Luhhei suqhhaq kaol aeqyol yolyaeq
5
Ngael zongmae duqtyel'ae zhol e tyutaeq e laqsseq'ae luhhei suqhhaq heil hhei mol aeqwae, xyelpu boq xyelmael boq myel zil cuda deelhhei hhae, kaol gailzang siq mal kei da hhei hhae. 2 Ngael aqha zhee bo e mqmae yosongl qiq hhaeq yotyel ha'lye geedu hhei mol aeqwae, gee: "Aeqsul luhhei suqhhaq tyulmael diqpye hhei, kaol gailzangkei da hhei mael eepong hhei zae laeq?" 3 Mqmae taq'ae haoq, milcaeq taq'ae haoq, milcaeq holhhaq haoq, luhhei suqhhaq tyulmael diqpye hheikaol fu maoqlye qiq hhaeq eiq maeq ongl'ae. 4 Luhhei suqhhaq tyulmael diqpye hheikaol fu mael zae e qiq hhaeq eiq maeq saelpopuq hhei ongl'ae, tyulkaol, ngael yotyel ha'lye nyul lil. 5 Zhangqlaoqhael onglci e qiq hhaeq ngaeq'ae gee laeq: "Haeq nyul. Fu hhei, Yoqdal zhipail onglci e shiziq, Dalweil e aelbol dongqcil, yoqhhaeq yinqzaeq aeqwae, kaol luhhei suqhhaq tyulmael diqpye hhei ongl'ae, gailzangkei da hhei e siq mal eepong hhei ongl'ae." 6 Ngael zongmae duqtyel kaol yodyeq yuq yaeq, kaol zhangqlaoqhael onglci'ae aeqyol yolyaeq haoqtul deelhhei yol mol aeqwae, aeqyol yolyaeq mael laoq xyeq gol biq e laoqmyel hhae, yoqhhaeq'ae laoq vuqkyul siq mal kaol ma'ne siq mal cuq hhae, vuqkyulhael kaol ma'nehael laoq, Momil e senllinq siq mal ngeelvae, milcaeq taq'ae haeqvae lael'ee myel yil lye moqheilheil du hhei biq hhae. 7 Aeqyol yolyaeq xilmael laefuqboq'ae deel da'li, kaol zongmae duqtyel taq'ae zhol e tyutaeq e laqsseq ae'lye luhhei suqhhaq mael heil hhei. 8 Yoqhhaeq luhhei suqhhaq mael zhoq heil hhei'laol, yodyeq yuq yaeq kaol zhangqlaoq niqqyel yuq hhaeq laoq aeqyol yolyaeq e yiqsi'ae oqbaqbaq ga hhei, haetaeq eiq dilhongq kaol xiang bong'lye zoq e pulsheel jyelpeeq heil hhei hhae; xiang xihael laoq senltuqhael e heeldoq'ae. 9 Yoqhhaeteel changlgo yosheq changl, gee:"Nol luhhei suqhhaq heil mael zae'ae,
kaol gailzangkei da hhei mael eepong hhei mael eiq zae'ae,
nol laoq bi xyeq gol vae,
nol aeqyoyoq e siq maellye,
maeq qiqsheel e zhipail,
maeq qiqsheel e saeziq,
maeq qiqsheel e minqcuq,
maeq qiqsheel e goqja ae'lye cholyaeq vul laq,
kaol yoqhhaeteel yaol Momil boq'ae bi pollael,
10 Yoqhhaeteel yaol goqja e cholyaeq,
kaol jilsi eiq bi peqlal,
kaol aedeeteel e Momil boq'ae yol bi pollael;
yoqhhaeteel milcaeq taq'ae zongmae geiq,
kaol guanqliq maoqlye hhae."
11 Ngael yol fu hhei'laol, ngael laoq zongmae duqtyel, yodyeqhael kaol zhangqlaoqhael e dongqpyeq dongqjyel vae, haelnaeqmyel mqmae yosongl e yotyel gaeq wae; yoqhhaeteel e sulmuq mael laoq mee'nae ca mee'nae tongl zoq'ae. 12 Yoqhhaeteel yotyel ha'lye gee:
"Xyeq gol biq e aeqyol yolyaeq laoq, onglzaeq mael,
duqgongqgongq mael, geel mael, aqha mael,
maduq zhee za mael, rongqyaol mael,
kaol maeqdaeqhhaeq'ae lye gee biq mael hhamul e zae'ae."
13 Ngael mqmae taq'ae, milcaeq taq'ae, milcaeq holhhaq'ae, eeldeel deelmae onglci'ae zongldu hhei biq hael, kaol mqmae milcaeq kaeqlaeq'ae haelzholhael, xilnye gee mael gaeq wae:
Maeqdaeqhhaeq mael, maduq zhee za mael,
rongqyaol mael, kaol laqtaq mael,
gilzuqmyel zongmae duqtyel taq'ae
zhol e tyutaeq'ae kaol aeqyol yolyaeq'ae,
haeqfu keellye heil biq lye nyuqlil!"
14 Yodyeq yuq yaeq gee: "Amen!" Zhangqlaoqhael eiq oqbaqbaq ga hheikaol heel gil'ae.