Yiqfuqsoq milcaeq e jiaolhuil'ae cu biq e xinl
2
"Nol Yiqfuqsoq milcaeq e jiaolhuil e mqmae yosongl'ae xinl cu biq maoqhhae, gee: 'Laqsseq'ae aeqgeel siq mal heil hhei, kaol pulsheel denjal siq mal kaeqlaeq'ae deel e tyutaeq xilnye gee: 2 Ngael laoq noq e meeq e xinqweiq mael, duqhee'lye mul mael, kaol renqnail mael loq lil, nol duqlaq e cholyaeqhael'ae maeq baorongq biq'ae lye eiq loq lil. Cholyaeq tyuhael aeqyoyoq shiqtuq lil lye gee zaeq feiq, shiqtuq maeqngeel'ae; nol tyuteel'ae shilfu gol biq kaol jaq hhae lye fudu hhei vae. 3 Nol renqnail ongl, kaol ngaeq e cholmil gae'lye duqhee'lye mulhhael mul feiq, maeq zongl gaeyil ongl yae vae lye maeq zongl gol'ae. 4 Ngeelfeiq, ngael noq'ae silqinq qiq mal gaezaeq maoq, silqinq xilmael laoq, noq lye zhoqmyel fu e neegaeqgaeq mael beiqgae mael ngeelvae. 5 Tyulkaol, nol laoq nol haeqvae lye jye'leeq laeq hhae lye nyuqfuhoq maoqhhae, kaol neemae paellael, kaol zhoqmyel fu e mulhhael mael mul maoqhhae. Nol neemae maeq paellael kaollaoq, ngael noq zael'ae yi maoq, kaol noq e denjal mael laefuq za myel ae'lye baqtael yil maoq. 6 Ngeelfeiq, noq'ae meeq e silqinq qiq mal za'ae, silqinq xilmael laoq, nol Niqge'la paila e xinqweiq mael'ae neemasu biq mael ngeelvae, ngael eiq xilnye xinqweiq mael'ae neemasu laq hhae. 7 Naeqbol gaeq congl hael laoq, senllinq mael jiaolhuilhael'ae gee gil biq e saeziq mael naelhaeq maoqhhae. Yinqzaeq e cholyaeq laoq, ngael Momil e Mqmae Zongqdei e aeqyil aelbol e aelsiq mael aeqdilmyel yoqhhaeq'ae biq biq kaol bi zaeq maoq.'"Shilmeiqnaq milcaeq e jiaolhuil'ae cu biq e xinl
8 "Nol Shilmeiqnaq milcaeq e jiaolhuil e mqmae yosongl'ae xinl cu biq maoqhhae, gee: 'Laefuq fuqli e, aeqnaol naolli e, sil aeqkaol yol dyeqhoqlal e tyutaeq xilnye gee: 9 Ngael laoq noq e saeqlael mael kaol maqza congl mael loq lil, qiqshiq laoq, nol laoq za congl'ae, aeqyoyoq laoq Yoqtail cholyaeq lil lye gee zaeq e cholyaeq tyuhael noq'ae geekyuq e saeziq mael eiq loq lil, qiqshiq laoq, yoqhhaeteel laoq Yoqtail cholyaeq maeqngeel'ae, Saqdanl huiltangq e cholyaeq'ae. 10 Nol shelkuq maoqlye mael'ae maq gu kael. Naelhaeq! Niqhaeq haeqmae lye noteel onglci e mee'nae hhaeq yaol laoqgaiqkei laoqhaol vae koqlongl li maoqlye hhae, kaol noteel'ae shilfu biq, kaol noteel qyel nao shelkuq maoqlye hhae. Nol aeqdilmyel hhae sil kaol'eiq neemae xyelpu maqpu myel ngeel maoqhhae, xilnye laol, ngael noq'ae aeqyil e zongmae vuqcongq tyulmael biq laqngeel. 11 Naeqbol gaeq congl hael laoq senllinq mael jiaolhuilhael'ae gee gil biq e saeziq mael naelhaeq maoqhhae. Yinqzaeq e cholyaeq laoq, dil'el cil sil mael maeq puqli kiq wae.'"
Byeqjamoq milcaeq e jiaolhuil'ae cu biq e xinl
12 "Nol Byeqjamoq milcaeq e jiaolhuil e mqmae yosongl'ae xinl cu biq maoqhhae, gee: 'Niqboqmyel ta e maejyel za e tyutaeq xilnye gee: 13 Ngael laoq nol zhol e milcaeq mael loq lil, tyuqvae laoq, Saqdanl e zholhhael za e milcaeq ngeelvae; ngaeq e neemae xyelpu maqpu e bael mol e cholyaeq Antiqpal noteel onglci'ae zhol, kaol Saqdanl zhol e milcaeq ae'lye xyeq biq fu, nol laoq ngaeq e cholmil mael'ae xiangxinl gaeyil wae siq, kaol nol ngaeq'ae maeq xiangxinl yil lye maeq gee gol'ae. 14 Ngeelfeiq, ngael noq'ae gaezaeq maoq e silqinq mee'nae mael za'ae, silqinq xihael laoq, noq e tyuqvae qiqhhaeq laelhhaeq laoq Ba'lanq e geemyeq mael'ae naelhaeq yil hhei mael ngeelvae; Ba'lanq xitaeq laoq Ba'lel'ae aeqkeel'ae pyetoq e haqlo mael Yiqsellyel cholyaeq e yiqsi'ae baqdeel hhei yil lye tyuqcuq gol biq e qiq hhaeq'ae, kaol yoqhhaeteel'ae cholyaeq lye zongldu hhei e momilhael'ae heel gol e zaeqzael mael bi zaeq, kaol ochoq nyegael neemae bi ba yil. 15 Qiqsheel ngeelvae, noq e tyuqvae qiqhhaeq laelhhaeq eiq Niqge'la pail e tyuqcuq mael naelhaeq hhae. 16 Tyulkaol, nol laoq neemae paellael maoqhhae; neemae maeq paellael kaollaoq, ngael nae'naemyel noq e tyuqvae keelyi maoq, kaol ngaeq e myeqbongq onglci e niqboqmyel ta e maejyel maellye yoqhhaeteel nyegael diqgae maoq. 17 Naeqbol gaeq congl hael laoq senllinq mael, jiaolhuilhael'ae gee gil biq e saeziq mael naelhaeq maoqhhae. Yinqzaeq e cholyaeq laoq, ngael zonglhhaq deelhhei e maqnal mael yoqhhaeq'ae biq biq maoq, kaol yoqhhaeq'ae haqlo longqpul qiq siq biq hhei biq, haqlo taq'ae cholmil yosheq cu deelhhei, hhamul hhei biq e qiq hhaeq maoqlaol, qiq hhaeq eiq maeq siqcongl'ae.'"
Tuiyaqtui'la milcaeq e jiaolhuil'ae cu biq e xinl
18 "Nol Tuiyaqtui'la milcaeq e jiaolhuil e mqmae yosongl'ae xinl cu biq maoqhhae, gee: 'Momil e Yaqyo, ma'ne mael laoq aeqzaeq miqhulm laoqmyel, aeqkeel niqboq laoq zheelniqlye e geeqsheel laoqmyel e tyutaeq xilnye gee: 19 Ngael noq e xinqweiq xihael loq lil: Noq'ae neegaeqgaeq mael za, xinlxin za, duqhee'lye mul mael za, kaol renqnail mael eiq za'ae; ngael laoq nol aeqnaol naolli'ae haelzongl e meeq e silqinq mael, zhoqmyel fu ae'lye zongl mael taq'ae hhael naeq'ae lye eiq loq lil. 20 Ngeelfeiq, ngael noq'ae gaezaeq maoq e silqinq qiq mal za'ae, nol laoq aeqyoyoq xianzhi lil lye gee zaeq e cholhae aeqmae Yexiqbyeq vae renqnail biq'ae, yoqhhaeq ngaeq e yaqhacheqzaq e cholyaeqhael'ae tyuqcuq biq, kaol yoqhhaeteel'ae ochoq nyegael neemae bi ba, kaol cholyaeq lye zongl du hhei e momilhael'ae heel gol e zaeqzael mael zaeq lye cheeqmu gil biq hhae. 21 Ngael yoqhhaeq'ae neemae paellael maoqhhae lye jihuil biq gol biq aeqwae, ngeelfeiq, yoqhhaeq laoq ochoq nyegael neemaeba mael neemae maeq paellael nae'ae. 22 Naelhaeq, ngael yoqhhaeq yaol ssuqhhal taq'ae bi nael leeq deelhhei maoq. Yoqhhaeq nyegael neemaeba e tyuhael, yoqhhaeteel e xinqweiq mael neemae maeq paellael kaollaoq, ngael eiq yoqhhaeteel'ae haeqheemyel e saeqlael mael bi bael yo'li maoq. 23 Ngael eiq yoqhhaeq e yaeqguqhael yaol xyeqsil biq maoq, xilnye laol jiaolhuilhael laoq ngael cholyaeq e saqpoq neemae'ae nyuq mael siqcongl'ae lye hhae loq'ae, kaol ngael laoq noteel e xinqweiq maellye noteel'ae zonglhoq maoq. 24 Tuiyaqtui'la vae zhol e noteel onglci e baeqjyelboq e qiq miq laoq, geemyeq e xilmael'ae maeq cho'lyeq, Saqdanl e maeq liqgaiq ongl e yo'liq mael'ae maeq loq e cholyaeqhael'ae; ngael noteel'ae geegaeq laeqngeel, ngael baeqjyelboq e aeq'yel mael noteel e aeqhhaol taq'ae zail eiq maq baqcheeq vae. 25 Noteel laoq ngael keellael fu keellye, laefuq ae'lye za e tyulmael zongl gaeyil maoqhhae. 26 Ngaeq e minllinl mael aeqnaol naolli'ae keellye zongl gaeyil e yinqzaeq e cholyaeqhael vae laoq,
ngael yoqhhaeq'ae laqtaq biq hhei biq
kaol goqjahael'ae bi guanqliq maoq;
27 Yoqhhaeq laoq sulm e zaeqngeeq maellye,
yoqhhaeteel'ae guanqtyeq biq maoqlye hhae,
kaol milcaeq maellye zongldu hhei e moqgoq mael tyelxul biq laoqmyel hhae,