9
Dilvuq gol mqmae yosongl dalhaol zhangq laol, ngael aeqgeel qiq siq mqmae ae'lye milcaeq taq'ae leeq gaeyi mol aeqwae; dongqto maqza e duqhongq e haedulm mael yoqhhaeq'ae heil hhei biq. 2 Yoqhhaeq lye dongqto maqza e duqhongq mael diqpong hhei'laol, aeqhaoq mael duqhongq ae'lye haoq da'laq vae, yuqduq duqmae e aeqhaoq laoqmyel hhae; neelmae kaol mqmae eiq aeqhaoq xilmael gae'lye nahongqlye peqyil vae. 3 Aeldyelhael aeqhaoq onglci ae'lye duyi, kaol milcaeq taq'ae beel keelyi, milcaeq taq e xyeziq mael onglzaeq mael za laoqmyel, yoqhhaeteel'ae onglzaeq mael biq hhei biq. 4 Aeldyelhael'ae milcaeq taq e haelsaeq, maeq qiqsheel myel nyuljyeqlye aelbol haelsaeq kaol maeq qiqsheel myel aelbolhael'ae maeq hhae zonglnael biq'ae, naeqdeel taq'ae Momil yinlzhang maeq yinl da hhei e cholyaeqhael'ae maoq maeq hhae zonglnael biq'ae lye moqheilheil e saeziq gee biq; 5 Ngeelfeiq, aeldyelhael'ae yoqhhaeteel'ae baehae ngaeq siq bi nael maoqlaol, yoqhhaeteel'ae maeq bi zonglsil'ae; nael e xilmael laoq cholyaeq'ae xyeziq maellye deiq biq kaol nael laoqmyel hhae. 6 Tyuqfu naohaeq'ae, cholyaeq sil maoqlye geezaeq'ae, ngeelfeiq, maeq sil yilkiq biq'ae; sil goq biq'ae, ngeelfeiq, sil mael laoq yoqhhaeteel ae'lye kisae biq'ae.7 Aeldyelhael e yanglziq mael laoq paeqgaelsael meeq hhei biq e daqzhangldiq maoq vae lye e aeqmaoq laoqmyel hhae, vuqduq taq'ae congq hhei mael laoq pulsheel zongmae vuqcongq laoqmyel hhae, maduq mael laoq cholyaeq e maduq laoqmyel hhae, 8 Qyelkeel mael laoq haeqmiyaeq e qyelkeel laoqmyel hhae, myeqsheq mael laoq shiziq e myeqsheq laoqmyel hhae; 9 Aeldyelhael e neeto'ae ocongq aelhongq dum hhei hhae, sulm e ocongq aelhongq laoqmyel hhae, aeldongl diqho mael laoq haelnaeqmyel e aeqmaoq, cheziqhael daqzhangldiq yil fu ki e yotyel laoqmyel hhae. 10 Yoqhhaeteel'ae dongqmiq cuq'ae, xyeziq laoqmyel duq zoq e aelgong cuq hhae, dongqmiq taq e duq zoq e aelgong mael laoq cholyaeq'ae baehae ngaeq siq bi zonglnael ongl hhae. 11 Dongqto maqza e duqhongq'ae guanqliq e mqmae yosongl laoq aeldyelhael e zongmae geiq hhae, Xiboqlaiq saeziq laoq Yalbadunla lye gul biq hhae, Xi'lal saeziq laoq Yalbo'lunq lye gul biq hhae.
12 Dilyiq gol zaihuol gol hhei vae; naelhaeq, xilmael aeqnaol'ae, zaihuol niq sheel lael maoqlye wae siq. 13 Dilluq gol mqmae yosongl dalhaol zhangq laol, ngael laoq Momil e yiqsi e pulsheel jiltanq e yuqkyul yuqboq ae'lye yotyel gaeq duyi gaeq wae, 14 Yotyel tyulmael dalhaol zhangq e dilluq gol mqmae yosongl'ae moqheilheil biq, gee: "Yolfa'ladiq lolbaeq baeqmae'ae kaltoq deelhhei e mqmae yosongl yuq hhaeq yaol pyeqduhoq hhei biq." 15 Mqmae yosongl tyu yuq hhaeq yaol pyeqduhoq hhei biq vae; yoqhhaeteel paeqgaelsael meeq deelhhei aeqwae, kaol gee deelhhei e xi qiq hoq e baehae xi qiq siq e xi qiq nao e xi yiq gol shiqshen'ae, cholyaeq sul hhaeq onglci e qiq hhaeq yaol xyeq maoqlye hhae. 16 Aeqmaoq ziq hhei aeqmyel daqzhangldiq e cholyaeq laoq liangqyil'ae; yoqhhaeteel e sulmuq mael laoq ngael gaeq wae. 17 Ngael yilxiangl onglci'ae lye aeqmaoq kaol aeqmaoq ziq e tyuhael mol aeqwae: Aeqmaoq ziq e cholyaeqhael e neeto'ae dulm hhei e ocongq aelhongq e yanqseq mael laoq nyelcullye, ziqseq e maqnaoq kaol liuqhuangq laoqmyel hhae. Aeqmaoq e vuqduq mael laoq shiziq e vuqduq laoqmyel hhae. Aeqzaeq doq, aeqhaoq kaol liuqhuangq mael aeqmaoq e myeqbongq ae'lye bo du hhei. 18 Aeqmaoq e myeqbongq ae'lye aeqzaeq doq, aeqhaoq kaol liuqhuangq bo du hhei e zai'nanl xi suq sheel lye, cholyaeq sul hhaeq onglci e qiq hhaeq yaol xyeq vae. 19 Aeqmaoq e onglzaeq mael laoq yoqhhaeteel e myeqbongq kaol dongqmiq'ae za hhae; yoqhhaeteel e dongqmiq mael laoq oqhol laoqmyel hhae, kaol vuqduq cuq'ae, vuqduq maellye cholyaeq'ae zonglnael laelkiq hhae.
20 Baeqjyelboq e zai'nanl xihael lye maq xyeq e cholyaeqhael laoq, aeqyoyoq e aqlaq maellye haelzonglhael taq'ae neemae maeq paellael wae siq, niqhaeq haeqmae, pulsheel, pulziq, geeqsheel, aelbol kaol haqlo maellye zongldu hhei e maeq mol congl, maeq naelhaeq kiq, maeq deel yil kiq e momilhael'ae heel yil wae siq. 21 Yoqhhaeteel eiq aeqyoyoq zongl gol e, cholyaeq xyeq, niqhaeq tulzaeq, ochoq nyegael neemaeba, lolbiq haoqzaeq e silqinq xihael ae'lye neemae maeq paellael nae'ae.