Yiqsellyel cholyaeq qyel'yuq tongl yuqca hhaeq'ae gailzangkei da hhei biq
7
Silqinq xihael aeqnaol, ngael mqmae yosongl yuq hhaeq milcaeq e laeqkyul yuq mael taq'ae haoqtul, kaol milcaeq taq e yuq boq e zaeqxilhael'ae guanqliq mol aeqwae, kaol zaeqxilhael milcaeq taq'ae, eeldeel deelmae taq'ae kaol maeq qiqsheel myel aelbol taq'ae maeq bi bo'ae. 2 Ngael laoq baeqjyelboq e mqmae yosongl qiq hhaeq, neelmae byuqdu myel ae'lye da'lal mol aeqwae, haeqfu eiq dyeqdeel e Momil e gailzangkei mael heil hhei hhae. Yoqhhaeq laoq milcaeq kaol eeldeel deelmae mael'ae zonglnael ongl e laqtaq za e mqmae yosongl yuq hhaeq'ae yotyel ha'lye gul biq, 3 Gee: "Noteel laoq milcaeq, eeldeel deelmae kaol aelbol sheeqcongqhael'ae maeq hhae zonglnael biq'ae, ngaeteel lye aedeeteel e Momil e yeqhacheqzaq e cholyaeqhael e naeqdeel taq'ae, gailzangkei da hhei biq fu keellye doqkeel maoqhhae." 4 Ngael Yiqsellyel cholyaeq onglci'ae zhipailhael'ae gailzangkei yo e sulmuq mael gilzuqmyel qyel'yuq tongl yuqca (144000) hhaeq zoq'ae lye gaeq wae;5 Yoqdal zhipail onglci'ae
gailzangkei yo e cholyaeqhael laoq qiqtongl niqca (12000) hhaeq'ae;
Liuqbenq zhipail onglci'ae qiqtongl niqca (12000) hhaeq'ae;
Jadeq zhipail onglci'ae qiqtongl niqca (12000) hhaeq'ae;
6 Yalshel zhipail onglci'ae qiqtongl niqca (12000) hhaeq'ae;
Naqfuqta'lil zhipail onglci'ae qiqtongl niqca (12000) hhaeq'ae;
Maqnaqxi zhipail onglci'ae qiqtongl niqca (12000) hhaeq'ae;
7 Ximianq zhipail onglci'ae qiqtongl niqca (12000) hhaeq'ae;
Lilveil zhipail onglci'ae qiqtongl niqca (12000) hhaeq'ae;
Yiqsalja zhipail onglci'ae qiqtongl niqca (12000) hhaeq'ae;
8 Xibullunq zhipail onglci'ae qiqtongl niqca (12000) hhaeq'ae;
Yoqsel zhipail onglci'ae qiqtongl niqca (12000) hhaeq'ae;
Bianlyaqminq zhipail onglci'ae
gailzangkei yo e cholyaeq qiqtongl niqca (12000) hhaeq'ae;
Haelnaeqmyel cholyaeq maeq qiqsheel myel goqja ae'lye lael
9 Silqinq xihael aeqnaol, ngael chifu hhei'laol, haelnaeqmyel cholyaeq mol aeqwae, suq eiq maeq suqda ongl, maeq qiqsheel e goqja, maeq qiqsheel e zhipail, maeq qiqsheel e minqcuq, maeq qiqsheel e saeziq gee e cholyaeqhael ae'lye lael hhae, kaol zongmae duqtyel kaol aeqyol yolyaeq e yiqsi'ae haoqtul deelhhei hhae, bachi'lye poljye dum hhei, aqlaq mael'ae laoq congqzheel allaq heil hhei aeqmyel hhae, 10 Kaol yotyel ha'lye gul gae'lael aeqmyel gee:
"Jiul'en mael laoq zongmae duqtyel taq'ae
zhol e aedeeteel e Momil,
kaol aeqyol yolyaeq ae'lye lael hhae!"
11 Mqmae yosonghael laoq zongmae duqtyel kaol zhangqlaoqhael, kaol yodyeq yuq yaeq e dongqpyeq dongqjyel vae, zongmae duqtyel e yiqsi'ae maduq mael milcaeq'ae tongqmaoq yil aeqmyel Momil'ae heel biq, 12 Gee:
"Amen! Maeqdaeqhhaeq mael, rongqyaol mael, geel mael,
meeqyaevae lye gee mael, maduq zhee za mael, onglzaeq mael,
kaol aqha mael, gilzuqmyel aedeeteel e Momil'ae
haeqfu keellye biq biq. Amen!"
13 Zhangqlaoqhael onglci e qiq hhaeq ngaeq'ae naelhaeq laeq: "Poljye bachi'lye dum hhei e xihael aeqsulsul maeq? Haeqvae lye lael gil hhaemaeq?" 14 Ngael yoqhhaeq'ae gee biq: "Ngaeq e Hhaoqsongl o, nol laoq loq'ae." Yoqhhaeq ngaeq'ae gee laeq: "Cholyaeq xihael'ae saeqlael laelmae puqli gol biq hhae, yoqhhaeteel laoq aeqyol yolyaeq e siq maellye poljye mael bachi'lye ciq bae gol hhae. 15 Tyulkaol, yoqhhaeteel Momil e zongmae duqtyel e yiqsi'ae zhol,
mqkiq mqnao myel yoqhhaeq e heelhaol onglci'ae
yoqhhaeq'ae fuqsil biq;
zongmae duqtyel taq'ae zhol e tyutaeq laoq,
Yoqhhaeteel onglci'ae zhol,
kaol yoqhhaeteel'ae ocongq biq maoqlye hhae.
16 Yoqhhaeteel maq myeq kael vae,
suq eiq maq suq kael vae;
neelmae mael yoqhhaeteel'ae maeq zonglnael biq,
gilzuqmyel honglbo'lye mael eiq
yoqhhaeteel'ae maeq zonglnael biq'ae,
17 Zongmae duqtyel onglci e aeqyol yolyaeq laoq,
aeqdilmyel yoqhhaeteel'ae zonglcu biq maoqlye hhae,
kaol yoqhhaeteel yaol aeqyil eelcuq e eelbi'ae sheeqli biq maoqlye kaol'ae;
Momil laoq aeqdilmyel yoqhhaeteel e ma'eel mael xyega biq maoqlye hhae."