Momil e faqhoq guaeq'ei kei mael'ae dailbiaoq e huqmmaeq
16
Ngael senlsoq ae'lye yotyel tyelmae gaeq duyi e gaeq wae, kaol mqmae yosongl tyu siq hhaeq'ae gee biq: "Noteel yil gil, kaol Momil e faqhoq guaeq'ei kei mael kuq do hhei e huqmmaeq siq mal milcaeq'ae xyehael gae hhei." 2 Dilyiq gol mqmae yosongl yil laol, huqmmaeq mael'ae zoq mael milcaeq'ae xyehael gae hhei, kaol nulheiqlye duq zoq e aelnael mael byeljyeq e jilhaol za hael'ae, kaol byeljyeq e molkol mael'ae heel e cholyaeq tyuhael e aeqhhaol taq'ae nael du'lal biq'ae.3 Dil'el gol mqmae yosongl lye huqmmaeq mael'ae zoq mael eeldeel deelmae onglci vae xyedo hhei, kaol eeldeel deelmae mael cholsil e siq laoqmyel peqlal vae, kaol eeldeel deelmae onglci e aeqyil halza e yodyeqhael gilzuqmyel sil byel vae.
4 Dilsan gol Mqmae yosongl lye huqmmaeq mael'ae zoq mael lolbaeq kaol eelbi onglci vae xyedo hhei, kaol eelcuq mael siq peqlal vae. 5 Ngael eelcuqhael'ae guanq e mqmae yosongl gee mael gaeq wae, gee:
Yilkaeaeqnao zhol, yaeqnao zhol e senljyeq qiqhhaeq o,
nol xilnye shenqpanl mael laoq gongyil hhae;
6 Yoqhhaeteel lye senltuqhael'ae,
kaol xianzhihael'ae siq bi yul gol kaol'ae,
yaeqmeel nol yoqhhaeteel'ae siq bi dol,
xilmael laoq yoqhhaeteel hhae shel hhae."
7 Ngael jiltanq ae'lye lael e yotyel gaeq wae, gee:
"Ngeel'ae, Hhaoqsongl, hhael'onglzaeq zaeqli Momil o,
noq e shenqpanl mael laoq aeqdilmyel hhae, gongyil hhae!"
8 Dilsil gol mqmae yosongl lye huqmmaeq mael'ae zoq mael neelmae taq'ae xyecheeq da hhei'laol, neelmae mael aeqzaeq doq laoqmyel cholyaeq'ae bi pe nael hhae. 9 Cholyaeq'ae zhee hongl e neelmae maellye pe biq laol, zai'nanl xihael'ae guanqliq laqtaq za e Momil tyutaeq e cholmil mael'ae xyelduq hhae, yoqhhaeteel laoq neemae maeq paellael, rongqyaol mael eiq Momil'ae maq biq biq'ae.
10 Dilvuq gol mqmae yosongl lye huqmmaeq mael'ae zoq mael byeljyeq e zholhhael taq'ae xye da hhei, kaol byeljyeq e goqja mael laoq nahongqlye peqyil hhei vae. Cholyaeqhael laoq nael biq gae'lye aeqyoyoq e myeqhael mael'ae koqhoq hhae; 11 Cholyaeqhael laoq nael biq kaol aelnaelnael li biq gae'lye, mqmae taq e Momil'ae xyelduq biq hhae, aeqyoteel e xinqweiq gae'lye neemae paellael maoqlye maeq zongl'ae.
12 Dilluq gol mqmae yosongl lye huqmmaeq mael'ae zoq mael Yolfa'ladiq Lolbaeq baeqmae'ae xyedo hhei, kaol lolbaeq e eelcuq mael gee yil vae, xilmael laoq, neeldu aelheiq boq ae'lye lael e zongmaehael'ae gaelmae paeqgaelsael meeq deelhhei biq maoqlye hhae. 13 Ngael maeqshol e yohael suq mael mol aeqwae, haeqpaeq laoqmyel dul hhae, oqhol e myeqbongq, byeljyeq e myeqbongq kaol jaq xianzhi e myeqbongq onglci ae'lye duyi hhae. 14 Qiqshiq laoq, yoqhhaeteel laoq niqhaeq haeqmae e yohael'ae, maeqdaeqhhaeq e silqinq mael zongl, kaol mqmae holhhaq e zongmaehael e tyuqvae yil, kaol yoqhhaeteel yaol gul'eeq hhei'laol, hhael'onglzaeq zaeqli Momil e maeqdaeqhhaeq e shenqpanl e naohaeq'ae daqzhangldiq maoqlye hhae. 15 Naelhaeq, ngael lael mael laoq lolbiq laoqmyel lil. Yuqnyuqgeel, haeqfu eiq aelhongq dumda meeq hhei e cholyaeq laoq geeqlongq meeq vae; yoqhhaeq laoq nyelguqlye maeq deel kael, cholyaeq lye aeqyoq e saqdol mael maeq bi molzaeq hhei'ae. 16 Maeqshol e yohael tyu suq mael lye zongmaehael yaol milcaeq qiqgael'ae gul'eeq deelhhei, milcaeq xilmael Xiboqlaiq saeziq laoq Hamiqjiqdodunl lye gul hhae. 17 Dilqiq gol mqmae yosongl lye huqmmaeq mael'ae zoq mael mqmae'ae xyehael hhei, kaol yotyel tyelmae mael senlsoq e zongmae duqtyel taq ae'lye duyi, gee: "Peqlal vae!" 18 Mqmiqmiq tullaeq, yotyel gaeqlael, mqziqziq tullaeq, kaol milho homae yol ho tullaeq'ae, milcaeq taq'ae cholyaeq zhol myel ae'lye aeqnaol laoq, xilnye heeq xilnye gu lal aeqmyel milho maqza gol'ae. 19 Haeqheemyel e milmae heeqmyel tyulmael suq pa peqlal, kaol goqjahael e milmae heeqmyelhael leeqba byel vae. Momil laoq Babiqlunq milmae heeqmyel mael nyuq tullaeq biq, kaol aeqyoyoq e faqhoq guaeq'ei kei mael dailbiaoq e zilbaeq kuq do hhei e beiziq tyulmael yoqhhaeq'ae baqmoq hhei biq hhae. 20 Haiqdaoqhael hae qiq mal eiq kihhaq vae, geeqzhoqhael eiq maeq mol laelkiq vae. 21 Heelsiq siqmae mael mqmae ae'lye cholyaeqhael e aeqhhaol'ae diq cheeq dayi biq, hae qiq siq eiq yil ta'lianqdeqa zoq'ae, tyulkaol, cholyaeqhael heelsiq e zai'nanl gae'lye Momil'ae xyelduq hhae, zai'nanl tyulmael laoq haeqheemyel kaol'ae.