Mqmae yosongl kaol meelhee'lye e luhhei suqhhaq
10
Ngael laoq baeqjyelboq e aqha zhee bo e mqmae yosongl qiq hhaeq mqmae ae'lye gaeyi yol mol aeqwae, yoqhhaeq'ae laoq mqdul pi hhei, vuqduq holtaq'ae laoq boldollolciq za, maduq mael laoq neelmae laoqmyel'ae, aeqkeel niqboq laoq aeqzaeq doq e sseeldongq laoqmyel hhae. 2 Yoqhhaeq e aqlaq onglci'ae laoq diqpye hhei e meelhee'lye e luhhei suqhhaq mael heil hhei hhae. Yoqhhaeq e laqsseq boq e aeqkeel mael laoq eeldeel deelmae taq'ae nuq deelhhei, laeqbaelboq e aeqkeel mael laoq milcaeq taq'ae nuq deelhhei hhae, 3 Yotyel ha'lye gul, kaol shiziq gyuq laoqmyel hhae. Yoqhhaeq gul fu, mqziq siq mal yotyel ziq ho duyi. 4 Mqziq siq mal saeziq gee fu, ngael cu du hhei maoqlye zhoq zongl laol, mqmae ae'lye yotyel gaeq duyi, gee: "Mqziq siq mal gee e saeziq mael, nol haeq geedu yil, maq hha cuga hhei'ae." 5 Ngael mol e eeldeel deelmae taq'ae, kaol milcaeq taq'ae nuq deelhhei e mqmae yosongl tyutaeq laoq laqsseq mael mqmae'ae baqqei da hhei'ae, 6 Mqmae kaol mqmae taq e halzahael, milcaeq kaol milcaeq taq e halzahael, eeldeel deelmae kaol eeldeel deelmae onglci'ae haldyeqhael zongldu e, haeqfu keellye dyeqdeel e tyutaeq'ae tyuq deelhhei kaol faqsilkei, gee: "Jihuil zail eiq maqza vae." 7 Ngeelfeiq, dilqiq gol mqmae yosongl dalhaol zhangq maoqlye e naohaeq'ae, Momil yoqhhaeq e xianzhi geiq e yaqhacheqzaq e cholyaeqhael'ae yotyel ha'lye geedu hhei biq e saeziq laoqmyel, Momil e aolmiq mael peqlal goq biq vae.8 Ngael laefuq mqmae ae'lye gaeq e yotyel tyulmael ngaeq'ae moqheil yol heil laeq, gee: "Nol yil, eeldeel deelmae kaol milcaeq taq'ae nuq da deelhhei e mqmae yosongl tyutaeq e aqlaq ae'lye diqpye hhei e meelhee'lye e luhhei suqhhaq mael heil pol laeq." 9 Kaol ngael mqmae yosongl e tyuqvae keelli, kaol yoqhhaeq'ae gee biq, yoqhhaeq'ae meelhee'lye e luhhei suqhhaq mael ngaeq'ae heil laeq lye gee biq lil. Yoqhhaeq ngaeq'ae gee laeq: "Nol heilsae yil, kaol suqhhaq mael zaeq byel hhei. Suqhhaq mael laoq noq e oqma mael bi haeq tullaeq kiq'ae, ngeelfeiq, noq e myeqbongq onglci'ae laoq baq'eel laoqmyel chilzu'lye hhae." 10 Tyulnye laol, ngael mqmae yosongl e aqlaq onglci ae'lye meelhee'lye e luhhei suqhhaq mael heil pol hhei, kaol luhhei suqhhaq mael zaeq byel aeqwae, ngaeq e myeqbongq onglci'ae aeqdilmyel baq'eel laoqmyel chilzu'lye hhae, zaeq hhei aeqnaol, ngaeq e oqma mael laoq haeqjyeqlye zongl yae. 11 Mqmae yosonglhael ngaeq'ae gee laeq: "Nol aeqdilmyel haelnaeqmyel e minqcuq, goqja, saeziq kaol zongmaehael'ae peqlal maoqlye mael gee biq."