Cholhae aeqmae kaol oqhol holmae
12
Mqmae taq'ae maeqdaeqhhaeq e yilxiangl qiq mal mol du'lal: Cholhae aeqmae qiq hhaeq e aeqhhaol'ae neelmae pi hhei, baehae mael laoq aeqkeel holhhaq vae za hhae, vuqduq'ae laoq aeqgeel qyel niq siq e zongmae vuqcongq congq hhei; 2 Yoqhhaeq'ae yaeqguqpi hhei aeqwae, bo fu maeq bo sael biq kaol nael biq kaol gul hhae. 3 Mqmae taq'ae yilxiangl qiq mal yol mol du'lal: Nyelcullye oqhol holmae qiq yaeq vae vuqduq siq mal, kaol vuqkyul qyel mael cuq hhae; vuqduq siq mal'ae zongmae vuqcongq siq mal congq hhei hhae. 4 Yoqhhaeq e dongqmiq'ae mqmae taq e aeqgeelhael suq pa onglci e qiq pa ee hhei hhae, kaol yoqhhaeteel yaol milcaeq taq'ae beiqgae biq. Aeqnaol oqhol holmae mael yaeqguq bo maoqlye e cholhae aeqmae tyutaeq e yiqsi'ae haoqtul deelhhei, kaol zhoq bogae hhei'laol yoqhhaeq e yaeqguq yaol meqdo maoqlye doq deelhhei hhae. 5 Cholhae aeqmae lye yaqyoyaeq qiq hhaeq bo hhei vae, xitaeq laoq, aeqgael sulm e zaeqngeeq maellye goqjahael'ae guanqtyeq maoqlye e qiq hhaeq ngeelvae; yoqhhaeq e yaeqguq yaol Momil kaol yoqhhaeq e zongmae duqtyel e tyuqvae bi ee da'li vae. 6 Cholhae aeqmae diqsheelleeldye'ae kihhaq yil, tyuqvae laoq Momil lye yoqhhaeq'ae paeqgaelsael meeq deelhhei biq e milcaeq za'ae, kaol yoqhhaeteel yoqhhaeq'ae tyuqvae qiqca niqhael koqqyel (1260) nao fupol biq vae.7 Mqmae taq'ae daqzhangldiq mael za'ae. Miqja'lela kaol aeqyoq e mqmae yosonglhael laoq oqhol holmae nyegael diqgae hhae, oqhol holmae kaol oqhol holmae e mqmae yosonglhael eiq bael diq lael biq'ae, 8 Oqhol holmae kaol yoqhhaeq e mqmae yosonglhael diqsu vae, kaol mqmae taq'ae yoqhhaeteel hhae lye e milcaeq zail eiq maqza vae. 9 Oqhol holmae mael laoq mqdongq milbeibei fu ae'lye zhol e oqhol tyu qiq yaeq ngeelvae, niqhaeq haeqmae lye gul biq, Saqdanl lye eiq gul biq hhae, yoqhhaeq milcaeq taq e cholyaeqhael'ae cheeqmu biq hhae; kaol yoqhhaeq yaol milcaeq vae bi beiqgae hhei, yoqhhaeq e mqmae yosonglhael eiq qiqgael bi beiqgae hhei vae. 10 Ngael mqmae taq'ae yotyel ha'lye gul mael gaeq wae, gee:
"Ngaeq e Momil e jiul'en mael,
onglzaeq mael, goqja mael,
kaol yoqhhaeq lye zongltul hhei e Jidu e laqtaq mael
yaeqmeel gilzuqmyel keellael vae.
Aedeeteel e Momil e yiqsi vae,
mqkiq mqnao myel aedeeteel e aqsseq aeqnilhael'ae,
konglgaol e tyutaeq yaol beiqgae biq vae kaol'ae.
11 Aqsseq aeqnilhael lye oqhol holmae tyulmael'ae yinqzaeq mael laoq,
aeqyol yolyaeq e siq mael,
kaol aeqyoyoq e hal zoqzenl e saeziq maellye kaol'ae.
Hhae sil kaol feiq, yoqhhaeteel aeqyoyoq e aeqyil mael
maq sheqhhaq yae lye maeq zongl'ae.
12 Tyulkaol, mqmaehael kaol onglci'ae zhol hael,
noteel hhaol gil aeqmeel!
Ngeelfeiq, milcaeq kaol eeldeel deelmae laoq zaihuol za vae!
Niqhaeq haeqmae aeqyoyoq e shiqshen mael,
maeq naeq yaevae lye loq laol,
zhee hol gae'lael aeqmyel noteel tyuqvae gaeyil vae kaol'ae."
13 Oqhol holmae laoq aeqyoyoq yaol milcaeq taq'ae beiqgae laeq yaevae lye mol hhei biq laol, yaqyoyaeq bo du hhei e cholhae aeqmae tyutaeq'ae guaeq'ei diqqye biq. 14 Tyulnye laol, cholhae aeqmae'ae haeqjyel jyelmae e aeldongl niq mal biq hhei biq vae, kaol yoqhhaeq yaol diqsheelleeldye'ae aeqyoyoq e milcaeq vae bi beel keelyil, oqhol tyu qiq yaeq'ae hoqhhaqzaq yil. Kaol yoqhhaeq'ae tyuqvae qiq hoq, niq hoq, kaol baehae koqsiq cu biq aeqwae. 15 Oqhol mael cholhae aeqmae e aeqnaolboq'ae zhol'ae, myeqbongq ae'lye eelcuq bo du hhei, lolbaeq laoqmyel hhae, kaol cholhae aeqmae yaol bi pizaeq yil maoqlye zongl hhae. 16 Ngeelfeiq, milcaeq mael cholhae aeqmae'ae baelzongl biq'ae, kaol myeqbongq mael gu'ngae hhei'laol oqhol e myeqbongq ae'lye bo du hhei e lolbaeq mael meqdo vae. 17 Tyulkaol, oqhol holmae mael cholhae aeqmae'ae faqhoqkei biq, kaol yoqhhaeq e baeqjyelboq e yaeqguqhael nyegael daqzhangldiq yil'ae, yaeqguqhael laoq, Momil e gailminl mael zongl gaeyil, kaol Yesu gae'lye zoqzenlkei e tyuhael ngeelvae. 18 Tyuqfu, oqhol holmae tyulmael laoq eeldeel deeljyel e milqeil taq'ae haoqtul deelhhei hhae.