Zhee henq e jilnyuq kaol byeljyeq
17
Huqmmaeq siq mal heil e mqmae yosongl siq hhaeq onglci e qiq hhaeq laoq ngaeq'ae gee lael laeq, gee: "Lael, ngael noq'ae eelcuqhael taq'ae zhol e zhee henq e jilnyuq geiq e haeqmiyaeq'ae chenqfaq biq mael bi chifu laeqngeel; 2 Milcaeq taq e zongmaehael laoq yoqhhaeq nyegael neemaeba gol hhae, milcaeq taq'ae zhol e cholyaeqhael eiq yoqhhaeq e ochoq nyegael neemaeba e zilbaeq mael dol kaol dolbu vae." 3 Ngaeq'ae senllinq ganqdongl laeq, kaol mqmae yosongl lye diqsheelleeldye vae sheeqyil laeq'ae, ngael haeqmiyaeq qiq hhaeq nyelna'na e byeljyeq mael'ae ziqda deelhhei mol aeqwae; byeljyeq tyu qiq yaeq'ae laoq vuqduq siq mal kaol vuqkyul qyel mael cuq hhae, aeqhhaol qiqsiqmyel Momil'ae xyelduq e cholmil mael za bonggaebyel aeqmyel hhae. 4 Haeqmiyaeq tyutaeq'ae laoq ziqseq kaol nyelna'na e aelhongq dum hhei hhae, kaol pulsheel, baoqshiq, zhenzhu maellye zonglzhizaeq hhei hhae, aqlaq mael'ae laoq pulsheel beiziq heil hhei, beiziq onglci'ae laoq hol lael aeqmyel mael kaol yoqhhaeq e ochoq nyegael neemaeba e xinqlalmyel mael xye bong hhei hhae. 5 Yoqhhaeq e naeqdeel taq'ae aolmiq e cholmil cuda deelhhei hhae, gee: "Zhee henq e Babiqlunq laoq, milcaeq taq e jilnyuq kaol hol lael aeqmyel cholyaeqhael e aeqmae'ae." 6 Ngael laoq haeqmiyaeq tyutaeq senltuqhael e siq, kaol Yesu gae'lye zoqzenlkei e cholyaeqhael e siq mael dol kaol dolbu biq mol aeqwae.Ngael yoqhhaeq yaol mol hhei'laol, gaqmaq zhee zuq lal laq'ae. 7 Mqmae yosongl ngaeq'ae gee laeq: "Noq'ae aeqcheekaol gaqmaqzuq laq hhaemaeq? Ngael laoq noq'ae haeqmiyaeq xitaeq, kaol yoqhhaeq yaol toq hhei e vuqduq siq mal cuq vuqkyul qyel mael cuq e byeljyeq tyu qiq yaeq e aolmiq mael geegaeq laeqngeel. 8 Nol mol gol e byeljyeq mael laoq, laefuq zhol, yaeqmeel maeq zhol, aeqgael dongqto maqza e duqhongq ae'lye da'lal maoqlye hhae, aeqnaol laoq myeyil maoqlye hhae. Milcaeq taq'ae zhol e cholyaeqhael, cholmil mael mqdongq milbeibei fu ae'lye aeqyil e suqhhaq taq'ae maq cuda e cholyaeqhael laoq, laefuq zhol, yaeqmeel maeq zhol, aeqgael zail mol du'lal maoqlye e byeljyeq mael mol hhei biq laol, gilzuqmyel gaqmaqzuq li biq maoqlye hhae. 9 Xilmael laoq aedeeteel'ae vuqnoq zoq maoqhhae lye gee hhae: Vuqduq tyu siq mal laoq haeqmiyaeq zhol deelhhei e geeqzhoq siq zhoq'ae; yoqhhaeteel laoq zongmae siq hhaeq eiq ngeel hhae, 10 Ngaeq hhaeq laoq leeqgul vae, qiq hhaeq laoq zhol wae siq, qiq hhaeq laoq maeq keellael wae siq; yoqhhaeq lael fu laoq aeqdilmyel qiqlaq maoq maeq hhae songldeel'ae. 11 Laefuq zhol gol, yaeqmeel maeq zhol e byeljyeq tyu qiq yaeq laoq dilbaq gol'ae, yoqhhaeq eiq tyu siq yaeq onglci e qiq yaeq'ae, aeqnaol laoq myeyil maoqlye hhae. 12 Nol mol gol e vuqkyul tyu qyel mael laoq zongmae qyel hhaeq'ae; yoqhhaeteel'ae goqja mael maq hhamul biq wae siq, ngeelfeiq, yoqhhaeteel laoq byeljyeq tyu qiq yaeq nyegael laqtaq hhaellael hhamul, kaol zongmae qiqte geiq hhae. 13 Yoqhhaeteel neemae qiq siq laoqmyel aeqyoyoq e onglzaeq mael kaol laqtaq mael byeljyeq'ae heilmoq hhei biq'ae. 14 Yoqhhaeteel aeqyol yolyaeq nyegael diqgae hhae, aeqyol yolyaeq lye yoqhhaeteel yaol yinqzaeq biq vae, aeqyol yolyaeq mael laoq hhaoqsonglhael e Hhaoqsongl, zongmaelhael e Zongmae kaol'ae, aeqyol yolyaeq nyegael qiqgael zhol hael laoq gul du hhei biq, saelpo du hhei biq, kaol neemae xyelpu maqpu e cholyaeqhael ngeelvae." 15 Mqmae yosongl ngaeq'ae gee laeq: "Nol mol e jilnyuq tyutaeq zhol da deelhhei e eelcuqhael laoq, haelnaeqmyel minqcuq, haelnaeqmyel cholyaeq, haelnaeqmyel goqja, kaol haelnaeqmyel maeq qiqsheel myel e saeziq ngeelvae. 16 Nol mol e vuqkyul tyu qyel mael kaol byeljyeq mael laoq, aeqdilmyel jilnyuq geiq e haeqmiyaeq xitaeq'ae neemasu biq maoqlye hhae, yoqhhaeteel lye yoqhhaeq yaol cholgulcillye nyelguqlye bi peqyil hhei, yoqhhaeq e saeqzil mael eiq zaeq biq, aeqzaeq doq maellye yoqhhaeq yaol pe biq vae. 17 Momil lye zongmaehael yaol neemae qiq siq laoqmyel yoqhhaeq e zhiqyil mael'ae bi zongl yil, kaol yoqhhaeteel aeqyoyoq e goqja mael byeljyeq tyu qiq yaeq'ae heilmoq hhei biq, Momil e saeziq mael gilzuqmyel peqlal fu keellye doqkeel maoq kaol'ae. 18 Nol mol e haeqmiyaeq tyutaeq laoq milcaeq taq'ae zongmaehael'ae guanqtyeq e haeqheemyel e milmae heeqmyel mael'ae.