Bael mol e cholyaeq niq nulhhaeq
11
Mol'ongq qiq kongq za, baqzae fu mul e baelkongq laoqmyel hhae, ngaeq'ae biq hhei laq; kaol saeziq yol gee: "Tullael! Momil e heelhaol, jiltanq mael'ae baqzae fufu, kaol heelhaol onglci'ae heel e cholyaeqhael yaol suqda fufu. 2 Ngeelfeiq, heelhaol e dyekaeq mael laoq maq baqzae kael'ae, xilmael laoq baeqjyelboq minqcuq'ae heil biq maoqlye kaol'ae; yoqhhaeteel senljyeq milmae heeqmyel mael'ae baehae yuqqyel niq siq nuqhaeq biq maoqlye hhae. 3 "Ngael laoq ngaeq e bael mol e cholyaeq tyu niq nulhhaeq'ae laqtaq biq biq maoq, kaol ziq e aelhongq dum hhei aeqmyel peqlal maoqlye geedu mael qiqca niqhael koqqyel (1260) nao gee maoqlye hhae." 4 Yoqhhaeteel laoq shilgail e Hhaoqsongl yiqsi'ae haoqtul e zhoqcae aelbol niq bol, kaol denjal niq mal ngeelvae. 5 Cholyaeq yoqhhaeteel'ae zonglnael goq biq kaollaoq, aeqzaeq mael yoqhhaeteel e myeqbongq ae'lye bo du hhei, kaol diqrenq yaol pe sil hhei; aeqsul yoqhhaeteel'ae zonglnael goq biq laol, yoqhhaeq yaol aeqdilmyel xilnye bi xyeq maoqlye hhae. 6 Cholyaeq xi niq nulhhaeq laoq mqmae mael piqtyeq hhei, kaol yoqhhaeteel peqlal maoqlye mael geedu hhei e naohaeq'ae aeq'yel maeq bi yel e laqtaq za'ae; kaol eelcuq mael siq bi peqyil, kaol maeq qiqsheel myel zai'nanl maellye milcaeq mael'ae haeqfu haelmillye bi yo'li goq laol haeqfu haelmillye bi yo'li e laqtaq eiq za'ae. 7 Yoqhhaeteel zoqzenlkei byel hhei'laol, dongqto maqza e duqhongq vae lye da'lal e byeljyeq tyu qiq yaeq yoqhhaeteel nyegael diqgae maoqlye hhae, kaol yoqhhaeteel yaol yinqzaeq biq, kaol yoqhhaeteel yaol xyeq biq vae. 8 Yoqhhaeteel e sil e aeqhhaol mael laoq haeqheemyel milmae heeqmyel e gaiziq'ae leeqgul deelhhei maoqlye hhae; milmae heeqmyel xilmael laoq, yoqhhaeteel e Hhaoqsongl yaol shiqziljal'ae diqcheeq biq e milcaeq ngeelvae. Milmae heeqmyel xilmael'ae dullaelmyel e loqho maellye mil kaollaoq Soqdomaq lye gul biq hhae, Aijiq lye eiq gul biq hhae. 9 Maeq qiqsheel myel minqcuq, maeq qiqsheel myel zhipail, maeq qiqsheel myel saeziq, kaol haelnaeqmyel goqjahael onglci'ae, cholyaeq yoqhhaeteel e sil e aeqhhaol mael'ae suq nao pa chifu aeqwae, cholyaeqhael'ae sil e aeqhhaol mael fuq'ongl vae maeq bi baqduqm'ae. 10 Milcaeq taq'ae zhol e cholyaeqhael laoq yoqhhaeteel gae'lye hhaol biq kaol lo gil biq hhae, kaol qiqhhaeq qiqhhaeq'ae liqvuq heil biq, xianzhi xi niq nulhhaeq laoq milcaeq taq'ae zhol e cholyaeq'ae zonglkyuq gol biq kaol'ae. 11 Xi suq nao pa gol hhei'laol, aeqyil e saeq'ol mael Momil tyuqvae lye yoqhhaeteel onglci'ae do'li laol, yoqhhaeteel haoqtul lael; kaol yoqhhaeteel yaol mol e cholyaeqhael guaeq'ei gu li gil biq'ae. 12 Xianzhi niq nulhhaeq laoq yotyel tyelmae mael mqmae ae'lye yoqhhaeteel'ae gee biq mael gaeq hhei biq, gee: "Saeqvae da'lal." Kaol yoqhhaeteel mqdul nyegael mqmae'ae da'li vae, yoqhhaeteel e diqrenq eiq mol vae. 13 Tyuqfu qiqlaq'ae, milho homae ho tullaeq'ae; kaol milmae heeqmyel tyulmael qyel gael onglci e qiqgael leeqba wae; milhoho gae'lye sil e cholyaeq siqca (7000) hhaeq zoq'ae, zholdeel siq hael laoq zhee gu gil biq'ae, kaol rongqyaol mael mqmae taq e Momil'ae biq biq. 14 Dil'el gol zaihuol gol hhei vae; fu hhei, dilsan gol zaihuol nae'naemyel keellael goq biq vae.Dilqiq gol dalhaol
15 Dilqiq gol mqmae yosongl dalhaol zhangq laol, mqmae taq'ae yotyel ha'lye gee:
"Milcaeq taq e goqja laoq aedeeteel e Hhaoqsongl,
kaol yoqhhaeq lye zongltul hhei e Jidu e goqja peqyil vae.
Yoqhhaeq haeqfu keellye zongmae geiq gayil maoqlye hhae!"
16 Momil e yiqsi'ae, aeqyoyoq e zholhhael taq'ae zhol e zhangqlaoq niqqyel yuq hhaeq maduq mael milcaeq'ae tongqmaoq yil aeqmyel Momil'ae heel biq, 17 Gee:
"Yaeqnao zhol, yilkaeaeqnao eiq zhol e Hhaoqsongl,
Hhael'onglzaeq zaeqli Momil o,
ngaeteel laoq noq'ae meeqyaevae lye gee lil!
Nol laoq laqtaq zhee za kaol zongmae geiq vae kaol'ae.
18 Baeqjyelboq minqcuqhael faqhoqkei'ae,
kaol noq e faqhoqkei mael yoqhhaeteel'ae yo'li biq vae.
Nol cholsil'ae shenqpanl e shiqshen keel vae;
noq e xianzhi geiq e yaqhacheqzaq e cholyaeqhael, senltuqhael,
kaol noq e cholmil mael'ae zun eiq zunjinl gu eiq gu e cholyaeqhael onglci'ae
heeq nil e cholyaeqhael'ae shangqcil biq e shiqshen keel vae;
nol milcaeq mael zonglmye e tyuhael'ae
zonglmye biq e shiqshen eiq keel vae."
19 Tyulnye laol, mqmae taq'ae Momil e senlsoq mael pong hhei vae, kaol yoqhhaeq e senlsoq onglci'ae, yoqhhaeq e yoqguil mael mol du'lal vae; aeqnaol mqmiq, yotyel, mqziq, milho, kaol heelsiq siqmae zongl tul beq laq.