Byeljyeq niq yaeq
13
Ngael laoq byeljyeq qiq yaeq eeldeel deelmae ae'lye da'lal mol aeqwae, vuqkyul qyel mael kaol vuqduq siq mal cuq hhae; vuqkyul qyel mael taq'ae zongmae vuqcongq qyel mael congq hhei hhae, vuqduq siq mal taq'ae Momil'ae xyelduq biq e cholmil za'ae. 2 Ngael mol e byeljyeq tyu qiq yaeq e yanglziq mael laoq haeqsseeq laoqmyel hhae, aeqkeel mael laoq haeqhulm e aeqkeel laoqmyel, myeqbongq mael laoq shiziq e myeqbongq laoqmyel hhae. Oqhol holmae tyu qiq yaeq laoq aeqyoyoq e onglzaeq mael, zholhhael mael kaol zhee heeq e laqtaq mael yoqhhaeq'ae biq hhei biq. 3 Ngael byeljyeq e vuqduq siq mal onglci'ae, qiq mal laoq sil li maoq myel zonglnael biq, ngeelfeiq, yoqhhaeq e naelheiq tyulmael zonglmeeq biq vae lye mol aeqwae. Halza milcaeq taq'ae cholyaeqhael gilzuqmyel gaqmaqzuq li biq'ae, kaol byeljyeq tyu qiq yaeq'ae cho'lyeq li vae. 4 Yoqhhaeteel oqhol holmae tyu qiq yaeq'ae heel gil'ae, yoqhhaeq lye aeqyoyoq e laqtaq mael byeljyeq'ae heil biq kaol'ae; byeljyeq tyu qiq yaeq'ae yol heel biq, gee: "Aeqsul byeljyeq xi qiq yaeq nyegael biq ongl laeq? Aeqsul yoqhhaeq nyegael diqgae ongl laeq?" 5 Oqhol holmae lye byeljyeq tyu qiq yaeq'ae puhenq kaol xyelduq e saeziq gee e myeqbongq yol biq hhei biq'ae, kaol yoqhhaeq'ae silqinq haelmillye zongl goq laol haelmillye baehae yuqqyel niq siq hhae zongl e laqtaq yol biq hhei biq. 6 Byeljyeq tyu qiq yaeq myeqbongq gu'ngae hheikaol Momil'ae xyelduq e saeziq gee biq, kaol Momil e cholmil kaol yoqhhaeq e Momil e haeqpael haelcul mael'ae, kaol mqmae taq'ae zhol e tyuhael'ae xyelduq biq. 7 Momil yoqhhaeq vae senltuqhael nyegael diqgae yil aeqmeel lye gee biq, kaol yoqhhaeq diq yinqzaeq hhei vae, kaol yoqhhaeq'ae maeq qiqsheel e zhipail, maeq qiqsheel e minqcuq, maeq qiqsheel e saeziq, maeq qiqsheel e goqjahael'ae zongltyeq e laqtaq yol biq hhei biq. 8 Milcaeq taq'ae zhol e cholyaeqhael, cholmil mael mqdongq milbeibei fu ae'lye bi xyeq e aeqyol yolyaeq e aeqyil e suqhhaq taq'ae, maq cuda hhei e cholyaeqhael laoq gilzuqmyel yoqhhaeq'ae heel biq maoqlye hhae.9 Naeqbol gaeq congl hael laoq naelhaeq gil!
10 Hhae bi eezaeq yil hael laoq,
aeqdilmyel bi eezaeq yil ngeelvae;
maejyel maellye hhae bi xyeq hhei hael laoq,
aeqdilmyel maejyel maellye bi xyeq hhei ngeelvae.
Xilnye kaollaoq, senltuqhael laoq nailxin kaol xinlxin za maoqhhae. 11 Ngael laoq baeqjyelboq e byeljyeq qiq yaeq milcaeq ae'lye da'lal mol aeqwae. Yoqhhaeq'ae cuq e vuqkyul niq mal laoq aeqyol yolyaeq e vuqkyul laoqmyel hhae, saeziq gee mael laoq oqhol holmae laoqmyel hhae. 12 Yoqhhaeq laoq laefuq fuqli byeljyeq tyu qiq yaeq e yiqsi'ae, byeljyeq tyu qiq yaeq'ae halza e laqtaq mael zongl hhae. Yoqhhaeq laoq milcaeq kaol milcaeq taq'ae zhol e cholyaeqhael'ae, sil li maoq myel zonglnael biq, aeqnaol zonglmeeq biq e laefuq fuqli byeljyeq tyu qiq yaeq'ae bi heel gil hhae. 13 Byeljyeq xi qiq yaeq lye haeqheemyel maeqdaeqhhaeq e silqinq zongl du hhei'ae, kaol cholyaeqhael e yiqsi vae aeqzaeq doq mael dyel'eiq mqmae ae'lye milcaeq taq'ae bi loq gayi. 14 Yoqhhaeq'ae laefuq fuqli byeljyeq tyu qiq yaeq e yiqsi'ae maeqdaeqhhaeq e silqinq zongl ongl e laqtaq za vae, kaol milcaeq taq'ae zhol e cholyaeqhael'ae cheeqmu biq, kaol yoqhhaeteel'ae maejyel maellye zonglnael gol biq, kaol dyeqdeel siq e byeljyeq mael'ae yoqhhaeq e molkol qiq mal keq du hhei biq lye gee biq. 15 Yoqhhaeq'ae laqtaq yol biq hhei biq, kaol byeljyeq tyu qiq yaeq e molkol mael'ae saeq bi ol, saeziq bi gee kiq, kaol byeljyeq e molkol mael'ae maeq heel e cholyaeqhael yaol gilzuqmyel bi xyeq hhei. 16 Yoqhhaeq lye cholyaeqhael'ae, heeq haoq, nil haoq, dyuqbaq za congl hael haoq, maqza congl hael haoq, zilyoq hael haoq, hhaeq'ongq ongqzaeq hael haoq, gilzuqmyel laqsseq taq'ae, paelsilmyel naeqdeel taq'ae jilhaol bi diq da hhei; 17 Jilhaol tyulmael laoq, byeljyeq e cholmil paelsilmyel byeljyeq cholmil e sulmuq ngeelvae, jilhaol xilmael maqza laol, maeq hhae vulzaeq paelsilmyel maeq hhae ongqzaeq'ae. 18 Xilmael laoq geel mael za maoqhhae: Zhee geel e cholyaeq'ae byeljyeq e sulmuq mael bi suq du hhei ongl, xilmael laoq cholyaeq qiq hhaeq e sulzil kaol'ae, sulzil tyulmael laoq koqhael koqqyel koq'ae (666).