Mqmae yosongl siq hhaeq aeqnaol naolli e zai'nanl mael guanq hhae
15
Ngael mqmae taq'ae baeqjyelboq e haeqheemyel maeqdaeqhhaeq myel yilxiangl qiq mal mol aeqwae, yilxiangl xilmael laoq, mqmae yosongl siq hhaeq aeqnaol naolli e zai'nanl siq sheel guanq mael ngeelvae, Momil e faqhoq guaeq'ei kei mael zai'nanl xi siq mal taq'ae faqhoq hael kei maoqmyel kei byel vae kaol'ae. 2 Ngael aeqzaeq doq mael keq ga'lal aeqmyel e bo'liq e eeldeel deelmae laoqmyel qiq mal mol aeqwae; ngael yol mol aeqwae, byeljyeq tyu qiq yaeq kaol byeljyeq e molkol mael'ae, kaol yoqhhaeq e cholmil e sulmuq mael'ae yinqzaeq e cholyaeq tyuhael, gilzuqmyel bo'liq e eeldeel deelmae taq'ae haoqtul deelhhei hhae, aqlaq'ae laoq Momil e baqtul deelhhei e dilhongq mael baq hhei hhae. 3 Yoqhhaeteel laoq Momil e yaqhacheqzaq e cholyaeq Moxi e changlgo, kaol aeqyol yolyaeq e changlgo mael changl gil hhae, gee:Hhaoqsongl, hhael'onglzaeq zaeqli Momil o,
nol zongl mael laoq weiq eiq weiqdal daeq eiq maeqdaeqhhaeq'ae!
Goqjahael e zongmae o,
noq e gaelmae mael laoq gongyil hhae,
aeqdilmyel eiq ngeel hhae!
4 Hhaoqsongl o, aeqsul noq'ae zun eiq maeq zunjinl gu eiq maq gu myel zongl,
kaol rongqyaol mael noq e cholmil mael'ae maq biq myel zongl peq laeq?
Nol qiq hhaeq maoqlaol senljyeq e maeq zhol kaol'ae.
Haelzhol cholyaeqhael lael maoqlye hhae,
kaol noq e yiqsi'ae tongqheel lael,
nol gongyil gae'lael aeqmyel zongl mael
mol du'lal vae kaol'ae."
5 Silqinq xihael aeqnaol, ngael mqmae taq'ae gailminl bongqke mael baq deel e senlsoq mael pong lael mol aeqwae. 6 Zai'nanl siq mal guanq e mqmae yosongl tyu siq hhaeq laoq senlsoq ae'lye duyi, bachi'lye zheelniqlye keeldaelnil e ziq e aelhongq dum hhei hhae, neeto oheiq'ae pulsheel e oqlongl longl hhei hhae. 7 Yodyeq yuq yaeq onglci e qiq yaeq lye, pulsheel huqmmaeq siq mal mqmae yosongl tyu siq hhaeq'ae baqmoq hhei biq'ae, huqmmaeq mael'ae laoq haeqfu keellye dyeq keel e Momil e faqhoq guaeq'ei kei mael kuq bong do hhei hhae. 8 Senlsoq onglci'ae Momil e rongqyaol kaol onglzaeq ae'lye lael e aeqhaoq mael byuqbong vae. Mqmae yosongl tyu siq hhaeq lye zai'nanl siq mal milcaeq taq'ae bi yo'li byel fu keellye, cholyaeq qiq hhaeq eiq senlsoq vae maq do'li ongl'ae.