Babiqlunq leeqbaq vae
18
Silqinq xihael aeqnaol, ngael zhee heeq e laqtaq za e baeqjyelboq e mqmae yosongl qiq hhaeq mqmae ae'lye loq gayi mol aeqwae, yoqhhaeq e rongqyaol mael milcaeq vae cuqmol deelhhei. 2 Yoqhhaeq aqhabo'lye yotyel ha'lye gul du hhei, gee:"Leeqba vae! Zhee henq e Babiqlunq leeqba vae!
Yoqhhaeq laoq niqhaeq haeqmae e zholhhael peqlal,
maeq qiqsheel e xinqlalmyel e yohael e gonglbyu peqlal,
maeq qiqsheel e xinqlalmyel e haeqzil e byelbeeq peqlal,
kaol maeq qiqsheel e xinqlalmyel e hol lael aeqmyel e
byeljyeq e duyil do'lal e milcaeq peqlal vae.
3 Goqjahael gilzuqmyel yoqhhaeq e zhee laq e
ochoq nyegael neemae bi ba e zilbaeq mael dol vae kaol'ae;
milcaeq taq e zongmaehael yoqhhaeq nyegael neemaeba;
milcaeq taq e senyil mulzaeq e cholyaeqhael laoq,
yoqhhaeq dyuqbaq hal mul maoq myel mul gae'lye
dyuqbaq za congl vae."
4 Ngael baeqjyelboq e yotyel mqmae ae'lye gaeq duyi e gaeq wae, gee:
"Ngaeq e cholyaeqhael, milmae heeqmyel e tyulmael ae'lye duyi gil oq!
Aeqgael yoqhhaeq e golsiq taq'ae vuqtu bal zoq,
kaol yoqhhaeq zai'nanl pi mael hhae bael pi maeqhe;
5 Yoqhhaeq e golsiq mael mqmae'ae gongq da keelli vae kaol'ae,
Momil yoqhhaeq e golsiq mael nyuqdeel vae.
6 Yoqhhaeq cholyaeq'ae haelmillye zongl biq laol,
noteel haelmillye zonglhoq biq,
yoqhhaeq haelzongl maellye yoqhhaeq'ae
ongljyeq qiq pa zonglhoq hhei biq;
yoqhhaeq zilbaeq xyekeq fu mul e beiziq maellye
yoqhhaeq'ae ongljyeq qiq pa xyekeq hheikaol bi dol.
7 Yoqhhaeq aeqyoyoq'ae haeldyul rongqyaolzaeq,
kaol haeldyul xiangqfuq gol laol,
ngael yoqhhaeq'ae tyuldyul bi zholsaeq bi nyuqsaeq maoq.
Yoqhhaeq neemae onglci'ae xilnye gee kaol'ae:
'Ngael zongmae duqtyel mael'ae zhol da'li,
kaol haeqmiyaeq zongmae geiq lil,
miqchiq maeqngeel yil,
kaol aeqdilmyel maeq nyuqsaeq yil.'
8 Tyulkaol, qiq nao ae'lye yoqhhaeq e zai'nanl mael
qiqgael keellael maoqlye hhae,
zai'nanlhael laoq, sil mael, nyuqsaeq mael,
hoqlaq maeqmeeq qiqgiq zaeq eiq maqza mael ngeelvae.
Yoqhhaeq yaol aeqzaeq doq maellye leza'lye bi pe maoqlye hhae,
yoqhhaeq'ae shenqpanl biq e Hhaoqsongl Momil laoq
zhee onglzaeq kaol'ae."
9 Milcaeq taq'ae yoqhhaeq nyegael neemaeba kaol hhaellaelmyel xiangqfuq gol e zongmaehael laoq, yoqhhaeq'ae pe biq e aeqhaoq mael mol hhei biq laol, yoqhhaeq gae'lye neeto'ae diq diq myel nyul sil maoq myel nyul gil hhae; 10 Yoqhhaeq e nael biq mael'ae gu biq gae'lye gaelmaolsae'lye haoqtul, gee:
"Zaihuol za vae, zaihuol za vae,
haeqheemyel milmae heeqmyel xilmael!
Maeq diq do'li sael e Babiqlunq o!
Qiqte'lye laol, noq e shenqpanl mael,
keellael maoqlye wae."
11 Milcaeq taq e senyil mulzaeq e cholyaeqhael eiq gilzuqmyel yoqhhaeq gae'lye nyuqsaeq lael aeqmyel nyul gil hhae, cholyaeq qiq hhaeq eiq yoqhhaeteel e moqgoqhael zail eiq maq bal vulzaq biq vae kaol'ae; 12 Moqgoq xihael laoq pulsheel, pulziq, baoqshiq, zhenzhu, keeldaelnil e haeqpael, zaelbeel maellye zongldu hhei e haeqpael, ziqseq kaol nyelna'na haeqpael, kaol maeq qiqsheel e nulsael lael aeqmyel e aelbol, maeq qiqsheel e yaemae myeqsheq lye zongldu hhei e moqgoq, maeq qiqsheel myel pyuqjyeqjyeq e aelbol duqmae, geeqsheel, sulm, dalliqshiq e moqgoq, 13 Kaol laqpiq, doulkoul, nulsael lael aeqmyel haelsaeq, xianggao, ruqxiang, zilbaeq, zhoqcae cil, nuxullye meqziq hhaeqxul, meqziq, aeqnuq, aqciq, aeqmaoq, maqche, hhaeq'ongq ongqzaeq e cholyaeq, kaol cholyaeq.
14 "Nol zhee gaeq biq e aelsiq mael noq'ae deelsae hhei vae;
noq e halza e zhee zaeqmyel lael aeqmyel mael,
kaol zhigaqlye e moqgoqhael,
gilzuqmyel noq e tyuqvae lye myeyil hhei vae,
kaol aeqdilmyel zail eiq maeq hhae mol congl wae."
15 Moqgoq xihael ongqzaeq, kaol yoqhhaeq ae'lye dyuqbaq za lal biq e senyil mulzaeq cholyaeqhael, yoqhhaeq e nael biq mael'ae gu biq gae'lye, gaelmaolsae'lye haoqtul deel hheikaol nyuqsaeq lael aeqmyel nyul gil'ae, 16 Gee:
"Zaihuol za vae, zaihuol za vae,
haeqheemyel e milmae heeqmyel xilmael!
Yoqhhaeq'ae laoq keeldaelnil e haeqpael, ziqseq,
kaol nyelna'na e aelhongq dum hhei hhae,
pulsheel, baoqshiq, zhenzhu maellye zonglzhizaeq hhei hhae.
17 Qiqlaq laq'oq'ae lye, xuldyulmyel e zacongl mael qiqgiq maqza vae."
Hoq mael'ae guanq e cholyaeqhael, haeqvae lael'ee myel hoq he cholyaeqhael, eelcuq laqkiqhael kaol eeldeel deelmae'ae kaolzaeq e cholyaeqhael, gilzuqmyel gaelmaolsae'lye haoqtul deelhhei gil hhae, 18 Yoqhhaeteel yoqhhaeq'ae pe biq e aeqhaoq mael mol hhei'laol, gul gae'lael aeqmyel gee: "Milmae heeqmyel e hae qiq mal, haeqheemyel e milmae heeqmyel e xilmael nyegael biq ongl laeq?" 19 Tyulkaol, yoqhhaeteel laoq haeqlyel mael vuqduq taq'ae beiqxeiq da hhei, nyul kaol nyuqsaeq gae'lael aeqmyel gul, gee:
"Zaihuol za vae, zaihuol za vae,
haeqheemyel milmae heeqmyel xilmael!
Eeldeel deelmae taq'ae hoq za e cholyaeqhael laoq,
yoqhhaeq e zagongq gae'lye zacongl lael vae.
Yoqhhaeq qiqlaq laq'oq'ae lye cholgulcillye peqyil hhei.
20 Mqmae o, senltuqhael,
shiqtuqhael, xianzhihael o!
Noteel gilzuqmyel yoqhhaeq gae'lye hhaol maoqhhae,
Momil laoq yoqhhaeq e aeqhhaol taq'ae noteel'ae bael chenqfaq biq vae kaol'ae." 21 Aqha zhee bo e mqmae yosongl qiq hhaeq lye haqlo qiq siq baqqei hhei, haeqheemyel e giho laoqmyel hhae, kaol eeldeel deelmae'ae beiqdo hhei, gee:
"Babiqlunq haeqheemyel e milmae heeqmyel mael eiq
xilnye aqhatiqlye bi beiqdo hhei ngeelvae,
kaol aeqdilmyel zail eiq maeq hhae mol congl wae.
22 Dilhongq diq, changlgo changl, tilliltoqloq bo,
dalhaol zhangq e yotyel mael,
noq e onglci'ae aeqdilmyel zail eiq maeq hhae gaeq congl wae;
maeq qiqsheel e mulhhael e laqkiq laoq,
noq e onglci'ae aeqdilmyel zail eiq maeq hhae mol congl wae;
giho gi e yotyel mael,
noq e onglci'ae aeqdilmyel zail eiq maeq hhae gaeq congl wae;
23 Denjal e aeqcael mael,
noq e onglci'ae aeqdilmyel zail eiq maeq hhae keeqmol wae;
yaqyo alsheq kaol yaeqmiq alsheq e yotyel mael,
noq e onglci'ae aeqdilmyel zail eiq maeq hhae gaeq congl wae.
Noq e senyil mulzaeq e cholyaeq laoq,
milcaeq taq e yoheeq heeqmae'ae;
goqjahael eiq noq e niqhaeq tulzaeq maellye bi cheeqmu gil vae.
24 Xianzhihael, senltuqhael, kaol milcaeq taq'ae hal xyeq biq e cholyaeqhael e siq mael, gilzuqmyel milmae heeqmyel xilmael ae'lye saelpopuq hhei vae."