Qyel'yuq tongl yuqca (144000) hhaeq e changlgo mael
14
Ngael yol chifu hhei'laol, aeqyol yolyaeq mael Xi'an Geeqzhoq taq'ae haoqtul deelhhei mol aeqwae, yoqhhaeq nyegael qiqgael zhol e cholyaeq laoq qyel'yuq tongl yuqca (144000) hhaeq'ae, yoqhhaeteel e naeqdeel taq'ae yoqhhaeq e cholmil mael kaol yoqhhaeq e aeqdae e cholmil mael cuda deelhhei hhae. 2 Ngael laoq mqmae taq ae'lye yotyel gaeq duyi gaeq wae, yotyel xilmael laoq eelcuqhael yul e yotyel kaol mqziq ziqmae e yotyel laoqmyel hhae, ngael gaeq e yotyel mael laoq dilhongq laqkiq diq e dilhongq e yotyel laoqmyel'ae. 3 Yoqhhaeteel laoq zongmae duqtyel e yiqsi vae zhol hhae, kaol yodyeq yuq yaeq kaol zhangqlaoqhael e yiqsi'ae changlgo yosheq changl hhae, milcaeq taq ae'lye vul laq e qyel'yuq tongl yuqca (144000) hhaeq maoqlaol, changlgo xilmael cholyaeq qiq hhaeq eiq maq xoq zaq kiq'ae. 4 Cholyaeq xihael laoq haeqmiyaeq nyegael saqdol lal aeqmyel maeq zongl gol'ae, yoqhhaeteel e aeqhhaol mael laoq shol wae siq. Aeqyol yolyaeq mael haeqvae yil haoq, yoqhhaeteel gilzuqmyel yoqhhaeq'ae cho'lyeq hhae. Yoqhhaeteel yaol laoq milcaeq taq e cholyaeqhael onglci ae'lye vul laq hhae, kaol zhoq hhoqlal e aelsiq'ae lye Momil kaol aeqyol yolyaeq'ae heil hhei biq. 5 Yoqhhaeteel e myeqbongq onglci'ae lye zaqgiqgiq e saeziq maeq saelpo du hhei ongl'ae, yoqhhaeteel laoq qiqgiq geehhael maqza myel hhae.Mqmae yosongl suq nulhhaeq gee e saeziq mael
6 Ngael baeqjyelboq e mqmae yosongl qiq hhaeq mqmae'ae beel mol aeqwae, yoqhhaeq'ae haeqfu eiq zadeel e fuqyin mael za hhae, kaol yoqhhaeq fuqyin tyulmael milcaeq taq e maeq qiqsheel e goqja, maeq qiqsheel e zhipail, maeq qiqsheel e saeziq, kaol maeq qiqsheel e minqcuq ae'lye lael e cholyaeqhael'ae geegaeq hhei biq maoqlye hhae. 7 Yoqhhaeq yotyel ha'lye gee: "Momil'ae zun eiq zunjinl gu eiq gu maoqhhae, kaol rongqyaol mael yoqhhaeq'ae biq biq, yoqhhaeq shenqpanl e shiqshen mael keel vae kaol'ae. Mqmae, milcaeq, eeldeel deelmae kaol eelbi zongldu hhei e Hhaoqsongl'ae heel biq maoqhhae."
8 Baeqjyelboq e dil'el gol mqmae yosongl gee: "Leeqba vae! Zhee laq e ochoq nyegael neemae bi ba e zilbaeq mael minqcuqhael'ae bi dol gol e zhee henq e Babiqlunq mael leeqba vae!"
9 Baeqjyelboq e dilsan gol mqmae yosongl eiq yoqhhaeteel gee byel hhei'laol, yotyel ha'lye gee: "Aeqsul byeljyeq tyu qiq yaeq'ae kaol byeljyeq e molkol mael'ae heel, naeqdeel taq'ae paelsilmyel aqlaq taq'ae jilhaol bi diq da gol kaollaoq, 10 Yoqhhaeq aeqdilmyel Momil e faqhoq guaeq'ei kei mael dailbiaoq e zilbaeq mael hhae dol hhae; zilbaeq xilmael laoq Momil e faqhoq guaeq'ei kei mael dailbiaoq e beiziq onglci'ae xye do hhei e qiqgiq maeq xye keq gol e zilbaeq'ae. Yoqhhaeq laoq senljyeq mqmae yosonglhael kaol aeqyol yolyaeq e yiqsi'ae, aeqzaeq kaol liuqhuangq e onglci'ae zhee hhae saeq maoqlye hhae. 11 Yoqhhaeteel'ae zhee bi saeq e aeqhaoq mael haeqfu keellye aqtaqboq'ae byuq da hhae. Byeljyeq kaol byeljyeq e molkol mael'ae heel e cholyaeqhael, kaol byeljyeq e cholmil e jilhaol mael bi diq da hhei e cholyaeq tyuhael laoq, mqkiq mqnao myel hhaeqnaeq maeq hhae naeq'ae." 12 Tyulkaol, Momil e gailminl mael zongl gaeyil, kaol Yesu e xinlyangq mael'ae xiangxinl e senltuqhael laoq nailxin za maoqhhae. 13 Ngael mqmae ae'lye yotyel gee mael gaeq wae, gee: "Nol cuga hhei maoqhhae: Saeq ae'lye aeqnaol laoq, Hhaoqsongl onglci'ae lye sil e cholyaeq laoq geeqlongq meeq vae."Senllinq gee: "Ngeel'ae, yoqhhaeteel laoq aeqyoyoq e duqhee'lye mul onglci ae'lye dongbeiq hhei, kaol hhaeqnaeq hhae naeq vae, mulhhael mul du hhei mael haeqfu keellye yoqhhaeteel'ae cho'lyeq kaol'ae."
Milcaeq holtaq e zaelsiq heillezaq mael
14 Ngael yol chifu hhei'laol, mqdul qiq congq mol aeqwae, mqdul taq'ae Cholyaeq Yaqyo laoqmyel qiq hhaeq zhol da deelhhei hhae, vuqduq taq'ae laoq pulsheel e zongmae vuqcongq congq hhei, aqlaq'ae laoq taxillye e lianqdao heil hhei hhae. 15 Baeqjyelboq e mqmae yosongl qiq hhaeq senlsoq vae lye duyi, kaol mqdul taq'ae zhol e tyutaeq'ae yotyel ha'lye gul biq: "Noq e lianqdao mael heildu hheikaol heillezaq yil oq, heillezaq e shiqshen keellael vae, milcaeq taq e zaelsiqhael zhee mao vae." 16 Tyulkaol, mqdul taq'ae zhol e tyutaeq lye lianqdao mael milcaeq taq'ae beiq du hhei, kaol milcaeq taq e zaelsiqhael heillezaq vae. 17 Baeqjyelboq e mqmae yosongl qiq hhaeq mqmae taq e senlsoq vae lye duyi, yoqhhaeq vae eiq taxillye lianqdao heil hhei hhae. 18 Baeqjyelboq e mqmae yosongl qiq hhaeq laoq jiltanq ae'lye duyi, yoqhhaeq aeqzaeq doq mael'ae guanq e laqtaq za'ae, kaol taxillye lianqdao heil hhei e tyutaeq'ae yotyel ha'lye gee biq: "Taxillye e lianqdao mael beiq du hhei, kaol milcaeq taq e siqbaq aelbol e aelsiq mael heillezaq hhei, siqbaq mael hhoqbyullye vae kaol'ae." 19 Mqmae yosongl tyutaeq lye lianqdao mael milcaeq taq'ae beiq du hhei, kaol milcaeq taq e siqbaq mael heillezaq vae, kaol Momil e faqhoqkei mael'ae dailbiaoq e haeqheemyel e zilbaeq deiqduzaq e eelzhol'ae beiq do hhei vae. 20 Zilbaeq deiqduzaq e eelzhol tyulmael laoq milmae heeqmyel nildu'ae nuqkiq nuqnyel myel bi nuq vae, kaol siq mael zilbaeq deiqduzaq e eelzhol ae'lye yul duyi, kaol aeqmaoq e longqtong doq hhei aeqmyel vae naq da keellaeq vae, kaol qiqca koqhael (1600) sitadiqa maol aeqmyel yul duyil hhae.