Saqdiq milcaeq e jiaolhuil'ae cu biq e xinl
3
"Nol Saqdiq milcaeq e jiaolhuil e mqmae yosongl'ae xinl cu biq maoqhhae, gee: 'Momil e yohael siq hhaeq kaol aeqgeel siq mal za e tyutaeq xilnye gee: Ngael noq e xinqweiq mael loq lil, miqyil taq'ae nol laoq dyeq hhae, qiqshiq laoq, nol laoq sil hhae. 2 Nol yuqnyuqgeel maoqhhae, kaol zholdeel siq e sil li maoq myel tyuhael'ae sseetae'lye bi ngeel, ngael noq e xinqweiq mael loq zaeq kaollil, nol ngaeq e Momil e yiqsi'ae laoq qiqgiq geehhael maqza myel e silqinq qiq mal eiq maqza hhae. 3 Tyulkaol, nol laoq haelmillye hhamul hhei laq hhae lye mael, kaol gaeq hhei hael neemae'ae nyuqtongq deelhhei maoqhhae, kaol xihael zongl gaeyil kaol neemae paellael maoqhhae. Nol yuqnyuqgeellye maeqngeel kaollaoq, ngael lolbiq laoqmyel keellael maoqlye lil; kaol nol laoq ngael haeqfu shiqshen vae noq e tyuqvae keellael hhae lye aeqdilmyel maeq loq'ae. 4 Ngeelfeiq, Saqdiq vae noq'ae aeqyoyoq e aelhongq mael'ae xinqlalmyel maeq zonglsu yo e cholyaeq mee'nae hhaeq zhol wae siq, yoqhhaeteel laoq aelhongq bachi'lye dum hhei aeqmyel ngaeq nyegael qiqgael deel maoqlye hhae, yoqhhaeteel hhae dum mael laoq zae kaol'ae. 5 Yinqzaeq e cholyaeq eiq xilnye bachi'lye aelhongq dum maoqhhae, ngael eiq aeqyil e suqhhaq taq ae'lye yoqhhaeq e cholmil mael maq hega yil; ngael laoq ngaedae yiqsi'ae, kaol ngaedae e mqmae yosonglhael e yiqsi ae'lye yoqhhaeq e cholmil mael cenqrenl biq maoq. 6 Naeqbol gaeq congl hael laoq senllinq mael, jiaolhuilhael'ae gee gil biq e saeziq mael naelhaeq maoqhhae.'"Fei'latyeqfei milcaeq e jiaolhuil'ae cu biq e xinl
7 "Nol Fei'latyeqfei milcaeq e jiaolhuil e mqmae yosongl'ae xinl cu biq maoqhhae, gee:
'Senljyeq, zaqgiq maqgiq,
kaol Dalweil e haedulm mael heil hheikaol,
pong hhei'laol qiq hhaeq eiq maeq piqtyeq ongl,
piqtyeq hhei'laol qiq hhaeq eiq
maeq pong hhei ongl e tyutaeq xilnye gee:
8 Ngael laoq noq e xinqweiq mael loq lil. Naelhaeq, ngael noq'ae noq e yiqsi'ae pong deelhhei e oheiq qiq mal biq laqngeel, cholyaeq qiq hhaeq eiq maeq piqtyeq ongl'ae. Ngael laoq nol aqha teel bo'ae, ngaeq e saeziq mael zongl gaeyil'ae, kaol ngaeq e cholmil mael'ae maeq loq yae lye maeq gee gol'ae lye loq lil. 9 Saqdanl huiltangq e cholyaeq laoq, aeqyoyoq Yoqtail cholyaeq lil lye gee zaeq hhae, qiqshiq laoq, Yoqtail cholyaeq maeqngeel'ae, zaqgiqgiq e cholyaeq'ae, ngael yoqhhaeteel yaol noq e aeqkeel yiqsi'ae bi tongqheel lael maoq, kaol yoqhhaeteel'ae ngael laoq noq'ae gaeq biq wae lye bi loq maoq. 10 Nol laoq ngaeq e renqnail e saeziq mael zongl gaeyil vae, ngael eiq mqmae holhhaq e cholyaeqhael'ae shilfu biq maoqlye fu, noq'ae maeq bi shilfu lye aeqdilmyel ocongq lil. 11 Ngael laoq aeqdilmyel nae'naemyel yi maoq vae; nol laoq noq e halzahael dye'ong'lye heiltyeq deelhhei maoqhhae, aeqgael cholyaeq lye noq e zongmae vuqcongq mael diqkoqzaeq yil laeqngeel. 12 Yinqzaeq e cholyaeq laoq, ngael yoqhhaeq yaol ngaeq e Momil e heelhaol onglci vae sseeldongq bi geiq maoq, kaol yoqhhaeq laoq tyuqvae lye qiqzael eiq maq duyil vae. Ngael laoq ngaeq e Momil e cholmil, kaol mqmae taq'ae ngaeq e Momil tyuqvae lye loq gayi e milmae heeqmyel Ye'lulsa'lenq yosheq e cholmil mael, yoqhhaeq taq'ae cuda hhei maoq; ngael ngaeq e cholmil yosheq mael eiq yoqhhaeq e aeqhhaol taq'ae cuda hhei biq maoq. 13 Naeqbol gaeq congl hael laoq senllinq mael, jiaolhuilhael'ae gee gil biq e saeziq mael naelhaeq maoqhhae.'"
Laoqdiqja milcaeq e jiaolhuil'ae cu biq e xinl
14 "Nol Laoqdiqja milcaeq e jiaolhuil e mqmae yosongl'ae xinl cu biq maoqhhae, gee: 'Amen lye gul biq e, neemae xyelpu maqpu e, zaqgiq maqgiq e bael mol e, Momil mqmae milcaeq zhoq zonglbeibei du hhei fu bael zongl e tyutaeq xilnye gee: 15 Ngael laoq noq e xinqweiq mael loq lil, nol laoq qyeq eiq maq qyeq, hongl eiq maq hongl myel hhae; ngael laoq nol qyeq maoq qyeq, paelsilmyel hongl maoq hongl aeqmyel ngeel biq lye nyuqlil. 16 Nol laoq hulmmye'lye eelcuq laoqmyel hhae, qyeq eiq maq qyeq, hongl eiq maq hongl myel hhae, ngael laoq ngaeq e myeqbongq ae'lye noq yaol myedu maoq. 17 Nol gee: Ngael laoq zacongl lil, yohaha lal aeqwae, kaol maq lo myel qiqgiq maqza yaevae, ngeelfeiq, nol aeqyoyoq laoq zhee saeq, hhaoqsaeqsaeq, qiqgiq maqza congl, mabyeq, kaol nyelguqlye yae lye maeq loq'ae. 18 Ngael laoq noq'ae ngaeq saeqvae lye aeqzaeq onglci vae lye pe du hhei e pulsheel mael vul lye haelmeeqlye gee laeqngeel, kaol noq'ae bi zacongl lael; aelhongq bachi'lye yol vul hheikaol dumda hhei, kaol noq e nyelguqlye saqdol mael maeq bi mol du'lal; ma'ne naeciq yol vul hheikaol noq e ma'ne mael'ae soda hhei, kaol noq'ae bi mol congl lael. 19 Ngael gaeq biq hael'ae laoq, ngael laoq gaezaeq biq kaol guanqjiaol biq lil. Tyulkaol, nol laoq laqheiqqyel lye ngeel maoqhhae, kaol neemae eiq paellael maoqhhae. 20 Naelhaeq, ngael oheiq nildu'ae haoqtul deelhhei kaol oheiq mael'ae cheq, aeqsul ngaeq e yotyel mael gaeq hhei'laol pong laeq kaollaoq, ngael yoqhhaeq e tyuqvae do'li, kaol ngael kaol yoqhhaeq, yoqhhaeq kaol ngael aelhoq qiqgael zaeq maoq. 21 Ngael yinqzaeq wae, kaol ngaedae e zongmae duqtyel taq'ae yoqhhaeq nyegael qiqgael zhol laoqmyel, yinqzaeq e cholyaeq vae, ngael yoqhhaeq'ae ngaeq e zongmae duqtyel taq'ae ngaeq nyegael qiqgael hhae baelzhol mael biq biq maoq. 22 Naeqbol gaeq congl hael laoq senllinq mael, jiaolhuilhael'ae gee gil biq e saeziq mael naelhaeq maoqhhae.'"