Gailzangkei da hhei mael eepong hhei
6
Ngael aeqyol yolyaeq lye gailzangkei da hhei e siq mal onglci e laefuq fuqli e tyu qiq mal eepong hhei mol fu, yodyeq yuq yaeq onglci e qiq yaeq e yotyel mael gaeq wae, yoqtyel mael laoq mqziqziq laoqmyel'ae, gee: "Nol lael!" 2 Ngael chifu hhei'laol, maoqpul qiq yaeq mol aeqwae, aeqmaoq taq'ae ziq hhei e qiq hhaeq'ae laoq kamaq heil hhei, kaol yoqhhaeq'ae zongmae vuqcongq biq hhei biq'ae. Yoqhhaeq duyi kaol daqzhangl diq yil, maeq diq yinq ongl myel maqza'ae. 3 Aeqyol yolyaeq lye gailzangkei da hhei e dil'el gol mael eepong hhei fu, ngael dil'el gol yodyeq gee mael gaeq wae: "Nol lael!" 4 Baeqjyelboq e aeqmaoq qiq yaeq du'lal, aeqmaoq mael laoq nyelcullye hhae; laqtaq mael laoq aeqmaoq ziq e tyutaeq'ae biq hhei biq, kaol tyutaeq milcaeq taq'ae neesaelhhae mael diqkoqzaeq yil, kaol qiqhhaeq qiqhhaeq'ae bi xyeq; yoqhhaeq'ae maejyel jyelmae qiq mal yol hhamul hhei biq. 5 Aeqyol yolyaeq lye gailzangkei da hhei e dilsan gol mael eepong hhei fu, ngael yodyeq dilsan gol gee mael gaeq wae: "Nol lael!" Ngael chifu hhei'laol, maoqna qiq yaeq mol aeqwae; aeqmaoq taq'ae ziq hhei e qiq hhaeq e aqlaq'ae sagil baq hhei hhae. 6 Ngael yodyeq yuq yaeq onglci'ae yotyel xilnye gee laoqmyel gaeqlael yae, gee: Pulziq dyuqbaq qiq mal lye meqziq yil sen vul hhei, pulziq dyuqbaq qiq mal lye dalmeq san sen vul hhei; cil kaol zilbaeq mael laoq laeqdaeqmyel maeq hhae zonglhael'ae." 7 Aeqyol yolyaeq lye gailzangkei da hhei e dilsil gol mael eepong hhei fu, ngael yodyeq dilsil gol gee mael gaeq wae: "Nol lael!" 8 Ngael chifu hhei'laol, maoqpeel qiq yaeq mol aeqwae; aeqmaoq taq'ae ziq hhei e qiq hhaeq e cholmil mael laoq "Sil" lye gul biq hhae, mil'oq mael eiq yoqhhaeq'ae cho'lyeq hhae; yoqhhaeteel'ae laqtaq biq hhei biq, kaol maejyel, qiqgiq zaeq eiq maqza e hoqlaq, doqlal kiq e naelgol, kaol byeljyeq maellye milcaeq taq e yuq hhaeq onglci e qiq hhaeq yaol bi zonglsil yil.9 Aeqyol yolyaeq lye gailzangkei da hhei e dilvuq gol mael eepong hhei fu, ngael jiltanq e holhhaq vae Momil e saeziq gae'lye kaol zoqzenl gae'lye xyeq gol biq e cholyaeq e yohael mael mol aeqwae, 10 Yoqhhaeteel yotyel ha'lye gul gae'lael aeqmyel gee: "Senljyeq kaol aeqdilmyel e Hhaoqsongl o, nol milcaeq taq'ae zhol e cholyaeqhael'ae maeq shenqpanl biq, kaol ngaeteel yaol bi xyeq kaol siq bi yul e silqinq mael'ae maq bal gaiqjiq laq mael haeqfu'ae keel maoqlye laeq?" 11 Yoqhhaeteel'ae haetaeq vae eiq bachi'lye poljye qiq ko biq hhei biq vae; yoqhhaeteel'ae hhaeqnaeq qiqlaq naeq siq lye saeziq yol gee biq, yoqhhaeteel nyegael yaqha qiqgael cheqzaq e cholyaeqhael, kaol yoqhhaeteel laoqmyel bi xyeq e aqsseq aeqnilhael e sulmuq mael lo fu'ae keellye doqkeel. 12 Aeqyol yolyaeq lye gailzangkei da hhei e dilluq gol mael eepong hhei fu, ngael fu hhei'laol, milcaeq mael milho homae ho tullaeq, neelmae mael naheiqlye peqyil hheikaol palha laoqmyel dul'ae, kaol baehae qiq mal myel nyelcullye peqyil hheikaol siq laoqmyel dul'ae, 13 Mqmae taq e aeqgeelhael milcaeq taq'ae leeq gaeyi, siqpyu'laq'oq aelbol mael zaeqxil xilmae maellye bo'ni biq kaol aelsiq maq hhoq myel leeq gaeyi laoqmyel mol aeqwae. 14 Mqmae mael heille li vae, suqhhaq lu laoqmyel lutyeq hhei'ae; geeqzhoqhael kaol haiqdaoqhael gilzuqmyel laefuq za myel ae'lye bi zitael yil vae. 15 Milcaeq taq e zongmaehael, zhiqmoqhael, dangbinkeihael e yoheeqhael, yohahael, onglzaeqhael, hhaeq'ongq ongqzaeq e cholyaeqhael, kaol zilyoq cholyaeq, gilzuqmyel geeqzhoqhael e gonglbyu kaol haqlohael e kaeqlaeq'ae hoqhhaq li, 16 Kaol yoqhhaeteel geezhoqhael'ae kaol haqlohael'ae gee biq: "Noteel ngaeteel e aeqhhaol taq'ae leeq dayi maoqhhae, kaol ngaeteel yaol zonglhhaq laq maoqhhae, kaol ngaeteel laoq zongmae duqtyel taq'ae zhol e qiq hhaeq e maduq mael'ae, kaol aeqyol yolyaeq e faqhoqkei mael'ae hoqhhaq maoq; 17 Yoqhhaeteel'ae faqhoqkei mael puqli biq e naohaeq haeqmae keellael vae kaol'ae, kaol aeqsul haoqtul ongl laeq?"