Kaol haeqfu eiq dyeqdeel e qiq hhaeq lil. Ngael sil gol aeqwae, fu hhei, yaeqmeel ngael laoq dyeqdeel lil, haeqfu keellye dyeqdeel aeqlil; kaol ngaeq'ae sil e kaol mil'oq e haedulmhael heil hhei aeqlil. 19 Tyulkaol, nol mol e silqinqhael, yaeqmeel e silqinqhael kaol aeqgael peqlal maoqlye e silqinqhael, gilzuqmyel cuga hhei maoqhhae. 20 Nol haelmol silqinqhael laoq, ngaeq e laqsseq'ae za e aeqgeel siq mal kaol pulsheel denjal e aolmiq mael laoq xilnye hhae: Aeqgeel siq mal laoq jiaolhuil siq gael e mqmae yosongl ngeelvae, denjal tyu siq mal laoq jiaolhuil siq gael ngeelvae."