Mqmae taq e heel mael
4
Silqinq xihael aeqnaol, ngael chifu hhei'laol, mqmae taq'ae pong deelhhei e oheiq qiq mal mol aeqwae. Ngael laefuq fuqli qiq pu gaeq gol e dalhaol zhangq laoqmyel e yotyel mael ngaeq'ae gee laeq: "Nol saeqvae da'lal, ngael noq'ae aeqgael aeqdilmyel peqlal maoqlye e silqinqhael tyuqmyeq hhei laeqngeel." 2 Ngaeq'ae qiqlaqmyel senllinq ganqdongl laeq; kaol zongmae duqtyel qiq mal mqmae vae baq deelhhei, kaol zongmae duqtyel taq'ae cholyaeq qiq hhaeq zhol da deelhhei e mol aeqwae. 3 Zhol deelhhei e tyutaeq laoq, fu hhei'laol nyuljyeqlye yil kaol nyelcullye baoqshiq laoqmyel hhae; zongmae duqtyel mael'ae boldollolciq ciq'ongq deelhhei hhae, fu hhei'laol nyuljyeqlye baoqshiq laoqmyel hhae. 4 Zongmae duqtyel e dongqpyeq dongqjyel'ae duqtyel niqqyel yuq mael za'ae, holtaq'ae laoq aelhongq bachi'lye dum hhei, kaol vuqduq'ae laoq pulsheel zongmae vuqcongq congq hhei aeqmyel e zhangqlaoq niqqyel yuq hhaeq zhol deelhhei hhae. 5 Zongmae duqtyel ae'lye mqmiqmiq duyi, yotyel kaol mqziqziq mael gaeq duyi'ae. Zongmae duqtyel e yiqsi'ae aldoq siq mal keeqdoq deelhhei hhae, aldoq xi siq mal laoq, Momil e yohael siq hhaeq ngeelvae. 6 Zongmae duqtyel e yiqsi'ae shuiqjin laoqmyel e bo'liq eeldeel deelmae qiqgael za'ae. Zongmae duqtyel e dongqpyeq dongqjyel e yuq boq'ae yodyeq yuq yaeq zhol'ae, aeqhhaol qiqsiqmyel yiqsi aeqnaol myel ma'ne cuq bonggaebyel hhae. 7 Yodyeq dilyiq gol laoq shiziq laoqmyel dul hhae, yodyeq dil'el gol laoq lalbu buyaeq laoqmyel dul hhae, yodyeq dilsan gol laoq cholyaeq e maduq laoqmyel dul hhae, yodyeq dilsil gol laoq beel e haeqjyel laoqmyel dul hhae. 8 Yodyeq yuq yaeq'ae hae qiq yaeq vae eiq aeldongl koq mael cuq hhae, onglci nildu myel ma'ne cuq bonggaebyel hhae. Yoqhhaeteel mqkiq mqnao myel hhaeqnaeq maeqnaeq myel gee:
"Senljyeq vae! Senljyeq vae! Senljyeq vae!
Hhael'onglzaeq zaeqli Hhaoqsongl Momil;
yilkaeaeqnao zhol, yaeqnao zhol,
aeqgael haeqfu eiq zhol hhae!"
9 Haeqfu qiqzael yodyeq yuq yaeq lye rongqyaol mael, maduq zhee za mael, meeqyaevae lye mael zongmae duqtyel taq'ae zhol deelhhei e haeqfu eiq dyeqdeel e tyutaeq'ae biq biq fu, 10 Zhangqlaoq tyu niqqyel yuq hhaeq laoq oqbaqbaq ga hheikaol zongmae duqtyel taq'ae zhol deelhhei e haeqfu eiq dyeqdeel e tyutaeq'ae heel biq, kaol yoqhhaeteel e zongmae vuqcongq mael eiq zongmae duqtyel e yiqsi'ae heil deelhhei, kaol gee:
11 "Ngaeteel e Hhaoqsongl, ngaeteel e Momil,
nol laoq rongqyaol mael, maduq zhee za mael,
kaol laqtaq mael hhamul e zae'ae,
noq lye halza haelzholhael zonglbeibei du hhei kaol'ae,
halza haelzholhael laoq noq e zhiqyil maellye
bi zonglbeibei du hheikaol za hhae."