Gailzangkei da hhei e dilqiq gol kaol xiang pe e pulsheel jyelpeeq mael
8
Aeqyol yolyaeq lye gailzangkei da hhei e dilqiq gol mael eepong hhei fu, mqmae taq'ae qiqgiq yotyel maeq gaeq myel banl gol xiaoqshiq laellye zoq wae. 2 Ngael Momil e yiqsi'ae mqmae yosongl tyu siq hhaeq haoqtul deelhhei mol aeqwae, yoqhhaeteel'ae dalhaol siq mal heil hhei biq'ae. 3 Baeqjyelboq e mqmae yosongl qiq hhaeq xiang pe e pulsheel jyelpeeq heil hhei aeqmyel lael'ae, kaol jiltanq e dongqpyeq'ae haoqtul deelhhei hhae; kaol yoqhhaeq'ae haelnaeqmyel xiang heil hhei biq, kaol senltuqhael e heeldoq mael nyegael, zongmae duqtyel e yiqsi'ae pulsheel jiltanq taq'ae qiqgael bi heelda hhei maoqlye hhae. 4 Xiang pe e aeqhaoq kaol senltuqhael e heeldoq mael, hhaellaelmyel mqmae yosongl e aqlaq onglci ae'lye Momil e yiqsi'ae haoq da'li'ae. 5 Mqmae yosongl'ae xiang pe e jyelpeeq heil hhei hhae, onglci'ae laoq jiltanq e aeqzaeq mael heil bong do hhei hhae, kaol milcaeq'ae xyehael gae hhei; kaol mqziqziq tullaeq, yotyel gaeqlael, mqmiqmiq tullaeq, milhoho tullaeq vae.Dalhaol siq mal
6 Dalhaol siq mal heil hhei e mqmae yosongl siq hhaeq dalhaol zhangq maoq vae lye paeqgaelsael meeq hhei vae. 7 Dilyiq gol mqmae yosongl dalhaol zhangq laol, heelsiq kaol aeqzaeq doq mael siq keq ga'lal aeqmyel milcaeq taq'ae beiqgae hhei; kaol milcaeq suq pa onglci e qiq pa kaol aelbol suq bol onglci e qiq bol mael pezaq hhei vae, gilzuqmyel haelsaeqhael eiq pezaq byel vae. 8 Dil'el gol mqmae yosongl dalhaol zhangq laol, aeqzaeq doq e geeqzhoq zhoqmae laoqmyel mael eeldeel deelmae vae beiq do hhei; eeldeel deelmae suq pa onglci e qiq pa laoq siq peqyil vae, 9 Eeldeel deelmae onglci'ae zongldu hhei biq e aeqyil za e yodyeqhael laoq suq mal onglci e qiq mal sil vae, hoq mael eiq suq mal onglci e qiq mal zonglba vae. 10 Dilsan gol mqmae yosongl dalhaol zhangq laol, aeqzaeq doq e aeqgeel geelmae mael laoq aldoq laoqmyel mqmae ae'lye leeq gaeyi hhae, kaol lolbaeq suq lol onglci e qiq lol vae, kaol eelcuqhael e eelbi taq'ae leeq doyi. 11 Aeqgeel xilmael'ae "haeqjyeqlye eilhaeq" lye gul biq hhae; eelcuqhael e suq pa onglci e qiq pa laoq haeqjyeqlye eilhaeq laoqmyel peqyil hhei vae, kaol haelnaeqmyel cholyaeq eelcuq mael haeqjyeqlye peqyil gae'lye sil vae. 12 Dilsil gol mqmae yosongl dalhaol zhangq laol, neelmae suq pa onglci e qiq pa, baehae suq pa onglci e qiq pa, kaol aeqgeelhael suq pa onglci e qiq pa'ae tyel biq hhae, kaol neelmae, baehae, aeqgeelhael suq pa onglci e qiq pa nahongqlye peqyil hhei, mqnao suq pa onglci e qiq pa laoq aeqcael maqza'ae, mqkiq eiq xilnye hhae. 13 Ngael chifu hhei'laol, mqmae vae beel e haeqjyel qiq yaeq yotyel ha'lye gee mael gaeq wae: "Zaihuol za vae! Zaihuol za vae! Zaihuol za vae! Milcaeq taq e cholyaeqhael o, baeljyelboq e mqmae yosongl suq nulhhaeq dalhaol zhangq goq biq vae!"